অসমত এইবাৰৰ সংহাৰী বানত ৩২ খন জিলাত ৫০ লক্ষতকৈও অধিক লোক ক্ষতিগ্ৰস্ত হৈছে ৷ এতিয়ালৈকে লাভ কৰা তথ্য অনুসৰি ৰাজ্যখনৰ ১৪৬টা ৰাজহ চক্ৰৰ ৯০০২ খন গাঁও বানপানীয়ে বুৰাই পেলাইছে ৷ ক্ষতিগ্ৰস্ত এলেকাত ৩৩১৭টা আশ্ৰয় শিবিৰ মুকলি কৰা হয় ৷
তথ্য অনুসৰি এতিয়ালৈকে বানপানীত ১৩৫ জন লোক মৃত্যু মুখত পৰে ৷ ৭৭৫৫টা পশুধনৰ মৃত্যুৰ লগতে ১৬১৬৮টা বাসগৃহও ক্ষতিগ্ৰস্ত হয় ৷ প্ৰলয়নকাৰী বানপানীত ৩৪৯টা পথৰ ক্ষতি হয় ৷ ইয়াৰে সৰ্বাধিক ক্ষতি হৈছে বৰপেটা, দৰং, নলবাৰী আৰু নগাঁও জিলাত ৷ দৰং আৰু নলবাৰী জিলাত সৰ্বাধিক ৬৯টা পথৰ ক্ষতি হোৱাৰ লগতে বৰপেটাত ৫৩টা আৰু নগাঁৱত ৫১টা পথৰ ক্ষতি হয় ৷ কে’বালক্ষ হেক্টৰ শস্য ভূমিৰ লগতে প্ৰায় ২০০ কোটিতকৈ অধিক মূল্যৰ মাছ ব্যক্তিগত পুখুৰীৰ পৰা ওলাই যায় ৷ ফলত শ-শ মৎস্য পালকে মূৰে-কপালে হাত দিবলগীয়া হৈছে ৷
ৰাজ্যখনৰ ব্ৰহ্মপুত্ৰ আৰু বৰাক উপত্যকাত বানপানী আৰু প্ৰাকৃতিক দুৰ্যোগৰ এই প্ৰলয়নকাৰী ধ্বংসলীলাৰ পাছতো কেন্দ্ৰীয় চৰকাৰৰ নিৰ্লিপ্ত ভূমিকাই অসমবাসীক ক্ষুদ্ধ আৰু ক্ষুন্ন কৰি তুলিছে ৷ নিৰ্বাচনৰ সময়ত বানমুক্ত অসমৰ শ্ল’গান দিয়া কেন্দ্ৰ আৰু ৰাজ্যৰ বিজেপিৰ ‘ডাবল ইঞ্জিন’ চৰকাৰে এই দুৰ্যোগৰ সময়ত জনসাধাৰণক সকাহ দিয়াত দৃষ্টিকটুভাৱে ব্যৰ্থ হৈছে ৷ ক্ষতিগ্ৰস্তক নামমাত্ৰা সাহায্য দিয়েই চৰকাৰে দায়িত্ব সামৰিছে ৷ আশ্ৰয় শিবিৰত থকা বানাক্ৰান্তই হা-হুমুনিয়াহৰে জীৱন নিৰ্বাহ কৰিবলগীয়া হৈছে ৷
আনকি নিৰ্বাচনৰ সময়ত ‘এ-ফৰ-আসাম’, ‘ঈশানকোণ’, ‘অষ্টলক্ষ্মী’ আদি বিশেষণেৰে অসমক বিভূষিত কৰা প্ৰধানমন্ত্ৰী ডাঙৰীয়াই মুখ্যমন্ত্ৰীক ফোন বা এটা টুইট কৰিয়েই দায়িত্ব সামৰিছে ৷ নিজেই চাবলৈ অহাটো দূৰৰে কথা, কোনো এজন কেন্দ্ৰীয় মন্ত্ৰী বা কেন্দ্ৰীয় প্ৰতিনিধি দল এটাকো অসমলৈ প্ৰেৰণ নকৰিলে ৷ এই ক্ষেত্ৰত কেন্দ্ৰক সৈমান কৰাত অসমৰ মুখ্যমন্ত্ৰী ডাঙৰীয়াও দুখলগাকৈ ব্যৰ্থ হোৱা দেখা গৈছে ৷
এতিয়ালৈকে আনকি কেন্দ্ৰই কোনো সাহায্য পুঁজিও মোকলাই নিদিলে ৷ কেন্দ্ৰীয় চৰকাৰৰ ভূমিকাত হতাশ হোৱা মুখ্যমন্ত্ৰী ডাঙৰীয়াই উপায় নাপাই লজ্জা ঢাকিবৰ কাৰেণেই হওক বা ৰাইজৰ ক্ষোভ মৰিষণ কৰিবলৈ হওক কেন্দ্ৰীয় পুঁজি নালাগে বুলিও মন্তব্য দিবলৈ বাধ্য হৈছিল ৷ কেন্দ্ৰৰ এনেকুৱা ভূমিকা ৰাজ্যখনৰ বান ক্ষতিগ্ৰস্ত লোকৰ প্ৰতি এক চৰম উপহাস ৷
