মধ্যপ্রদেশৰ বিদিশা জিলাৰ এখন মিছনাৰী স্কুলত তাণ্ডৱ চলায় বজৰং দলৰ কর্মকৰ্তাসকলে । খ্রীষ্টিয়ান ধর্মত ছাত্রসকলৰ ধর্মান্তৰণ হৈছে, এই অভিযোগ ।
দ্বাদশ শ্রেণীৰ ছাত্রসকলৰ অংক পৰীক্ষা চলি থকা সময়তে শ শ বজৰং দলৰ কর্মকৰ্তাই প্ৰৱেশ কৰে বিদ্যালয়ত । বিদ্যালয় ভাঙি পেলোৱাৰ হুমকি দিয়ে তেওঁলোকে । তাৰ পাছত ইটা-শিল দলিওৱা আৰম্ভ কৰে দলৰ কর্মকৰ্তাসকলে ফলত বিদ্যালয়ৰ কাচৰ খিৰিকীবোৰ ভাঙি যায় । কথমপি ৰক্ষা পৰে শিক্ষক আৰু ছাত্রসকল ।
সোমবাৰে ঘটনাটো সংঘটিত হয় বিদিশা জিলাৰ গঞ্জ বছোদা চহৰৰ চেন্ট জোছেফ স্কুলত । সেই স্কুলখনত ছাত্রসকলক জোৰ কৰি খ্ৰীষ্টিয়ান ধৰ্মত ধর্মান্তৰিত কৰা হৈছে বুলি অভিযোগ তুলি কিছুদিন পূৰ্বে কিছুসংখ্যক প’ষ্ট কৰা হয় সামাজিক মাধ্যমত । তাৰ পাছতেই এই আক্ৰমণ ।
ম’বাইলত তোলা ভিডিঅ’ত দেখা গৈছে, শ্ল’গান দি দি বজৰং দলৰ কর্মকৰ্তাসকলে বিদ্যালয় ঘেৰাও কৰিছে । ইটা, শিল দলিয়াইছে । উন্মত্ত জনতাক ছত্রভংগ কৰাৰ চেষ্টা কৰা দেখা গৈছে আৰক্ষীক ।
এজন আতংকিত ছাত্রই কয়, ‘‘আমি ভয়ত চিঞৰিছিলো । পৰীক্ষাত মনোযোগ দিব পৰা নাছিলো । আমাৰ অংক পৰীক্ষা পুনৰ অনুষ্ঠিত কৰক ।’’
বিদ্যালয়ৰ মেনেজাৰ ব্রাদাৰ এন্টনিয়ে জনায়, বিদ্যালয়ত এনে আক্ৰমণ হ’ব পাৰে বুলি এদিন আগতে তেওঁক ফোনত সকীয়নি দিয়া হৈছিল । তাৰ পাছতে তেওঁ নিৰাপত্তাৰ ব্যৱস্থা কৰাৰ বাবে আৰক্ষীক অনুৰোধ জনাইছিল । ‘‘কিন্তু আৰক্ষীয়ে তেনে ব্যৱস্থা নোলোৱাৰ বাবেই এই ঘটনা সংঘটিত হয়’’, অভিযোগ ব্রাদাৰ এন্টনিৰ ।
বজৰং দলৰ স্থানীয় ইউনিটৰ নেতা নীলেশ অগৰৱালে ধর্মান্তৰণৰ ঘটনাৰ পূর্ণাংগ তদন্তৰ দাবী জনাইছে । তেওঁ কয়, ‘‘এইটো প্রমাণিত হ’ল বিদ্যালয় ভাঙি দিয়া হ’ব ।’’ ঘটনাৰ পাছত অঞ্চলৰ অন্য মিছনাৰী স্কুলসমূহতো কটকটীয়া নিৰাপত্তাৰ ব্যৱস্থা কৰা হৈছে ।
বিদিশাৰ ছাব ডিভিছনেল মেজিষ্ট্ৰেট ৰোছন ৰায়ে কয়, ‘‘আৰক্ষীয়ে ঘটনাৰ তদন্ত কৰিছে । দোষীসকলে ৰক্ষা নাপায় । ধর্মান্তৰণৰ অভিযোগো পৰ্যবেক্ষণ কৰা হৈছে । এই বিষয়চ বিদ্যালয় কর্তৃপক্ষক প্ৰশ্ন কৰা হ’ব ।’’
মিছনাৰী স্কুলখনত ছাত্রসকলৰ ধর্মান্তৰণৰ অভিযোগ পৰ্যবেক্ষণ কৰাৰ বাবে ইয়াৰ আগতে বিদিশাৰ জিলা প্ৰশাসকক পত্ৰ দিছিল শিশু অধিকাৰ সুৰক্ষা সংক্রান্ত ৰাষ্ট্ৰীয় কমিছনে ।