পলাতক মূল অভিযুক্ত আলফিক্কৰ আলী আহমেদ ওৰফে জোন খান
বাগসা জিলাৰ শালবাৰী মহকুমাৰ মানাহ ৰাষ্ট্ৰীয় উদ্যানৰ সমীপৰ বাঁহবাৰীত আজি তিনিটাকৈ ভূ-মাফিয়াক গ্ৰেপ্তাৰ কৰা হয় ৷ শালবাৰী মহকুমা আৰক্ষী বিষয়া সমীৰণ বৈশ্যৰ নেতৃত্বত গ্ৰেপ্তাৰ হয় ভূ-মাফিয়া কেইটা ৷ গ্ৰেপ্তাৰ হোৱা তিনি ভূ-মাফিয়া ক্ৰমে মানাহত বনকৰ্মী হিচাপে কৰ্মৰত আলফিক্কৰ আলী আহমেদ ওৰফে জোন খানৰ ভাতৃ জুলফিক্কৰ আলী, মানাহৰ বাঁহবাৰী ৰেঞ্জত বনকৰ্মী হিচাপে কৰ্মৰত বাৰেংগাবাৰী গাঁৱৰ ফণীন্দ্ৰ দাস আৰু মানাহৰ এখন ল’জৰ স্বত্বাধিকাৰী ৰাজীৱ দাস ।
২০২০ৰ নৱেম্বৰত শালবাৰীৰ গোৱৰ্ধনা আৰক্ষী থানাত প্ৰাঞ্জল দাস নামৰ এগৰাকী ব্যক্তিয়ে দাখিল কৰা এখন এজাহাৰৰ ভিত্তিত 82/2020/ US/ 420 IPC নম্বৰত ৰুজু হোৱা গোচৰৰ ভিত্তিত গ্ৰেপ্তাৰ কৰা হয় ভূ-মাফিয়া তিনিজন ৷ ইতিমধ্যে ৰাজীৱ দাসক আৰক্ষীয়ে জেল হাজোতলৈ প্ৰেৰণ কৰাৰ বিপৰীতে জুলফিক্কৰ আলী আহমেদ আৰু ফণীন্দ্ৰ দাসক বাঁহবাৰী আৰক্ষী চকীত ৰাখি অধিক তথ্যৰ বাবে জেৰা অব্যাহত ৰাখিছে ৷ সম্প্ৰতি পলাতক হৈ আছে মূল অভিযুক্ত মানাহৰ বাঁহবাৰী ৰেঞ্জৰ শালবাগান কেম্পত পূৰ্বে বনকৰ্মী হিচাপে নিয়োজিত আৰু বৰ্তমান বাগসাৰ মুছলপুৰ ডিভিজনত বনকৰ্মী হিচাপে কৰ্মৰত সৰভোগৰ আলফিক্কৰ আলী আহমেদ ওৰফে জোন খান ।
উল্লেখ্য যে বনকৰ্মী তথা ভূ-মাফিয়া আলফিক্কৰ আলী আহমেদ ওৰফে জোন খানে মানাহৰ সমীপৰ বাৰেংগাবাৰী গাঁৱৰ বুধু সূত্ৰধৰ নামৰ এগৰাকী লোকৰ পৰা দুই বিঘা ৩০ লেচা মাটি ভুৱা তথ্যৰে জালিয়াতি কৰি আঠ লাখ টকাত ক্ৰয় কৰি পুনৰ এজাহাৰকাৰী প্ৰাঞ্জল দাসৰ নামত প্ৰায় ৩৬ লাখ টকাত ভুৱা এগ্ৰিমেণ্টেৰে বিক্ৰী কৰি আকৌ সেই মাটিডোখৰেই কোকৰাঝাৰৰ গোপাল দাস ওৰফে মানস দাস নামৰ লোক এগৰাকীৰ হাতত প্ৰায় ২০ লাখ টকাত বিক্ৰী কৰিছিল । জোন খানৰ লগত সম্পূর্ণৰূপে দালাল চক্ৰ হিচাপে জড়িত আছিল গ্ৰেপ্তাৰ হোৱা তিনি ভূ-মাফিয়া ক্ৰমে জুলফিক্কৰ আলী আহমেদ, ফণীন্দ্ৰ দাস আৰু ৰাজীৱ দাস ।
মাটিৰ মালিক বুধ সূত্রধৰক আভুৱা ভৰাই ধৃত মাটিৰ দালাল কেইটাই মুঠ তিনিবাৰকৈ বিক্ৰী কৰিছিল মাটিডোখৰ । ধৃত দালাল কেইটাই মাটিডোখৰৰ পৰা দালালি কৰি প্ৰায় ৬৮ লাখ টকা ধন সংগ্ৰহ কৰিছিল বুলি আৰক্ষীয়ে জানিবলৈ দিছে । এইফালে মূল অভিযুক্ত জোন খানক বিচাৰি তদন্ত অব্যাহত ৰাখিছে বুলি শালবাৰী মহকুমাৰ আৰক্ষী বিষয়া সমীৰণ বৈশ্যই জানিব দিয়ে । লগতে মাটিৰ দালালি চক্ৰৰ স’তে আৰু আন কোনোবা যদি জড়িত আছে সম্পূর্ণৰূপে ইয়াক উৎখাত কৰাৰ কথাও উল্লেখ কৰে আৰক্ষী বিষয়াগৰাকীয়ে ৷
