অহা ছয় মাৰ্চত অনুষ্ঠিত হ’বলগীয়া নিৰ্বাচনৰ বাবে ৰাজ্যৰ ৮০খন পৌৰসভা অঞ্চলত প্ৰচাৰ অভিযান তুংগত উঠিছে । প্ৰতিদ্বন্দ্বিতা কৰা প্ৰতিটো ৰাজনৈতিক দল আৰু প্ৰৰ্থীয়ে দিন-ৰাতি একাকাৰ কৰি সাংসদীয় গণতান্ত্ৰৰ একেবাৰে তৃণমূলৰ এই নিৰ্বাচনৰ বাবে সাজু হৈছে । তাৰ মাজতে একাংশ প্ৰাৰ্থীয়ে ভোটাৰক আকৰ্ষণ কৰিবলৈ ন ন কৌশলো গ্ৰহণ কৰিছে ।
কৰ’বাত যদি প্ৰাৰ্থীয়ে নাচি বাগি ভোটাৰৰ মন পাবলৈ চেষ্টা কৰিছে আন কৰ’বাত আকৌ ভোজ ভাতৰ আয়োজন কৰিছে । আনকি ভোটাৰৰ ঘৰত মাছ-মাংসৰো যোগান ধৰিছে অত্যুৎসাহী প্ৰাৰ্থীয়ে । কেতিয়াও এষাৰ মাত নিদিয়া ঘৰৰ কাষৰ মানুহজনকো একমাত্ৰ ভোটৰ স্বাৰ্থতে যদি কোনো প্ৰাৰ্থীয়ে ভৰি চুই সেৱা কৰিছে, কোনোৱে আকৌ আপোন দেখুৱাবলৈ বলপূৰ্বক ভোটাৰৰ পাকঘৰলৈ সোমাই গৈ চাহৰ জুতি লৈছে । বহুতে আকৌ বেণ্ডপাৰ্টি লৈ, ঢোলে-ডগৰেও প্ৰচাৰলৈ ওলাইছে । তাৰে বহুতে নিৰ্বাচনত জয়যুক্ত হ’লে নিজৰ ৱাৰ্ডটোৰ বাবে কিনো কৰিব সেই সম্পৰ্কত কোনো ধাৰণাই নাই । অৱশ্যে ভোটাৰক আকৰ্ষণৰ উদ্ভাৱনী কৌশল লোৱা বহু প্ৰাৰ্থী সামাজিকভাৱে যথেষ্ট সচেতন ।
শতিকা পুৰণি বৰপেটা পৌৰসভাৰ উল্লেখযোগ্য এটা ৱাৰ্ড হ’ল তিনি নম্বৰ ৱাৰ্ড । ঐতিহ্যমণ্ডিত বৰপেটা সত্ৰ অৱস্থিত ৱাৰ্ডটোৰ অসম গণ পৰিষদৰ প্ৰাৰ্থী খনিন্দ্ৰ দাস । প্ৰাৰ্থীজনে বৰপেটাৰ বিখ্যাত হোলী গীত পৰিবেশন কৰি ৱাৰ্ডটোত ভোট বিচাৰিছে । প্ৰচাৰৰ এই কৌশল সন্দৰ্ভত প্ৰাৰ্থীজনে কয়, ‘মোৰ নিৰ্বাচনী ক্ষেত্ৰখনতে বৰপেটা সত্ৰ অৱস্থিত । কেইদিনমান পাছতে অনুষ্ঠিত হ’ব বৰপেটাৰ বিখ্যাত দৌল মহোৎসৱ । তাৰ বাবে বৰপেটাত ইতিমধ্যে হাটীয়ে হাটীয়ে হোলীগীতৰ লহৰ উঠিছে । কাৰণ হোলীগীতৰ লগত বৰপেটাবাসীৰ কি আত্মিক সম্পৰ্ক তাক ভাষাৰে প্ৰকাশ কৰিব নোৱাৰি । সেই কাৰণে মই পথে পথে হোলীগীত গাই নিৰ্বাচনী প্ৰচাৰ চলাইছো । ৰাইজৰ পৰাও যথেষ্ট সঁহাৰি পাইছো । বৰপেটাত ময়েই প্ৰথমে হোলীগীত গাই নিৰ্বাচনী প্ৰচাৰ চলাইছো । ৰাইজৰ পৰাও যথেষ্ট সঁহাৰি পাইছো । বৰপেটাত ময়েই প্ৰথমে হোলীগীত গাই নিৰ্বাচনী প্ৰচাৰ চলাইছো ।’ নিৰ্বাচনী প্রচাৰত আকৰ্ষণ আনিবলৈকে হোলীগীত পৰিবেশনত গুৰুত্ব দিয়া বুলি প্ৰাৰ্থীজনে জনায় ।
