স্মাৰ্ট চিটি হোৱাৰ দিশত অগ্ৰসৰ হোৱা গুৱাহাটী মহানগৰীৰ মূল পথ সমূহ তথা কিছু কিছু অঞ্চলৰ বাদে অধিক সংখ্যকেই উন্নয়নৰ দিশৰ পৰা একেবাৰে পিছপৰা ।
উন্নয়নৰ নামত ৰাইজে পাইছে কেৱল প্ৰতিশ্ৰুতিৰ । প্ৰতিশ্ৰুতি পাই অহা গুৱাহাটী পৌৰ নিগমৰ অন্তৰ্গত তেনে এক ৱাৰ্ড হৈছে ২৫ নং ৱাৰ্ড ।
পশ্চিম গুৱাহাটী সমষ্টিৰ অন্তৰ্গত এই ৱাৰ্ডৰ বাসিন্দা সকলে খোৱাপানী, নলা-নৰ্দমাকে ধৰি কেতবোৰ সমস্যাৰে ভাৰাক্ৰান্ত ।
উন্নয়নৰ নামত কেৱল ভেকো ভাওনাহে তেওঁলোকে দেখি অহা বুলি অভিযোগ কৰে । উল্লেখ্য, জ্যোতিশ্রী নগৰ, বেলতলী, ৰাজহ নগৰ,ৰংপুৰ,পুলিচ কলনী , হিড়িম্বাপুৰ আৰু দক্ষিণ গাঁওৰ এটা অংশ সামৰি এই ৱাৰ্ডটো গঠন হৈছে ।
ৱাৰ্ডটোৰ ৮০ শতাংশ লোকেই ভুগিছে খোৱাপানীৰ সমস্যাত । পানী ক্ৰয় কৰিব নোৱাৰা লোকসকলে ৰাজহুৱা নাদৰ পৰা পানী সংগ্ৰহ কৰে । কিন্তু বৰ্তমান সেই নাদতো এটুপিও পানী পাবলৈ নাই ।
ফলত জীয়াতু ভুগিছে অঞ্চলসমূহৰ ৰাইজে । পানীয়েই প্ৰাণ যদিও ৰাইজৰ সমস্যাৰ বুজে লবলৈ আহৰি নাই চৰকাৰখনৰ ।
উল্লেখ্য, বৰ্তমান গুৱাহাটী পৌৰ নিগমৰ নিৰ্বাচনৰ পৰিপ্ৰেক্ষিতত ৱাৰ্ডটোলৈ সঘন আহ-যাহ হৈছে প্ৰতিটো ৰাজনৈতিক দলৰ প্ৰাৰ্থী সকলৰ । তেওঁলোকে ঘৰে ঘৰে গৈ নিৰ্বাচনী প্ৰচাৰ চলাই অঞ্চলবাসীৰ সমস্যাৰ বুজ লৈছে ।
ৰাইজেও নিজৰ দুৰ্দশাৰ কথা তেওঁলোকৰ আগত প্ৰকাশ কৰিছে । তেওঁলোকেও সমস্যা সমাধানৰ প্ৰতিশ্ৰুতি দিছে । কিন্তু এই সমস্যাবোৰ সমাধানৰ ক্ষেত্ৰত বিজয়ী প্ৰাৰ্থীসকলেৰে গঠিত হ’বলগীয়া পৌৰ নিগমে আগন্তুক দিনত কেনেধৰণৰ পদক্ষেপ গ্ৰহণ কৰে সেয়াহে হ’ব লক্ষণীয় ।
