গুৱাহাটী বিশ্ববিদ্যালয়ে ১৬ জানুৱাৰীত স্নাতক তৃতীয় ষান্মাসিকৰ ফলাফল ঘোষণাৰ পাছতেই ছাত্ৰ-ছাত্ৰীসকলৰ মাজত সৃষ্টি হৈছে ব্যাপক অসন্তুষ্টিৰ । চি বি চি এছ ব্যৱস্থাত অধ্যয়নৰত এইসকল ছাত্ৰ-ছাত্ৰীয়ে আশা কৰাতকৈ যথেষ্ট কম নম্বৰ পোৱা বুলি অভিযোগ উঠিছে ।
এই সন্দৰ্ভত আজি গুৱাহাটী বিশ্ববিদ্যালয়ৰ উপাচাৰ্যক সাক্ষাৎ কৰে সদৌ অসম ছাত্ৰ সন্থাই । ছাত্ৰ সন্থাৰ উপসভাপতি উৎপল শৰ্মা আৰু শিক্ষা সম্পাদক ভৱজিৎ বেজবৰুৱাৰ নেতৃত্বত যোৱা এটি সজাঁতি দল বিশ্ববিদ্যালয়ৰ উপাচাৰ্য অধ্যাপক প্ৰতাপ সন্দিকৈ, পঞ্জীয়ক ড° হেমন্ত কুমাৰ নাথ আৰু পৰীক্ষা নিয়ন্ত্ৰক ড° ধ্ৰুৱজ্যোতি চৌধুৰীৰ স’তে এই সন্দৰ্ভত আলোচনাত মিলিত হয় । ছাত্ৰ সন্থাই এই ফলাফল পুনৰ বিবেচনা কৰি ছাত্ৰ-ছাত্ৰীসকলক ন্যায় প্ৰদানৰ দাবীৰে স্মাৰক পত্ৰ প্ৰদান কৰে । আছুৰ উপসভাপতি উৎপল শৰ্মা আৰু শিক্ষা সম্পাদক ভৱজিৎ বেজবৰুৱাই এই সন্দৰ্ভত সংবাদমাধ্যমক কয় যে স্নাতক তৃতীয় ষান্মাসিকৰ ফলাফলে ছাত্ৰ-ছাত্ৰীক মানসিক উদ্বিগ্নতাৰ মাজলৈ ঠেলি দিছে । এই ফলাফলে ছাত্ৰ-ছাত্ৰীক ন্যায় দিব পৰা নাই । আজি বিশ্ববিদ্যালয় কৰ্তৃপক্ষৰে আলোচনাত মিলিত হৈ ছাত্ৰ সন্থাই এই ফলাফল পুনৰ বিবেচনাৰ দাবী জনাওঁ ।
কৰ্তৃপক্ষই বিষয়টোত ইতিবাচক সঁহাৰি দিছে। বিশ্ববিদ্যালয় কৰ্তৃপক্ষই চিবিচিএছৰ মূল্যায়ন পদ্ধতিৰ বাবে যিসকল ছাত্ৰ-ছাত্ৰীয়ে পূৰ্বৱৰ্তী ষান্মাসিকৰ ফলাফলতকৈ কম নম্বৰ পাইছে তেওঁলোকৰ তালিকা প্ৰস্তুত কৰাৰ সিদ্ধান্ত লৈছে । এই ফলাফল কম সময়ৰ ভিতৰত পুনৰ বিবেচনা কৰিব বুলিও আশ্বাস প্ৰদান কৰিছে । ছাত্ৰ সন্থাৰ স্পষ্ট কথা, বিগত সময়খিনিত মহামাৰীসৃষ্ট পৰিৱেশৰ বাবে ছাত্ৰ-ছাত্ৰীৰ যথেষ্ট শৈক্ষিক ক্ষতি হৈছে । গতিকে কোনো ধৰণৰ আসোঁৱাহৰ বাবেই ছাত্ৰ-ছাত্ৰীক আৰু মানসিক অশান্তিৰ মাজলৈ ঠেলি দিব নোৱাৰি । এই ফলাফলয়পুনৰ বিবেচনা হ’বই লাগিব আৰু ভুক্তভোগী ছাত্ৰ-ছাত্ৰীসকলে ন্যায় পাবই লাগিব ।
আলোচনাটোত গুৱাহাটী বিশ্ববিদ্যালয় আছু গোটৰ সাধাৰণ সম্পাদক অনুস্মিতা দাস আৰু উপদেষ্টা ৰাজদীপ বৰুৱাও উপস্থিত থাকে ।