বানমুক্ত অসমৰ শ্ল’গান দিয়া বিজেপি চৰকাৰে অসমক বানসাহায্য প্ৰদান কৰাত বিগত বৰ্ষ কেইটাত চৰম প্ৰতাৰণা আৰু হেমাহিৰ আশ্ৰয় লৈছে ৷ ২০১৭ত জুলাই মাহতো ৰাজ্যখনত প্ৰবল বানপানী হৈছিল ৷ সেইবাৰো ২৬ খন জিলাৰ ৮১টা ৰাজহ চক্ৰৰ ২৪৫০ খন গাঁও বানত আক্ৰান্ত হৈছিল ৷ ১১৯ জন ব্যক্তি মৃত্যুমুখত পৰিছিল ৷ বানপানী শামকটাৰ লগে লগে সেইবছৰৰে আগষ্ট মাহত প্ৰধানমন্ত্ৰী মোদী ডাঙৰীয়া অসমলৈকে আহি খানাপাৰাস্থিত প্ৰশাসনিক মহাবিদ্যালয়ত বান পৰ্যালোচনা সভাত অংশ লৈছিল ৷ এই সভাত উত্তৰ-পূবৰ মুখ্যমন্ত্ৰীসকলৰ লগতে কে’বাগৰাকী কেন্দ্ৰীয় মন্ত্ৰী আৰু কেন্দ্ৰ-ৰাজ্যৰ আমোলাসকলৰ উপস্থিতিত প্ৰধানমন্ত্ৰী ডাঙৰীয়াই কে’বাটাও ঘোষণা কৰিছিল ৷ ইয়াৰ ভিতৰত ব্ৰহ্মপুত্ৰৰ খহনীয়া নিয়ন্ত্ৰণৰ বাবে প্ৰায় তিনি হেজাৰ কোটিটকীয়া পেকেজ আৰু ব্ৰহ্মপুত্ৰ অধ্যয়নৰ বাবে ১০০ কোটি টকা মুকলি কৰি দিয়া হ’ব বুলি প্ৰতিশ্ৰুতি দিছিল ৷ কিন্তু এই ঘোষিত ধন আজিলৈকে ৰাজ্যখনে নাপালে ৷
তাৰোপৰি বিগত বছৰ কেইটাত অসমক ৰাষ্ট্ৰীয় দুৰ্যোগ প্ৰশমন পুঁজি (NDRF)ৰ ধনো মুকলি কৰি দিয়া নাই ৷ সংসদত দাখিল কৰা তথ্য অনুসৰিয়েই ২০১৮-১৯, ২০১৯-২০ আৰু ২০২০-২১ বৰ্ষৰ ভিতৰত মাত্ৰ ২০২০-২১ বৰ্ষতহে অসমক কেন্দ্ৰই অতি নগণ্য পৰিমাণৰ ৪৪.৩৭ কোটি ধন NDRF-ৰ পুঁজিৰ পৰা মোকলাই দিয়ে ৷ অথচ ২০২০-২১ বৰ্ষত অসমে কেন্দ্ৰৰ পৰা ২৬৪২.৯৯ কোটি টকা বিচাৰিছিল ৷ তেনেকৈ ২০২১-২২ বৰ্ষতো অসমে বিচৰা ১০১৮.১৫ কোটি টকাৰ বিপৰীতে মাত্ৰ ৫১.৫৩ কোটি টকা NDRFৰ শিতানৰ পৰা মোকলাই দিয়ে ৷ এয়াই প্ৰমাণ কৰে ডাবল ইঞ্জিন চৰকাৰৰ অসমৰ প্ৰতি থকা দায়িত্বহীনতা৷ অথচ একেটা বৰ্ষতে কেন্দ্ৰই গুজৰাটক ১০০০ কোটি, মধ্য প্ৰদেশক ৬০০.৫০ কোটি, কৰ্ণাটকক ৯৯৬.৪৫ কোটি আৰু বিহাৰক ১০৩৮.৯৬ কোটি টকা NDRF শিতানৰ পৰা মোকলাই দিছিল ৷
অসমৰ প্ৰলয়নকাৰী বানপানী আৰু এই প্ৰাকৃতিক দুৰ্যোগৰ সময়তো কেন্দ্ৰৰ বিজেপি চৰকাৰে ৰাজ্যখনৰ প্ৰতি কৰা এই অন্যায় আৰু প্ৰৱঞ্চনাক আমি অসম তৃণমূল কংগ্ৰেছে তীব্ৰ গৰিহণা আৰু ধিক্কাৰ দিছো ৷ অতি শীঘ্ৰে অসমৰ বানাক্ৰান্ত ৰাইজক সকাহ দিয়াৰ উদ্দেশ্যে পৰ্যাপ্ত পুঁজি মুকলি কৰাৰ লগতে প্ৰধানমন্ত্ৰী-গৃহমন্ত্ৰী ডাঙৰীয়াক অসমৰ এই দুৰ্যোগ চাই যাবলৈ দাবী জনালো ৷
অসমৰ বান পৰিস্থিতিক লৈ অসম তৃণমূল কংগ্ৰেছৰ চৰকাৰৰ ওচৰত দাবী
(১) বানপানীত মৃত্যু হোৱা লোকৰ পৰিয়ালক শীঘ্ৰে ক্ষতিপূৰণ দিয়াৰ ব্যৱস্থা কৰক ৷
(২) বান পৰিস্থিতি শাম কটাৰ পৰা কমেও এমাহলৈকে ক্ষতিগ্ৰস্ত ৰাইজক খাদ্য-সামগ্ৰীৰ সাহায্যৰ লগতে পশুধনকো খাদ্যৰ যোগান ধৰক ।
(৩) বানপানীত ক্ষতি হোৱা ঘৰ-দুৱাৰ, পশুধন, শস্য আদিৰ জৰীপ কৰি সোনকালে ক্ষতিপূৰণ দিয়াৰ ব্যৱস্থা কৰক ৷
(৪) বানাক্ৰান্ত ৰাইজক বিনামূলীয়া স্বাস্থ্য সেৱাৰ ব্যৱস্থা কৰক ৷