অসমৰ কাজিৰঙা ৰাষ্ট্ৰীয় উদ্যানক সন্মান জনাই টাটা মটৰ্ছে শেহতীয়াকৈ বজাৰত মুকলি কৰিছে একাধিক নতুন এছইউভি সংস্কৰণ । টাটা পাঞ্চ, টাটা নেক্সন, টাটা হেৰিয়াৰ আৰু কোম্পানীটোৰ ফ্লেগশ্বিপ এছইউভি মডেল টাটা ছাফাৰীৰ কাজিৰঙা বিশেষ সংস্কৰণ মুকলি কৰা হৈছে । এই জনপ্ৰিয় মডেলসমূহৰ শীৰ্ষ ভেৰিয়েণ্টসমূহৰ নামকৰণ কৰা হৈছে কাজিৰঙাৰ নামত ।
এই গাড়ীসমূহৰ ভিতৰত থকা ডেশ্বব’ৰ্ডকে ধৰি একাধিক স্থানত বেইজ ৰং ব্যৱহাৰ কৰা হৈছে আৰু সকলো গাড়ীৰ সন্মুখৰ ফেণ্ডাৰত একোটাকৈ ৰাইনো বেজ আছে ।
টাটা পাঞ্চ কাজিৰঙা সংস্কৰণৰ মূল্য হৈছে ৮.৫৮ লাখ টকাৰ পৰা ৯.৪৮ লাখ টকা । ইয়াত অন্তৰ্ভুক্ত আছে বেইজ চামৰাৰ আনুষংগিক সামগ্ৰী, পিয়ানো ব্লেক ডোৰ, বেইজ ডেশ্বব’ৰ্ড, গ্ৰেনাইট ব্লেক ৰুফ টেইল, পিয়ানো ব্লেক ফ্ৰণ্ট গ্ৰিল আৰু ক’লা ৰঙৰ ১৬ ইঞ্চিৰ এলয় হুইল ।
আনহাতে, টাটা নেক্সন কাজিৰঙা সংস্কৰণৰ গাড়ীখনত একে ধৰণৰ কেতবোৰ পৰিৱৰ্তন দেখিবলৈ পাব । বাহনখনত সহ-চালকৰ বাবে ভেণ্টিলেচন চিট আৰু ইলেক্ট্ৰনিক আইআৰভিএম উপলব্ধ হ’ব । টাটা নেক্সনৰ এক্সজেড প্লাছ আৰু এক্সজেড এ প্লাছ ভেৰিয়েণ্ট দুখনৰ কাজিৰঙা সংস্কৰণ উপলব্ধ হ’ব । ইয়াৰ মূল্য ১২১ পৰা ১৩ লাখ টকাৰ ভিতৰত ।
একেদৰে, টাটা হেৰিয়াৰ কাজিৰঙা সংস্কৰণত আগৰ সকলো আপডেটৰ স’তে ১৭ ইঞ্চিৰ ক’লা এলয় হুইল ব্যৱহাৰ কৰা হৈছে । টাটা হেৰিয়াৰৰ এক্সজেড+ আৰু এক্সজেড এ+ ভেৰিয়েণ্ট দুখন কাজিৰঙা সংস্কৰণত উপলব্ধ হ’ব । হেৰিয়াৰৰ কাজিৰঙা সংস্কৰণৰ মূল্য ২০.৪০ লাখ টকাৰ পৰা ২১.৭০ লাখ টকাৰ ভিতৰত ।
ইফালে, কোম্পানীটোৰ ফ্লেগশ্বিপ যাত্ৰীবাহী গাড়ী টাটা ছাফাৰীৰো কাজিৰঙা সংস্কৰণ মুকলি কৰা হৈছে । টাটা ছাফাৰীৰ কাজিৰঙা সংস্কৰণ উপলব্ধ হ’ব ২০.৯৯ লাখ টকাৰ পৰা ২২.৩৯ লাখ টকাত ।