পঞ্জাৱত বিধানসভাৰ নিৰ্বাচনত আম আদমি পাৰ্টি (আপ)য়ে প্ৰতিশ্ৰুতি দিছিল যে দলে চৰকাৰ গঠন কৰিলে ৰাজ্যখনৰ পৰা দুৰ্নীতি-ভ্ৰষ্টাচাৰক বিদায় দিব । পঞ্জাৱত চৰকাৰ গঠনৰ পাছত মুখ্যমন্ত্ৰী ভগৱন্ত মান নেতৃত্বাধীন আপৰ চৰকাৰে ঘোষণা কৰি কয় যে এতিয়াৰে পৰা ৰাজ্যবাসীয়ে দুৰ্নীতিৰ প্ৰসংগত প্ৰত্যক্ষভাৱে মুখ্যমন্ত্ৰীক অভিযোগ দিব পাৰিব ।
ছহিদ দিৱস উপলক্ষে মুখ্যমন্ত্ৰী মানে নিজৰ হোৱাটছএপ্ নম্বৰ ৯৫০১২০০২০০ লৈ পঞ্জাৱবাসীক দুৰ্নীতিৰ প্ৰসংগত প্ৰত্যক্ষভাৱে অভিযোগ দিবলৈ অনুৰোধ জনায় । দুৰ্নীতি বিৰোধী এই হেল্পলাইন নম্বৰ মুকলি কৰি মুখ্যমন্ত্ৰীজনে কয় যে ৰাজ্যবাসীয়ে এই নম্বৰলৈ ফটো, অডিঅ’ আৰু ভিডিঅ’ প্ৰেৰণ কৰি দুৰ্নীতি ভ্ৰষ্টাচাৰৰ অভিযোগ দখল কৰিব পাৰিব ।
অভিযোগ লাভৰ লগে লগে চৰকাৰে প্ৰয়োজনীয় তদন্ত চলোৱাৰ লগতে বিহিত ব্যৱস্থা গ্ৰহণ কৰিব বুলিও মানে ৰাজ্যবাসীক প্ৰতিশ্ৰুতি দিলে । পঞ্জাৱক দুৰ্নীতিমুক্ত কৰাৰ লক্ষ্যৰে এই হেল্পলাইন নম্বৰ মুকলি কৰা বুলি মানে জানিবলৈ দিয়ে ।