কৰ’নাৰ অ’মিক্রন ৰূপৰ লেখচিত্র কিছু নিম্নগামী হৈছিলহে মাত্ৰ সমগ্ৰ বিশ্বত, তেনে সময়তে পুনৰ কৰ’নাৰ নতুন ৰূপৰ সন্ধান পোৱা গ’ল ইজৰায়েলত । এই দাবী দেশখনৰ স্বাস্থ্য বিভাগৰ । বুধবাৰে ইজৰায়েলৰ স্বাস্থ্যমন্ত্রী নিজান হৰ’উইজে জনায়, কিছুদিন আগতে দেশৰ বাহিৰৰ পৰা ইজৰায়েলত আহিছে দুই যাত্রী । এই দুই যাত্রীৰ পৰীক্ষাৰ পাছত তেওঁলোকৰ শৰীৰত নতুন ক’ভিড ৰূপৰ সন্ধান পোৱা গৈছে বুলিও তেওঁ জনায় ।
ইজৰায়েলৰ স্বাস্থ্য বিভাগৰ ৰিপ’র্ট অনুযায়ী, ক’ভিডৰ এই নতুন ৰূপ অ’মিক্রন ৰূপৰ দুটা উপৰূপ বিএ-১ আৰু বিএ-২-ৰ মিশ্রিত এটা ৰূপ ।
ক’ভিডৰ এই নতুন ৰূপত কিছু উপসর্গ দেখা গৈছে বুলিও দাবী ইজৰায়েলৰ । মৃদু উপসর্গযুক্ত ৰোগীসকলৰ শৰীৰত মৃদু জ্বৰ, মূৰ আৰু পেশীত বিষৰ দৰে উপসর্গসমূহ দেখা গৈছে । অৱশ্যে কৰ’নাৰ এই নতুন ৰূপত আক্রান্তসকলে কোনো বিশেষ চিকিৎসা কৰাব নালাগিব বুলিও স্বাস্থ্য মন্ত্রণালয়ে জনাইছে । লগতে এই ৰূপ প্রাণঘাতী নহয় আৰু নতুন ঢৌৰ সৃষ্টি কৰিবলৈ সক্ষম নহয় বুলিও স্বাস্থ্য মন্ত্রণালয়ৰ তৰফৰ পৰা জনোৱা হৈছে । যদিও এই সন্দৰ্ভত আৰু গৱেষণাৰ প্রয়োজন বুলি মন্তব্য কৰিছে তেওঁলোকে ।
ইজৰায়েল স্বাস্থ্য মন্ত্রণালয়ৰ ডিৰেক্টৰ জেনেৰেল নাচমেন এশে জনাইছে, আক্রান্ত যাত্রীসকল বাহিৰৰ পৰা আহিলেও তেওঁলোকে ইজৰায়েলত আক্রান্ত হোৱাৰ সম্ভাৱনাক নুই কৰিব নোৱাৰি ।
ইজৰায়েলৰ প্রধানমন্ত্রী নাটালি বেনেটসহ বাকী স্বাস্থ্য বিষয়াসকলৰ স’তে আলোচনাত মিলিত হ’ব বুলিও জনাইছে ।
অৱশ্যে এই নতুন ৰূপৰ বিষয়ত এতিয়াও কোনো মন্তব্য কৰা নাই বিশ্ব স্বাস্থ্য সংস্থাই (হু) । লগতে বিগত এসপ্তাহত বিশ্বজুৰি প্রায় এক কোটি ১০ লাখ লোক ক’ভিডত আক্রান্ত হৈছে । ইয়াৰ ফলত পুনৰ উদ্বেগ বাঢ়িছে চিকিৎসক মহলত । বিগত বৰ্ষৰ নৱেম্বৰৰ পৰা অ’মিক্রনৰ প্ৰকোপত বিধ্বস্ত হৈছিল বিশ্ব । যাৰ প্ৰভাৱ ভাৰততো পৰিছিল । সৰ্বাধিক ক্ষতিগ্রস্ত হয় আমেৰিকা ।
