কাৰাবন্দী ৰাকেশ পালৰ অধ্যক্ষতাত অসম লোকসেৱা আয়োগ (এপিএছচি)ৰ নিযুক্তি প্ৰক্ৰিয়াত সংঘটিত কেলেংকাৰিত অভিযুক্ত হৈ বৰ্খাস্ত হো ৪৪জন ৰাজপত্ৰিত বিষয়াৰ বিচাৰ প্ৰক্ৰিয়া অহা ১২ জানুৱাৰীৰ পৰা আৰম্ভ হ’ব । তাৰ পূৰ্বে কালি বিশেষ আদালতে সকলোৰে বিৰুদ্ধে ধাৰা আৰোপ কৰে । এই সম্পৰ্কীয় গোচৰটো ভাঙাগড় আৰক্ষী থানাত ১৫৯/২০১৭ নম্বৰত ৰুজু হৈ আছে । আনহাতে, বিশেষ আদালতৰ গোচৰ নম্বৰ ৫/২০২১ত বিশেষ আদালতে দুৰ্নীতি প্ৰতিৰোধ আইনৰ ১২/৭ ধাৰা আৰু ভাৰতীয় দণ্ড বিধিৰ ধাৰা ১২০-বি/১০৯/৪২০/৫৬৮ আৰোপ কৰে ।
আদালতৰ নিৰ্দেশত উল্লেখ কৰা হৈছে যে পৰৱৰ্তী শুনানিৰ দিনটোৰ পৰা গোচৰটোৰ সাক্ষীৰো বক্তব্য গ্ৰহণ কৰা হ’ব । বিচাৰ প্ৰক্ৰিয়াৰ প্ৰথম অভিযুক্তৰূপে বিনীতা ৰিঞ্জাৰ নামো নিৰ্ধাৰণ কৰা হয় ।
ইপিনে, গুৱাহাটী কেন্দ্ৰীয় কাৰাগাৰৰ পৰা ভিডিঅ’ কনফাৰেন্সিঙৰ জৰিয়তে কালি শুনানিত ৰাকেশ পালো উপস্থিত থাকে । ইয়াৰ বিপৰীতে আন অভিযুক্তসকল সোঁশৰীৰে আদালতত উপস্থিত হয় । উল্লেখ্য যে বেদান্ত বিকাশ দাস নামৰ কৃষি উন্নয়ন বিষয়া পদৰ এজন প্ৰাৰ্থীয়ে ভাঙাগড় আৰক্ষী থানাত ২০১৭ৰ ১৭ আগষ্টত উক্ত গোচৰটোৰ এজাহাৰ দাখিল কৰিছিল ।
দাসে অভিযোগ অনুসৰি, উক্ত পদৰ বাবে ২০১৪ত লিখিত পৰীক্ষা আৰু ২০১৫ত মৌখিক পৰীক্ষা অনুষ্ঠিত হৈছিল । পৰীক্ষাত উত্তীৰ্ণ কৰাই দিব বুলি তদানীন্তন অধ্যক্ষ পাল আৰু মুশ্বাৰফ হুছেইন নামৰ তেওঁৰ সহযোগী এজন প্ৰৰ্থীজনৰ পৰা ১৫ লাখ টকা দাবী কৰিছিল । সেই অনুসৰি তেওঁ মহানগৰীৰ ভঙাগড়স্থিত সৎসংগ বিহাৰত আগধন হিচাপে ৫০ হেজাৰ টকা পালক আদায় দিছিল ।
কিন্তু কেইদিনমান পাছত তেওঁ জানিব পাৰে যে আগধন ল’লেও পালে অন্য এজন প্ৰাৰ্থীক চাকৰিৰ বাবে নিৰ্বাচিত কৰাৰ ষড়যন্ত্ৰ কৰিছে । পৰৱৰ্তী সময়ত তথ্য জনাৰ অধিকাৰ আইনৰ সহায়ত মৃগেন হালৈ নামৰ এজন প্ৰাৰ্থীয়ে বক্ৰপথেৰে চাকৰি লোৱাৰ তথ্য পোহৰলৈ আহে বুলি অভিযোগকাৰী দাসে এজাহাৰত উল্লেখ্য কৰে । পাল আৰু মুশ্বাৰফ হুছেইনৰ লগতে পৰৱৰ্তী সময়ত এই গোচৰটোত বক্ৰপথেৰে চাকৰি সংগ্ৰহ কৰা সকলকো সামৰি লোৱা হয় ।