ইপিনে, নাচ-গানেৰে প্ৰচাৰ চলোৱা পৌৰসভাখনৰ ভাৰতীয় জনতা পাৰ্টিৰ এগৰাকী প্ৰৰ্থীয়ে মন্তব্য কৰে যে চলিত ‘ট্ৰেণ্ড’ৰ অনুকৰণতে তেওঁ গীতে-মাতে, নাচে-গানে প্ৰচাৰ চলাইছে । নাম প্ৰকাশত অনিচ্ছুক প্ৰাৰ্থীগৰাকীয়ে আনকি মুখ্যমন্ত্ৰী হিমন্ত বিশ্ব শৰ্মাক আঙুলিয়াই কয়, ‘আমাৰ মুখ্যমন্ত্ৰীয়েও নিৰ্বাচনী প্ৰচাৰৰ সময়ত নাচে । সকলোৱে দেখিছে তেওঁৰ নাচ । এখন, দুখন নহয় প্ৰায় সকলো নিৰ্বাচনী সভাৰ মঞ্চত মুখ্যমন্ত্ৰীয়ে নাচে । তেৱেঁইতো এতিয়া অসমৰ জনপ্ৰিয় মুখ্যমন্ত্ৰী । তাৰ মানে নাচ-গান কৰাটো নিৰ্বাচনী প্ৰচাৰত এতিয়া এটা ট্ৰেণ্ড হৈ পৰিছে ।’ মহিলা প্ৰৰ্থীগৰাকীয়ে তেওঁলোকৰ নেতাক অনুসৰণ কৰিয়েই নিজৰ প্ৰচাৰত তেনে কৌশল অৱলম্বন কৰা বুলি জনায় ।
তেজপুৰ পৌৰসভাৰ ১৬ নম্বৰ ৱাৰ্ডৰ বিজেপিৰ প্ৰাৰ্থী সান্তনা বিশ্বাসে ভোটাৰে বিচাৰিলেই এপাক বিহু নাচি আকৰ্ষণৰ চেষ্টা কৰি আহিছে । এনেদৰে অধিকাংশ পৌৰসভাতে ভোটাৰক আকৰ্ষণৰ বাবে একাংশ প্ৰাৰ্থীয়ে নানান কৌশলেৰে প্ৰচাৰ অব্যাহত ৰাখিছে । বিহু মাৰি ভোট বিচাৰি ফুৰিছে যোৰহাট পৌৰসভাৰ পাঁচ নম্বৰ ৱাৰ্ডৰ অসম গণ পৰিষদৰ প্ৰাৰ্থী ৰঞ্জিত শইকীয়াই । নলবাৰী পৌৰসভাৰ ১২ নম্বৰ ৱাৰ্ডৰ কংগ্ৰেছ প্ৰাৰ্থী লীনা দাসে এই সম্পৰ্কত এনেদৰে মন্তব্য কৰে, ‘ নিৰ্বাচনী প্রচাৰৰ বাবে নৃত্য-গীত অপৰিহাৰ্য নহয়; কিন্তু সেয়া এক্সট্ৰা ব’নাচ । নিৰ্বাচনত ভোটাৰৰ ওচৰ চপাৰ বাবে বিভিন্ন কৌশল প্ৰয়োগ কৰিবলগা হয় । কিছুমানে ধনবল, কিছুমানে শাসক দলৰ ক্ষমতা আৰু কিছুমানে নিজস্ব কৌশল অৱলম্বন কৰে । মানুহ মাত্ৰে নৃত্য-গীতৰ প্ৰতি কিছু হ’লেও