গোসাইগাঁও মহকুমাৰ তুলসীবিল আৰক্ষী চকীৰ অন্তৰ্গত এক নম্বৰ ফুলকুমাৰি গাঁৱত কালি সন্ধিয়া দলঙৰ পৰা টিপকাই নদীত পৰি এগৰাকী যুৱক সন্ধানহীন হৈ আছে ৷ যুৱকজন কোকৰাঝাৰ জিলাৰ টিপকাই আৰক্ষী চকীৰ অন্তৰ্গত মংলাঝোৰাৰ আক্সিঝোৰা গাঁৱৰ নিবাসী সুনিৰাম হাছদা(২৭) বুলি জানিব পৰা গৈছে ৷
প্ৰাপ্ত বাতৰি অনুসৰি, যুৱকজনে আন এগৰাকী সতিৰ্থৰ স’তে মংলাঝোৰাৰ পৰা ভোগঝোৰা গাঁৱলৈ আহোঁতে ফুলকুমাৰি গাঁৱত জৰাজিৰ্ণ দলঙৰ পৰা পৰি সন্ধানহীন হৈ পৰে ৷ খবৰ পাই তুলসীবিল আৰক্ষী চকীৰ এটি দলে এছ ডি আৰ এফৰ সহায়ত নিশা প্ৰায় ১২ বজালৈ সন্ধান চলায় যদিও কোনো শুংসূত্ৰ পোৱা নাই ৷ আজি পুৱাৰ পৰা এছ ডি আৰ এফৰ দলে তালাচী অভিযান চলাইছে যদিও কোনো শুংসূত্ৰ পোৱা নাই বুলি জানিব পৰা গৈছে ৷
উল্লেখ্য যে দীৰ্ঘদিনৰ পৰা দলংখন মাৰণফান্দত পৰিণত হৈ আছে যদিও চৰকাৰে কোনো ব্যৱস্থা নোলোৱাৰ বাবেই এনে ঘটনা সংঘটিত হৈছে বুলি গাঁওৱাসীয়ে অভিযোগ উত্থাপন কৰিছে ৷
