দেশৰ সেনা সৰ্বাধিনায়ক জেনেৰেল বিপিন ৰাৱট তেওঁৰ পত্নী মধুলিকা ৰাৱট আৰু আন ১১ জনৰ শোকাৱহ মৃত্যুত গভীৰ শ্ৰদ্ধাঞ্জলি জ্ঞাপন কৰে প্ৰধানমন্ত্ৰী নৰেন্দ্ৰ মোদীৰ জৰুৰীকালীন কেবিনেট বৈঠকে । বুধবাৰে নিশা অনুষ্ঠিত মোদী কেবিনেটৰ নিৰাপত্তা সম্পৰ্কীয় কমিটীৰ এক জৰুৰীকালীন চমু বৈঠকত জেনেৰেল ৰাৱটলৈ শ্ৰদ্ধাঞ্জলি জ্ঞাপনৰ লগতে এক মিনিট সময় মৌন প্ৰাৰ্থনাও কৰা হয় ।
সূত্ৰত প্ৰকাশ যে, দেশৰ আভ্যন্তৰীণ নিৰাপত্তা আৰু প্ৰতিৰক্ষা নীতিৰ ক্ষেত্ৰত শীৰ্ষ নিৰ্ধাৰক কমিটীখনৰ বৈঠকতে ৰাৱটৰ উত্তৰসূৰী নিৰ্বাচন কৰা হ’ব নেকি তাকে লৈ জল্পনা-কল্পনা কৰা হৈছে । সম্প্ৰতি লাডাখত চীনৰ স’তে চলি থকা উত্তেজনাময় পৰিস্থিতিৰ সম্পৰ্কত এই বিষয়টো ৰাৱটৰ মৃত্যুৰ পাছতে চৰ্চিত হৈছে ।
বৈঠকৰ আন্তত অৱশ্যে বহুসংখ্যক বিজেপি সাংসদে এইদৰে আঙুলীয়াই দিয়ে যে চীফ অৱ ডিফেন্স ষ্টাফৰ পদ সকলো সময়তে পূৰ্ণ হৈ থকাটো প্ৰয়োজনীয় নহয় । প্ৰধানমন্ত্ৰী মোদীৰ অধ্যক্ষতাত কমিটীখনত আছে কেন্দ্ৰীয় প্ৰতিৰক্ষা, গৃহ, বৈদেশিক পৰিক্ৰমা আৰু বিত্ত মন্ত্ৰী । এই কমিটীখনেই ২০১৯ৰ ডিচেম্বৰত দেশৰ প্ৰথমজন সেনা সৰ্বাধিনায়কৰূপে নেতৃত্ব দিছিল ৰাৱটক ।
ইয়াৰ ফলত দেশৰ স্থলসেনা, বায়ুসেনাৰ আৰু জলসেনা এই তিনি বাহিনীৰ মুৰব্বীসকল থাকিলেও কমিটীখনৰ বাবে একমাত্ৰ যুগসূত্ৰকাৰী হৈ পৰিছিল এই সংহত পদবী । মন কৰিবলগীয়া যে দেশৰ তিনি সেনা বাহিনীৰ পৰিপ্ৰেক্ষিতত প্ৰতিৰক্ষা মন্ত্ৰীৰ মুখ্য সামৰিক পৰামৰ্শদাতাও সেনা সৰ্বাধিনায়ক ।
উল্লেখ্য যে আজি সংসদত সেনাৰ হেলিকপ্টাৰ দুৰ্ঘটনাত পতিত হোৱাৰ সন্দৰ্ভত প্ৰতিৰক্ষা মন্ত্ৰী ৰাজনাথ সিঙে বিবৃতি প্ৰকাশ কৰে ।