বিমান সংস্থা এয়াৰ ইণ্ডিয়াৰ পাছত এইবাৰ আইডিবিআই বেংক বিক্রী কৰাৰ প্রস্তুতি কৰিছে চৰকাৰে । প্রকৃতপক্ষে, কেন্দ্রীয় চৰকাৰে বর্তমান এটা ৰোড শ্ব’ অর্থাৎ আইডিবিআই বেংকৰ অংশীদাৰিত্ব বিক্রীৰ অ’পেন অফাৰৰ আয়োজন কৰিছে । সোমবাৰে সংসদত এই তথ্য জনোৱা হয় ।
লোকসভাত এটা লিখিত উত্তৰত বিত্ত প্রতিমন্ত্রী ভাগৱত কাৰাদে কয়, আগ্রহ প্রকাশ (EoI) কৰাৰ আগতে বিনিয়োগকাৰীসকলক আগ্রহৰ মূল্যায়ন কৰিবৰ বাবে ৰোড শ্ব’ আয়োজন কৰা হৈছে ।
পিটিআই-ৰ খবৰ অনুযায়ী, চৰকাৰে আগন্তুক মাহৰ শেষৰ ফালে আইডিবিআই বেংকত অংশীদাৰিত্ব বিক্রী কৰিবৰ বাবে আগ্রহ প্রকাশৰ আমন্ত্রণ জনোৱাৰ পৰিকল্পনা কৰিছে । এই খবৰ প্রকাশ হোৱাৰ পাছতেই কালি আইডিবাই বেংকৰ শ্বেয়াৰ নেচনেল ষ্টক এক্সচেঞ্জত ৪.৪৩ শতাংশ বাঢ়ি ৪৪.৭৫ টকা হৈছে ।
ৰিপ’র্ট অনুযায়ী, বিনিয়োগকাৰীসকলক আকৃষ্ট কৰিবলৈ চৰকাৰে ব্যৱস্থাপনা নিয়ন্ত্রণৰ লগতে বেংকৰ প্রায় ২৬% শ্বেয়াৰ বিক্রীৰ কথা বিবেচনা কৰিব পাৰে । পাছত চৰকাৰে তাৰ সম্পূৰ্ণ শ্বেয়াৰ বিক্রীৰ কথা বিবেচনা কৰিব । অর্থনৈতিক বিষয়ক মন্ত্রীসভা কমিটীয়ে বিগত বৰ্ষৰ মে’ত আইডিবিআই বেংকত কৌশলগত বিনিয়োগ আৰু ব্যৱস্থাপনা নিয়ন্ত্রণ হস্তান্তৰৰ বাবে নীতিগত অনুমোদন দিছিল ।
চৰকাৰ আৰু এলআইচি আইডিবিআই বেংকৰ ৯৪ শতাংশৰো অধিক ইকুইটিৰ মালিক । চৰকাৰে এলআইচি-ত ৪৯.২৪ শতাংশ আৰু বেংকৰ ৪৫.৪৮ শতাংশ শ্বেয়াৰৰ মালিক । বর্তমান বেংকৰ নন-প্রম’টাৰ শ্বেয়াৰহোল্ডিং ৫.২৯ শতাংশ ।