তিনিমাহ পূৰ্বে টনা আঁজোৰাৰ মাজেৰে অসম চৰকাৰে গঠন কৰা চাৰিখন স্বায়ত্বশাসিত পৰিষদে পুঁজিৰ বাবে এতিয়া লৰা-ঢপৰা কৰিবলগীয়া হৈছে । অথচ চৰকাৰে কমতাপুৰ, মৰাণ, মটক আৰু বড়ো-কছাৰী (উপগ্ৰহীয়) পৰিষদকেইখনৰ বাবে এক কোটি টকাকৈ ধাৰ্য কৰা বুলি ঘোষণা কৰিছিল । তদুপৰি বিধানসভাৰ সদ্যসমাপ্ত শীতকালীন অধিবেশনত অনুমোদনৰ বাবেও পদক্ষেপ গ্ৰহণৰ আশ্বাস দিছিল; কিন্তু কোনো ব্যৱস্থাই আজিলৈকে গ্ৰহণ কৰা নহ’ল । ফলত পৰিষদকেইখনৰ ব্যৱসায়ীসকলে কাৰ্যভাৰ গ্ৰহণতে দায়-দায়িত্ব সীমাবদ্ধ ৰাখিবলগীয়া হৈছে । ইয়াৰ ফলত যোৱা তিনিমাহ বিষয়ববীয়াসকলে হামিয়াই-হিকটিয়াই থাকিবলগীয়া হোৱা বুলি সদৰী কৰে পৰিষদৰ সূত্ৰই ।
লগতে সূত্ৰটোৱে কয় যে পৰিষদ গঠনৰ সময়ত স্বয়ং মুখ্যমন্ত্ৰীয়ে কাৰ্যবাহী সদস্যসকলক শীঘ্ৰে উন্নয়নমূলক আঁচনিৰ প্ৰস্তাৱ দাখিল কৰিবলৈ কৈছিল । সেই মতে প্ৰস্তাৱো দাখিল হয় । উদাহৰণস্বৰূপে কমতাপুৰ স্বায়ত্বশাসিত পৰিষদৰ পৰা ২৮ কোটি টকাৰ প্ৰস্তাৱ দাখিল কৰা হয় । কিন্তু এক কোটিৰ লগতে প্ৰস্তাৱৰ ধনো চৰকাৰৰ বিবেচনাৰ আওতাত নোসোমাল । সেয়েহে প্ৰয়োজনীয় পুঁজি চৰকাৰক মোকলাই দিবলৈ জনগোষ্ঠীকেইটাৰ বিভিন্ন সংগঠনে চৰকাৰক দাবী জনাইছে ।
প্ৰসংগক্ৰমে উল্লেখ্য যে সদৌ অসম কোচ-ৰাজবংশী সন্মিলনীৰ দেওবাৰে অনুষ্ঠিত কাৰ্যনিৰ্বাহক সভাতো স্বায়ত্বশাসিত পৰিষদক প্ৰয়োজনীয় পুঁজি চৰকাৰক মোকলাই দিবলৈ অনুৰোধ জনাই প্ৰস্তাৱ গ্ৰহণ কৰে । জনগোষ্ঠীটোৰ বিকাশৰ বাবে উন্নয়নমূলক কাম-কাজ কৰিব পৰাকৈ পুঁজি মোকলোৱা প্ৰক্ৰিয়া ত্বৰান্বিত কৰিবলৈ সভাই চৰকাৰক আহ্বান জনায় । অথচ সংশ্লিষ্ট জনগোষ্ঠীকেইটাৰ উন্নয়নৰ লক্ষ্যৰে শেহতীয়া পৰিষদকেইখন গঠন কৰা হৈছিল ।