প্রথমে সমগ্ৰ বিশ্বক ভাৰতে খাদ্য যোগান ধৰিব বুলি প্রধানমন্ত্রী নৰেন্দ্র মোদীয়ে ঘোষণা কৰাৰ পাছত তেওঁৰ চৰকাৰে গম ৰপ্তানি বন্ধ কৰি দিলে । এইবাৰ ভাৰতৰ পৰা বিপুল পৰিমাণে চেনি ৰপ্তানি হৈছে বুলি প্রচাৰৰ কিছুদিন পাছতে কেন্দ্রই চেনিৰ ৰপ্তানিতো বাধা আৰোপ কৰিলে ।
কেন্দ্রীয় বাণিজ্য মন্ত্রণালয়ৰ এই সিদ্ধান্তৰ পাছত মোদী চৰকাৰৰ খাদ্যপণ্য ৰপ্তানি নীতিক লৈ প্রশ্ন উত্থাপিত হৈছে । প্রশ্ন উত্থাপন হৈছে, প্রথমে ৰপ্তানিত অনুমোদন দি তাৰ পাছত বাধা দিয়াৰ ফলত কৃষকৰ পৰা ৰপ্তানিকাৰী — সকলোৱে ক্ষতিগ্রস্ত হোৱা নাই নে ?
গম ৰপ্তানি বন্ধ কৰাৰ ক্ষেত্ৰত চৰকাৰৰ মূল শংকা আছিল, দেশৰ বজাৰত গমৰ দাম বাঢ়ি যাব । চেনিৰ ৰপ্তানিত বাধা দিয়াৰ ক্ষেত্ৰতো একেই শংকা কৰা হৈছে বুলি চৰকাৰে মত প্ৰকাশ কৰিছে । আজি কেন্দ্রীয় খাদ্য মন্ত্রণালয়ে জনাইছে, দেশৰ বজাৰত চেনিথ যথেষ্ট যোগান আৰু দাম নিয়ন্ত্ৰণত ৰখাতে কেন্দ্রীয় চৰকাৰৰ প্রধান অগ্রাধিকাৰ । অক্টোবৰ-নৱেম্বৰত উৎসৱৰ বতৰত বজাৰত যাতে চেনিৰ যোগান ব্যাহত নহয়, সেয়া নিশ্চিত কৰিব বিচাৰে চৰকাৰে ।
বিগত এবছৰ ধৰি চেনিৰ দাম নিয়ন্ত্রণত আছে । চেনিৰ দাম ৩৬ৰ পৰা ৪৪ টকাৰ ভিতৰতে আছে । কিন্তু ব্রাজিলত কম উৎপাদনৰ ফলত বিশ্ব বজাৰত চেনিৰ যোগান কমিব পাৰে । বৃদ্ধি পাব পাৰে দাম । তাৰ প্ৰভাৱ যাতে দেশৰ বজাৰচ নপৰে, তাৰ বাবে এক জুনৰ পৰা ১০০ লাখ টন চেনি ৰপ্তানিৰ ঊর্ধ্বসীমা বান্ধি দিয়া হৈছে ।
ৰাছিয়া-ইউক্রেইনৰ যুদ্ধৰ ফলত বিশ্ব বজাৰত গমৰ অভাৱ সত্ত্বেও ভাৰতে হঠাৎ গম ৰপ্তানি বন্ধ কৰি দিয়াৰ বাবে আন্তর্জাতিক মহল ভাৰতৰ ওপৰত ক্ষুব্ধ । গম ৰপ্তানি আৰম্ভ কৰিবৰ বাবে ভাৰতৰ ওপৰত চাপ দিছে । কিন্তু ৰেচনত গমৰ পৰিৱৰ্তে চাউল দিয়া হৈছে বুলি উত্তৰ প্রদেশ, পশ্চিমবংগৰ দৰে ৰাজ্যত ক্ষোভ সৃষ্টি হৈছে ।
আজি বাণিজ্য আৰু খাদ্যমন্ত্রী পীযূষ গয়ালে জনাইছে, যিসমূহ দেশত খাদ্যৰ আকাল, সেইসমূহ মিত্র-ৰাষ্ট্র আৰু য’ত ভাৰতে ঋণ দিছে, তাত ভাৰতে গম ৰপ্তানি কৰিব । কিন্তু চলিত বৰ্ষত গমৰ উৎপাদন ৭-৮ শতাংশ অধিক হ’লেও তাপপ্রবাহৰ ফলত বতৰৰ আৰম্ভণিতে গম নষ্ট হৈছে । ফলত উৎপাদিত গমেৰে দেশৰ চাহিদাই পূৰণ কৰিব পৰা যাব ।