দ্বিতীয়বাৰলৈ উত্তৰ প্রদেশৰ গাদী দখলৰ পাছত মুখ্যমন্ত্ৰী যোগী আদিত্যনাথে শনিবাৰে পুৱা বিনামূলীয়াকৈ তিনিমাহৰ বাবে অতিৰিক্ত ৰেছন যোগানৰ ঘোষণা কৰাৰ পাছত সন্ধিয়ালৈ প্ৰধানমন্ত্ৰী নৰেন্দ্ৰ মোদীয়ে সমগ্ৰ দেশতে ছমাহৰ বাবে বিনামূলীয়া ৰেছন প্ৰদানৰ কথা ঘোষণা কৰে । শনিবাৰে বিয়লি কেন্দ্ৰীয় মন্ত্ৰীসভাৰ বিশেষ বৈঠকত এই সিদ্ধান্ত গ্ৰহণ কৰা হয় ।
উচ্চস্তৰীয় চৰকাৰী সূত্রই প্ৰকাশ কৰা অনুসৰি ৰন্ধন গেছ, পেট্ৰ’ল-ডিজেল, কেৰাচিনৰ পৰা আৰম্ভ কৰি খোৱা তেল তথা নিত্য প্ৰয়োজনীয় সামগ্ৰীৰ দাম যি ধৰণে বৃদ্ধি পাইছে তাৰ দ্বাৰা দৰিদ্ৰ জনসাধাৰণৰ জীৱনলৈ আহুকাল নামি আহিছে । সমস্যা গভীৰ হৈছে দেশৰ সাধাৰণ ৰাইজৰ ।
কংগ্ৰেছে ইতিমধ্যে ইয়াৰ প্ৰতিবাদত ‘মেহংগা মুক্ত ভাৰত’ অৰ্থাৎ মূল্যবৃদ্ধিমুক্ত ভাৰত নামেৰে প্ৰচাৰ অভিযানৰ ঘোষণা কৰিছে । দেশত ক’ভিডৰ প্ৰকোপ হ্ৰাস পালেও অতিমাৰীৰ সময়তে আৰ্থিক দিশত কোঙা হৈ পৰা কোটি কোটি লোকে ভাতমুঠি যোগাৰৰ সমস্যাৰ পৰা এতিয়াও মুক্ত হ’ব পৰা নাই । আজিও দেশৰ শ্ৰমজীৱী লোকসকলে, সাধাৰণ শ্ৰেণীৰ দৰিদ্ৰ ৰাইজে এমুঠি ভাতৰ বাবে হাহাকাৰ কৰি আছে । বহুতে এসাঁজ অন্নৰেই দিনটো পাৰ কৰিবলগীয়া অৱস্থাত আছে । এই সকলোবোৰ দিশ বিবেচনা কৰি অহা পহিলা এপ্ৰিলৰ পৰা অতিৰিক্তভাৱে ছমাহ বিনামূলীয়া ৰেছন বিতৰণৰ সিদ্ধান্ত লৈছে কেন্দ্ৰীয় চৰকাৰে ।
অৱশ্যে কংগ্ৰেছৰ অভিযোগ যে মোদী চৰকাৰে বিনামূলীয়া ৰেছন আদায় দি নিৰ্বাচনত ইয়াৰ সুবিধা লৈছে । বিজেপি চৰকাৰে বছৰৰ পাছত বছৰ পেট্ৰ’ পণ্যত ৰাজসাহায্য হ্ৰাস কৰিছে । পেট্ৰ’ল-ডিজেলৰ উপৰি ৰন্ধন গেছ তথা দৰিদ্ৰ লোকৰ পাকঘৰত ব্যৱহৃত কেৰাচিন তেলৰ ৰাজসাহায্যও প্ৰত্যাহাৰ কৰা হৈছে । অৰ্থাৎ এহাতে বিনামূলীয়া ৰেছন যোগান ধৰিছে আৰু আনহাতে সাধাৰণ মানুহৰ জীৱনৰ নিত্য প্ৰয়োজনীয় সামগ্ৰীৰ ওপৰত ৰাজসাহায্য কৰ্তন কৰিছে । কংগ্ৰেছে কয় যে মোদী চৰকাৰে এহাতেৰে দি আনখন হাতেৰে তাৰ দুগুণ কাঢ়ি নিছে ।
