আজি পহিলা এপ্ৰিলৰ পৰা তিনি এপ্ৰিললৈ প্ৰকৃতিৰ ৰম্যভূমি বিশ্ব ঐতিহ্য ক্ষেত্ৰ মানাহ ৰাষ্ট্ৰীয় উদ্যানত আৰম্ভ হৈছে গঁড় গণনা প্ৰক্ৰিয়া । যাৰ বাবে পৰ্যটকৰ বাবে তিনিদিনলৈ বন্ধ কৰি দিয়া হ’ল মানাহৰ প্ৰৱেশ দ্বাৰ ।
আজি পুৱাৰে পৰা মানাহ ৰাষ্ট্ৰীয় উদ্যান কৰ্তৃপক্ষ আৰু বন বিভাগৰ ফালৰ পৰা আৰম্ভ কৰিছে গঁড় গণনা প্ৰক্ৰিয়া ৷ এইফালে মানাহৰ জীপ চাফাৰী এছ’চিয়েছনকে ধৰি কে’বাটাও স্থানীয় স্বেচ্ছাসেৱী সংগঠনেও বন বিভাগক সম্পূর্ণ সহযোগিতা আগবঢ়াইছে ৷ নেৰানেপেৰা বৰষুণৰ মাজতো উদ্যানখনৰ ভিতৰভাগত চলিছে গঁড় গণনা প্ৰক্ৰিয়া । হাতী ছাফাৰীৰ লগতে জীপ ছাফাৰীৰে চলাইছে গঁড় গণনাৰ কাম ৷
উল্লেখ্য যে, বাতৰি লিখা সময়লৈ মানাহত ইতিমধ্যে প্ৰথমটো দিনত ২৪ টা গঁড়ৰ সন্ধান পোৱা বুলি জানিব পৰা গৈছে । মানাহত পূৰ্বৰ তুলনাত এইবাৰ গঁড়ৰ সংখ্যা যথেষ্ট বৃদ্ধি পাব বুলি বনবিভাগৰ লগতে স্থানীয় লোকে আশা প্ৰকাশ কৰা পৰিলক্ষিত হৈছে ৷ প্ৰণিধানযোগ্য যে ৰাষ্ট্ৰীয় উদ্যানখনত গণনাৰ পূৰ্বে ৪৮ টা গঁড় আছিল ৷
