পটিয়ালা গোষ্ঠী সংঘর্ষৰ ঘটনাত মূল অভিযুক্ত বৰজিন্দ্র সিং পৰৱানাক গ্রেপ্তাৰ কৰিলে আৰক্ষীয়ে । দেওবাৰে মোহালিৰ পৰা তেওঁক গ্রেপ্তাৰ কৰা হৈছে । পঞ্জাৱ আৰক্ষীয়ে জনাইছে, বিগত সপ্তাহত হিংসাত্মক ঘটনাৰ অন্যতম মূল চক্রান্তকাৰী হ’ল বৰজিন্দ্র । তিনি দিনৰ মূৰত তেওঁক গ্রেপ্তাৰ কৰা হ’ল । দেওবাৰে তেওঁৰ এক সংগীকো আটক কৰিছে আৰক্ষীয়ে ।
শুকুৰবাৰে খালিস্তান-বিৰোধী সমদলক লৈ দুটা দলৰ মাজত সংঘর্ষ হয় পটিয়ালাত । শিল আৰু তৰোৱাল লৈ হিংসাত্মক পৰিৱেশৰ সৃষ্টি হয় তেওঁলোকৰ মাজত । পৰিস্থিতি নিয়ন্ত্ৰণ কৰিবলৈ শূন্যত গুলি চালনা কৰে আৰক্ষীয়ে । পটিয়ালাসহ এই অঞ্চলত বন্ধ ৰখা হৈছিল ইন্টাৰনেট আৰু এছএমএছ সেৱা ।
এই ঘটনাত কে’বাজনো লোক আহত হয় । হিংসাৰ সৃষ্টি কৰা আৰু আইন-শৃংখলা পৰিস্থিতিৰ অৱনতিৰ দোষত ২৫ জনক চিনাক্ত কৰে আৰক্ষীয়ে । তাৰ পাছৰ পৰা তেওঁলোকৰ সন্ধান চলায় আৰক্ষীয়ে ।
পটিয়ালাৰ নতুন আইজি মুখবিন্দ্র সিং ছিনাই জনায়, দুদিন ধৰি ৰাজ্যৰ বিভিন্ন প্রান্তত অভিযান চলাই অশান্তিত সহায় কৰাসকলক গ্রেপ্তাৰ কৰিছে আৰক্ষীয়ে । দেওবাৰে প্রধান অভিযুক্ত বৰজিন্দ্র ধৰা পৰে । তেওঁক সোধপোচৰ বাবে জিম্মাত ৰখা হৈছে ।
আনহাতে, দেওবাৰে বৰজিন্দ্রৰ স’তে ধৰা পৰিছে হৰিশ শিংলা । যি ‘শিৱসেনা (বাল ঠাকৰে)’ দলৰ কার্যকৰী সভাপতি ।