ভৱানীপুৰ আঞ্চলিক পঞ্চায়তৰ সভাপতিৰূপে নিৰ্বাচিত হৈছে বিজেপি দলৰ আঞ্চলিক পঞ্চায়তৰ সদস্য বুদ্ধদেৱ পাটগিৰি। বুদ্ধদেৱ পাটগিৰিয়ে ভৱানীপুৰ বিধানসভা সমষ্টি তথা ভৱানীপুৰ উন্নযন খণ্ডৰ অন্তৰ্গত হাঠিনাপুৰ পঞ্চায়তৰ পৰা নিৰ্বাচিত হৈছিল।
আজি ভৱানীপুৰ খণ্ড উন্নয়ন বিষয়াৰ কাৰ্যালয়ত ভৱানীপুৰ বিধানসভা সমষ্টিৰ বিধায়ক ফনীধৰ তালুকদাৰ, ভৱানীপুৰ খণ্ড উন্নয়ন বিষয়া ভৱানী পেগুৰ লগতে ভৱানীপুৰ উন্নয়ন খণ্ড এলেকাৰ ষোল্লখন পঞ্চায়তৰ আঞ্চলিক পঞ্চায়তৰ সদস্যৰ উপস্থিতিত অনুষ্ঠিত এখন সভাত সৰ্বসন্মতভাৱে বুদ্ধদেৱ পাটগিৰিক ভৱানীপুৰ আঞ্চলিক পঞ্চায়তৰ সভাপতিৰূপে নিৰ্বাচিত কৰে।
ভৱানীপুৰ আঞ্চলিক পঞ্চায়তৰ সভাপতিৰূপে নিৰ্বাচিত হোৱাৰ পাছতে ভৱানীপুৰ খণ্ড উন্নয়ন বিষয়াৰ কাৰ্যালয় প্ৰাংগণত বুদ্ধদেৱ পাটগিৰিক বিধায়ক ফনীধৰ তালুকদাৰৰ লগতে বিজেপি দলৰ তৰফৰ পৰা উষ্ম সম্বৰ্ধনা জ্ঞাপন কৰে।
উল্লেখ্য যে ষোল্লখন পঞ্চায়তক লৈ ভৱানীপুৰ বিধানসভা সমষ্টিৰ সৰুপেটাত ভৱানীপুৰ উন্নয়ন খণ্ডৰ কাৰ্যালয় নতুনকৈ স্থাপন হোৱাৰ পিছত আজি নতুনকৈ গঠিত ভৱানীপুৰ আঞ্চলিক পঞ্চায়তৰ সভাপতিৰূপে নিৰ্বাচিত হয় বুদ্ধদেৱ পাটগিৰিয়ে।
