অহা ৩১ মাৰ্চত অনুষ্ঠিত হ’বলগীয়া ৰাজ্যসভাৰ নিৰ্বাচনৰ বিৰোধীৰ প্ৰাৰ্থী ৰিপোন বৰাক জয়যুক্ত কৰাৰ কৌশল নিৰূপণৰ বাবে কালি এখন কৌশল নিৰ্ধাৰণী সমিতি গঠন কৰা হয় । বিৰোধী দলপতি দেৱব্ৰত শইকীয়াক অধ্যক্ষ আৰু কংগ্ৰেছৰ বিধায়ক ভৰত চন্দ্ৰ নৰহক আহ্বায়কৰূপে লৈ গঠন কৰা আঠজনীয়া সমিতিখনে প্ৰাৰ্থী বৰাৰ বিজয়ৰ সকলো হিচাপ-নিকাচ কৰিব ।
সমিতিৰ সদস্যসকল হ’ল কংগ্ৰেছৰ ৰকিবুল হুছেইন, এআইইউডিএফৰ হাফিজ বছিৰ আহমেদ কাছিমী আৰু আমিনুল ইছলাম, চিপিআই (এম)ৰ মনোৰঞ্জন তালুকদাৰ, ৰাইজৰ দলৰ অখিল গগৈ আৰু প্ৰাৰ্থী তথা বৰ্তমানৰ ৰাজ্যসভাৰ সাংসদ ৰিপুন বৰা ।
কালি সন্ধিয়া কংগ্ৰেছ বিধায়িনী দলৰ নেতা দেৱব্ৰত শইকীয়াৰ সভাপতিত্বত দলকেইটাৰ মাজত এখন সভা অনুষ্ঠিত হয় । এই সভাত বিৰোধীৰ ভোট ঐক্যবদ্ধ কৰি ৰখাৰ ওপৰত আলোচনা হয় । অৱশ্যে কংগ্ৰেছৰ বিধায়ক হোৱা স্বত্ত্বেও শশীকান্ত দাসে বিজেপি মিত্ৰজোঁটৰ প্ৰাৰ্থীক ভোট দিব বুলি মুখ্যমন্ত্ৰীয়ে ঘোষণা কৰোটোৱে বৈঠকত বিৰোধীৰ হিচাপ-নিকাচত সামান্য আউল লগায় ।
সেয়েহে যিকোনো প্ৰকাৰে আন ৪৩টা ভোট নিশ্চিত কৰাৰ ওপৰত বৈঠকত গুৰুত্ব আৰোপ কৰে । ৰাজ্যসভাৰ দ্বিতীয় আসনখনত জয়লাভ কৰিবলৈ ৪২টা ভোটৰ প্ৰয়োজন যদিও বিৰোধীৰ হাতত এতিয়াও এটা ভোট অতিৰিক্তভাৱে আছে ।