ব্যাপক পৰিৱৰ্তন ঘটিছে জলবায়ুত আৰু তাৰ প্ৰকোপতে ব্যাপকভাৱে সলনি হৈছে পৃথিৱীখন । স্বাভাৱিকতেই এই পৰিৱৰ্তনৰ প্ৰভাৱ পৰিছে পৃথিৱীৰ জীৱ-জগতত । সম্প্ৰতি পোহৰলৈ আহিছে যে চৰাইবোৰে নিৰ্দিষ্ট সময়ৰ পূৰ্বেই কণী পাৰিবলৈ আৰম্ভ কৰিছে । ৭২টা প্ৰজাতিৰ চৰাইৰ ওপৰত পৰীক্ষা চলাই সম্প্ৰতি পক্ষী বিশেষজ্ঞসকলে এই কথা জনাইছে ।
দাবী কৰা হৈছে যে কেৱল কণী পৰাই নহয়, পৰিৱৰ্তন ঘটিছে পক্ষীকুলৰ খাদ্যৰূপে চিহ্নিত কীট-পতংগৰ স্বভাৱতো । বিজ্ঞানীসকলৰ মতে, এই ধৰণৰ পৰিৱৰ্তনৰ ফলতে সম্প্ৰতি চৰাইৰ জনসংখ্যা উদ্বেগজনক হাৰত কমিছে ।
উত্তৰ আমেৰিকাৰ চিকাগোত গৱেষকৰ দল এটাই চৰাইৰ ৭২টা প্ৰজাতিক পৰ্যবেক্ষণ কৰিছে । দেখা গৈছে যে যোৱা শতিকাত বছৰৰ যি নিৰ্দিষ্ট সময়ত সেই চৰাইবোৰে কণী পৰা দেখা গৈছিল, সিবোৰৰ ভিতৰত এক-তৃতীয়াংশ পক্ষীৰ ক্ষেত্ৰতে সম্প্ৰতি সেই সময় প্ৰায় ২৫ দিন আগুৱাই আহিছে ।
‘এনিমেল ইক’লজী’ জাৰ্ণেলত প্ৰকাশিত এক গৱেষণা পত্ৰত এই কথা জনাইছে গৱেষকসকলে । ঠিক কি কাৰণত পক্ষীকুলৰ এই স্বভাৱৰ পৰিৱৰ্তন ঘটিছে, সেয়া অৱশ্যে এতিয়াও জানিব পৰা নাই বিজ্ঞানীসকলে । অৱশ্যে সেই চৰাইবোৰৰ পৰিভ্ৰমী চৰিত্ৰ আৰু অন্যান্য খুঁটি-নাটি বিষয়বোৰ চালি-জাৰি চালে সেয়াও বুজা সম্ভৱ হ’ব বুলি বিজ্ঞানীসকলে ধাৰণা কৰিছে ।
এই পৰিস্থিতি মে গোলকীয় উষ্ণতাৰ ফল সেই বিষয়ত বিজ্ঞানীসকল নিশ্চিত হৈছে । তেওঁলোকে জনাইছে যে ঠিক একেদৰে কীট-পতংগৰ স্বভাৱো অনেক সলনি হৈছে । ইয়াৰো বিৰূপ প্ৰভাৱ পৰিছে পক্ষীকুলৰ জীৱনত । কাৰণ যিবোৰ চৰাইৰ মাজত বিজ্ঞানীসকলে আগতীয়াকৈ কণী পৰাৰ বিষয়টো লক্ষ্য কৰিছে, সেইবোৰ চৰায়ে পোক-পৰুৱা খাই পেট ভৰায় । পোক-পৰুৱাৰ উপৰি গছৰ পাতৰ কৰি, ফল-ফুল আদি দিশবোৰো বিশ্লেষণ কৰি চাইছে বিজ্ঞানীসকলে ।
ইয়াৰ পূৰ্বে ২০১৯ৰ এক গৱেষণাত দেখা গৈছিল যে যোৱা শতিকাৰ ৭০ৰ দশকৰ পৰা ধৰিলে কেৱল কানাডা আৰু আমেৰিকাতে চৰাইৰ সংখ্যা কমেও ৩০ লাখ কমিছে । এই বিষয়টোৱেই পক্ষীবিদসকলক চিন্তিত কৰি তুলিছে ।