মন কৰিবলগীয়া যে ক’ভিড পৰিস্থিতিত তলাবন্ধৰ সময়ছোৱাত খাদ্য সুৰক্ষা আইনৰ আওতাৰ ভিতৰত থকা দেশৰ ৮০ কোটি মানুহৰ প্ৰতিমাহে বিনামূলীয়াকৈ পাঁচ কিলোগ্ৰাম অতিৰিক্ত ৰেছন আদায়ৰ বাবে আৰম্ভ কৰা হয় প্ৰধানমন্ত্ৰী গৰিব কল্যাণ অন্ন যোজনা । মোদী কেবিনেটে শনিবাৰে সন্ধিয়া এই আঁচনিৰ ম্যাদ অহা ছেপ্টেম্বৰলৈ বৃদ্ধি কৰে । ইয়াৰ বাবে ৰাজকোষৰ পৰা হ’বলগীয়া অতিৰিক্ত ব্যয়ৰ পৰিমাণ ৮০ হেজাৰ কোটি টকা । অহা ৩১ মাৰ্চত এই আঁচনিখনৰ ম্যাদৰ অন্ত পৰাৰ কথা আছিল ।
বিগত দুবছৰত আঁচনিখনৰ অধীনত ইতিমধ্যে দুই লাখ ৬০ হেজাৰ কোটি টকা ব্যয় কৰা হৈছে । এক চৰকাৰী বিবৃতিত কোৱা হয় যে সমাজৰ দৰিদ্ৰ আৰু দুৰ্বল শ্ৰেণীৰ লোকসকলৰ প্ৰতি উদ্বেগ আৰু সংবেদনশীলতা ব্যক্ত কৰি কেন্দ্ৰীয় কেবিনেটে প্ৰধানমন্ত্ৰী গঢ়িব কল্যাণ অন্ন যোজনাৰ ম্যাদ অতিৰিক্ত ছমাহ অৰ্থাৎ ২০২২ৰ ছেপ্টেম্বৰ পৰ্যন্ত বৃদ্ধিৰ সিদ্ধান্ত লয় । এই ছমাহ হ’ব আঁচনিখনৰ ষষ্ঠ পৰ্যায় ।
বিবৃতিত লগতে কোৱা হয়, ‘চৰকাৰে এই পর্যন্ত প্ৰায় ২.৬০ লাখ কোটি ব্যয় কৰিছে আৰু অতিৰিক্ত ৮০ হেজাৰ কোটি অহা ছেপ্টেম্বৰলৈ পৰৱৰ্তী ছমাহত ব্যয় কৰা হ’ব । ইয়াৰ ফলত মুঠ ব্যয়ৰ পৰিমাণ হ’ব তিনি লাখ ৪০ হেজাৰ কোটি টকা ।’
তদুপৰি চৰকাৰৰ বিবৃতিত এইদৰে লগতে কোৱা হয়, ‘ক’ভিড-১৯ অতিমাৰী লক্ষ্যণীয়ভাৱে হ্ৰাস পালেও আৰু অৰ্থনৈতিক কাৰ্যকলাপে গতি সঞ্চয় কৰিলেও পিএমডিকেএৱাইৰ সম্প্ৰসাৰণে এই কথা নিশ্চিত কৰিব যাতে কোনো দৰিদ্ৰ পৰিয়ালে এই পুনৰুদ্ধাৰৰ সময়ছোৱাত অন্ন গ্ৰহণ নকৰাকৈ শোৱাপাটীলৈ যাবলগীয়া নহয় ।’
আঁচনি সম্প্ৰসাৰণৰ ফলত যিটো পৰিয়ালে ৰেছনৰ স্বাভাৱিক পৰিমাণৰ প্ৰায় দুগুণ খাদ্য শস্য লাভ কৰিব বুলি কেন্দ্ৰীয় চৰকাৰৰ বিবৃতিত প্ৰকাশ । উল্লেখ্য যে পঞ্চম পৰ্যায় পৰ্যন্ত আঁচনি ৰূপায়ণত ভাৰত চৰকাৰে ৭৫৯ লাখ টন খাদ্য শস্য আবণ্টন দিছে । ষষ্ঠ পৰ্যায়ত আঁচনি ৰূপায়ণৰ বাবে অতিৰিক্ত ১৪৪ লাখ খাদ্য শস্য আবণ্টন দিয়াৰ পাছত আঁচনিখনৰ অধীনত আবণ্টিত মুঠ খাদ্য শস্যৰ পৰিমাণ হ’ব ১০০৩ লাখ টন ।
কেন্দ্ৰীয় খাদ্য আৰু অসামৰিক যোগান মন্ত্ৰী পীযুষ গোৱেলে টুইটাৰত কয় যে এই আঁচনি সম্প্ৰসাৰণে দৰিদ্ৰ লোকৰ প্ৰতি মোদী চৰকাৰৰ সংবেদনশীলতা প্ৰকাশ কৰিলে ।