ধৃত তিনিওজনৰ বিৰুদ্ধে ইতিমধ্যে শালবাৰী মহকুমা আৰক্ষীয়ে 120(B)/406/409/166/467/468/471 IPC ধাৰাত গোচৰ ৰুজু কৰি তদন্ত অব্যাহত ৰাখিছে ৷ শালবাৰী মহকুমা আৰক্ষী বিষয়া সমীৰণ বৈশ্যই আজি বাঁহবাৰী আৰক্ষী চকীত এই সংক্ৰান্তত সংবাদ মাধ্যম সম্বোধন কৰি কয়, প্ৰাঞ্জল দাস নামৰ এজন ভুক্তভোগীয়ে গোচৰ ৰুজু কৰিছিল মানাহৰ বাঁহবাৰী ৰেঞ্জত কৰ্মৰত জোন খান বিৰুদ্ধে ৷ জোনে মানাহৰ শালবাগান কেম্পত এজন চৰকাৰী বনকৰ্মী হিচাপে কাম কৰিছিল ৷ জোনে মানাহৰ বাৰেঙাবাৰীৰ এজন লোকৰ মাটি বিক্ৰী কৰাৰ নামত ৩৬ লাখ টকা ধন লৈছিল প্ৰাঞ্জল দাসৰ পৰা ৷ এই ক্ষেত্ৰত তেওঁ মিছা, জালিয়াতি আৰু চলাহী কথাৰে মাটি বিক্ৰীৰ এখন চুক্তি কৰিছিল ৷ মানাহৰ বাৰেঙাবাৰীৰ বুধু সূত্ৰধৰৰ দুই বিঘা ৩০ লেচা মাটি ভুৱা তথ্য আৰু জালিয়াতিৰে জোনে আঠ লাখ টকাত ক্ৰয় কৰি সেই মাটিখিনি প্ৰাঞ্জল দাসৰ তাত ৩৬ লাখ টকাত বিক্ৰী কৰাৰ বাবে চুক্তিবদ্ধ হৈ আগধন হিচাপে কিছু ধন লৈ বাকীখিনি চেকযোগে প্ৰাঞ্জল দাসৰ পৰা আদায় কৰিছিল ৷ কিন্তু সেই একেই মাটিখিনি জোনে পুনৰ জালিয়াতিৰে মানাহৰ ল’জৰ স’তে জড়িত কোকৰাঝাৰৰ গোপাল দাস ওৰফে মানস দাস নামৰ আন এজন ব্যক্তিক ২০ লাখ টকাত বিক্ৰী কৰিছিল ৷
আৰক্ষীয়ে এই ক্ষেত্ৰত বেংকৰ ধনৰ আদান-প্ৰদানৰ তথ্যকে ধৰি বিভিন্ন তথ্য সংগ্ৰহ কৰাৰ পাছত জানিব পাৰে যে জালিয়াতিৰে মাটি কিনা-বেচা কৰা সমগ্ৰ প্ৰক্ৰিয়াটোত এটা দালাল চক্ৰ জড়িত হৈ আছে আৰু ইয়াৰে দুজন মানাহ ৰাষ্ট্ৰীয় উদ্যানত কৰ্মৰত ফণীন্দ্ৰ দাস আৰু ৰাজীৱ দাস ৷ ফণীন্দ্ৰ দাস এগৰাকী বনকৰ্মী হোৱাৰ বিপৰীতে ৰাজীৱ দাস মানাহৰ এখন ল’জৰ স্বত্বাধিকাৰী ৷ এই দুগৰাকীয়ে সমস্ত কামখিনি জোন খানৰ স’তে মিলি কৰিছিল ৷ মাটিৰ মূল মালিক বুধু সূত্ৰধৰক এই তিনিওজনে মিলি আভুৱাভাৰি মাটিখিনি তিনিবাৰকৈ বিক্ৰী কৰি প্ৰায় ৬৮ লাখ টকা সংগ্ৰহ কৰিছিল ৷
উল্লেখ্য যে জোন খানে গোপাল দাসক বিক্ৰী কৰা বিতৰ্কিত মাটিখিনিত ইতিমধ্যে এখন ল’জ নিৰ্মাণৰ বাবে অট্টালিকা সাজি যাৱতীয় ব্যৱস্থা সম্পূৰ্ণ কৰি তুলিছে ৷ উল্লেখযোগ্য যে মাটিৰ দালালিৰ স’তে আৰু কেইজনমান লোক জড়িত থকাৰ সন্দেহ ব্যক্ত কৰি এই ক্ষেত্ৰত শালবাৰী আৰক্ষীয়ে ক্ষীপ্ৰ তদন্ত আগবঢ়াই আছে বুলি সদৰী কৰিছে আৰক্ষী বিষয়া সমীৰণ বৈশ্যই ৷