উচ্চতম ন্যায়ালয়ৰ তদাৰকিত চলা এনআৰচি প্রক্রিয়া দ্রুত শেষ কৰাৰ পৰিৱৰ্তে আৰম্ভণিৰ পৰাই এনআৰচিক লৈ প্রশ্ন উত্থাপন কৰা আৰু প্রক্রিয়া ব্যাহত কৰাত ব্যস্ত বর্তমান এনআৰচি কো-অর্ডিনেটৰ হিতেশ দেৱ শর্মা — শীৰ্ষ ন্যায়ালয়ৰ মুখ্য ন্যায়াধীশ এন ভি ৰমণাক এই অভিযোগ জনাই পত্ৰ প্ৰেৰণ কৰিলে অসমৰ চিএএ-বিৰোধী সমন্বয় মঞ্চই । তেওঁলোকৰ দাবী, এনআৰচিৰ চূড়ান্ত তালিকা প্রমাণ্য বুলিয়ে মানি লৈছিল সকলো মহলে ।
তালিকাচ্যুট ১৯ লক্ষাধিক মানুহৰ নাম বাদ পৰাৰ কাৰণ জনাই ৰিজেকছন লেটাৰ প্ৰেৰণ কৰাৰ কথা আছিল এনআৰচি বিভাগৰ । তাৰ ভিত্তিত জমা হোৱা আবেদনৰ বিচাৰ কৰি তৈয়াৰ আছিল দুই শতাধিক ফৰেনাৰ্চ ট্রিবিউনলো । কিন্তু হিতেশ দেৱ শর্মাই দায়িত্ব গ্ৰহণ কৰাৰ পাছৰ পৰা কোনো কাম আগবঢ়া নাই । বৰঞ্চ তেওঁ বিতর্ক সৃষ্টিত ব্যস্ত । নিজেই তালিকাৰ বৈধতাক লৈ প্রশ্ন তুলি আহিছে । দাবী কৰিছে যে তালিকাত লাখ লাখ বিদেশীৰ নাম সোমাইছে ।
হিতেশ সম্প্রতি আগৰ কো-অর্ডিনেটৰ প্রতীক হাজেলাৰ বিৰুদ্ধে দেশবিৰোধী কামৰ অভিযোগ আনি চিআইডি-ক এফআইআৰ কৰিছে । ইয়াৰ তীব্র নিন্দা কৰি মঞ্চৰ অভিযোগ ৰাজ্যৰ একাংশ পক্ষপাতদুষ্ট দল-সংগঠনে হিতেশক সহায় কৰিছে, ফলত বহু কষ্ট সহ্য কৰি নাগৰিকত্ব প্রমাণ কৰা বৈধ ভাৰতীয়সকল আতংকিত ।
ৰাজ্যৰ চাৰিটা বাম দলৰ যৌথ মঞ্চওয়ো দাবী কৰে এনআৰচিৰ কাম সমাপন নকৰি এনআৰচিৰ চূড়ান্ত তালিকা বাতিল কৰাতেই ব্যস্ত হিতেশ দেৱ শর্মা । বর্তমান কো-অর্ডিনেটৰ বিজেপিৰ ৰাজনৈতিক স্বার্থ চৰিতার্থ কৰিবলৈ কাম কৰিছে । তিনি বছৰ ধৰি এনআৰচি দপ্তৰ চলাবলৈ ৰাজকোষৰ ধন অযথা ব্যয় হৈছে ।
চিপিএমৰ মতে, সামাজিক মাধ্যমত এনআৰচি প্রক্রিয়াক গালি-গালাজ কৰি থকা এজনক সমন্বয় ৰক্ষাকাৰীৰ দায়িত্ব দি বিজেপি-য়ে কাৰ্য সিদ্ধি কৰিছে । কিন্তু এনআৰচি প্রক্রিয়া স্থগিত হৈ থকাত ২৭ লাখ লোকৰ আধাৰ কার্ড আৰু অন্যান্য চৰকাৰী সুযোগ-সুবিধা বন্ধ হৈ আছে ।