পুনৰ দেশত কৰ’নাৰ সন্ত্ৰাস। কৰ’নাৰ বাবেই পুনৰ পিছুৱাই দিয়া হ’ল এছ এছ ৰাজামৌলীৰ ‘আৰআৰআৰ’ ৰ মুক্তিৰ দিন। বক্স অফিচ প্ৰতিযোগিতাত প্ৰৱেশ কৰাৰ আগতে কোটি কোটি টকাৰ ক্ষতি হ’ল প্ৰযোজকসকলৰ।
সাত জানুৱাৰীত প্ৰেক্ষাগৃহত মুক্তি পোৱাৰ কথা আছিল ৰাম চৰণ, জুনিয়ৰ এনটিআৰ, অজয় দেৱগন আৰু আলিয়া ভট্টৰ দৰে তাৰকাক লৈ নিৰ্মান কৰা এই ছবি ।
পৰিকল্পনা অনুসৰি পূৰ্ণ গতিত চলিছিল প্ৰচাৰ । মুম্বাইৰ এক সংবাদ মাধ্যমৰ সূত্ৰ অনুসৰি, কেৱল প্ৰচাৰৰ বাবে খৰছ কৰা হৈছে ১৮-২০ কোটি টকা।
ৰাম চৰণ আৰু জুনিয়ৰ এনটিআৰ অনুৰাগীসকলক অন্ধ্ৰ প্ৰদেশৰ বাহিৰৰ বিভিন্ন প্ৰচাৰ অনুষ্ঠান লৈ যোৱাৰ বাবে দুই তিনি কোটি টকা ব্যয় কৰা হৈছে।
আৰআৰআৰ তাৰকাসকলে শেহতীয়াকৈ বিগ বছ, ‘দ্য কপিল শৰ্মা শ্ব’ৰ দৰে একাধিক অনুষ্ঠানৰ প্ৰচাৰ কৰিবলৈ আহিছিল। ছবিখনৰ দুগৰাকী তাৰকাৰ ভিতৰত ৰাম চৰণ আৰু জুনিয়ৰ এনটিআৰে মুখ্যতঃ দক্ষিণৰ চলচ্চিত্ৰত অভিনয় কৰে।
নিৰ্মাতাসকলে অনুভৱ কৰে যে দেশৰ সকলো চহৰতে তেওঁলোকৰ একেই জনপ্ৰিয়তা নাথাকিব পাৰে। গতিকে তেওঁলোকে প্ৰচাৰৰ সময়ত তেওঁলোকৰ অসংখ্য অনুৰাগীক লগত লৈ গৈছিল।
ছবিখনৰ মুক্তি পিছুৱাই দিয়া হৈছে আৰু প্ৰচাৰ অৱশেষত স্তব্ধ ৰখা হৈছে। সূত্ৰসমূহে জনাইছে যে ৰাম চৰণ আৰু জুনিয়ৰ এনটিআৰ পৰিচালক আৰু প্ৰযোজকৰ দৰেই হতাশাত ভুগিছে। দক্ষিণৰ উদ্যোগৰ দুয়োজন তাৰকাই এতিয়া পৰ্যন্ত কাকো সাক্ষাৎ কৰা নাই।