দুৰ্বলতা থাকে । এজন নিৰক্ষৰ, চৰকাৰী আঁচনি-পৰিকল্পনাৰ কথা নুবুজা ভোটাৰ আকৰ্ষিত হ’ব পাৰে নৃত্য-গীতৰ মাজেৰে । সেয়েহে যিসকল প্ৰাৰ্থীৰ এনে দক্ষতা আছে তেওঁলোকে ইয়াক ৰাজনৈতিক কৌশল হিচাপে ব্যৱহাৰ কৰি ভোটাৰক আকৰ্ষিত কৰাৰ চেষ্টা চলায় । এয়া অৱশ্যে প্ৰাৰ্থীজনৰ বিজয়ৰ এক অৰ্হতা বুলি ক’ব নোৱাৰি । বৰঞ্চ এই কাৰ্যই এই ব্যৱস্থা গ্ৰহণ কৰিব নোখোজা কোনো দক্ষ প্ৰাৰ্থীক ক্ষতি কৰাৰো সম্ভাৱনা থাকে ।’ উল্লেখ্য যে নলবাৰী জিলাতো একাংশ প্ৰাৰ্থীয়ে ভোটাৰক আকৰ্ষণৰ নানা কৌশল অৱলম্বন কৰি প্ৰচাৰ অব্যাহত ৰাখিছে ।
অৱশ্যে প্ৰাৰ্থীৰ এনে ধৰণৰ প্ৰচাৰক লৈ মিশ্ৰিত প্ৰতিক্ৰিয়াৰো সৃষ্টি হৈছে । তেজপুৰ পৌৰসভাৰ ১০ নম্বৰ ৱাৰ্ডৰ অগপৰ প্ৰাৰ্থী পৰেশ নাথ ৰায়ে কয় যে ভোটাৰক আকৰ্ষণ কৰিবলৈ নাচ-গানৰ অৱশ্যক বুলি তেওঁ নাভাবে । নাথে কয়, ‘পৌৰসভা ৰাইজৰ এক স্থানীয় শাসন ব্যৱস্থা । ৰাইজৰ তথা অঞ্চলৰ সমস্যাৰ সমাধান আৰু উন্নয়নৰ পৰিকল্পনাই ইয়াৰ মূল লক্ষ্য গতিকে ইয়াত প্ৰাৰ্থীৰ কৰ্মদক্ষতা আৰু দূৰদৰ্শিতাহে প্ৰধান বিচাৰ্যৰ বিষয় হ’ব লাগে ।’ তেজপুৰ পৌৰসভাৰ এক নম্বৰ ৱাৰ্ডৰ বিজেপিৰ প্ৰাৰ্থী পৰিতোষ দে’ৰ মতে, পৌৰসভাৰ এগৰাকী প্ৰাৰ্থীৰ অৰ্হতা কেতিয়াও নাচ-গান নহয় । তেনে কাৰ্য কোনোবাই ভাল পালেও সকলোৱে ভাল নাপায় । প্ৰাৰ্থীজনে একোটা অঞ্চলৰ সমস্যাৰ বিষয়ে কিমান জানে আৰু ৰাইজৰ মতামতক কিমান গুৰুত্ব দিয়ে সেইটোহে সকলোৱে পৰীক্ষা কৰিব লাগে বুলিও দেই কয় । পৌৰসভাৰ পাঁচ নম্বৰ ৱাৰ্ডৰ কংগ্ৰেছ প্ৰাৰ্থী নেপাল দাসে মন্তব্য কৰে যে নাচি-বাগি ভোট বিচৰাটোৱে এজন প্ৰাৰ্থীৰ প্ৰতিভা বা দক্ষতাৰ প্ৰমাণ নিদিয়ে । দাসে কয়, ‘প্ৰকৃততে ৱাৰ্ডৰ ৰাইজে অঞ্চলটোৰ বাবে কেনেদৰে কাম কৰাটো বিচাৰে আৰু তেওঁলোকৰ আশা পূৰ্ণ কৰাৰ ক্ষেত্ৰত প্ৰাৰ্থীজন উপযুক্ত হয় নে নহয় সেইটোহে ৰাইজে বাছি উলিওৱাত গুৰুত্ব দিব লাগে ।’