হিজাব বিতর্ক সম্পর্কিত এটা জনস্বার্থ গোচৰৰ জৰুৰী ভিত্তিত শুনানিৰ আবেদন বৃহস্পতিবাৰে প্ৰত্যাহাৰ কৰিলে উচ্চতম ন্যায়ালয়ে । শিক্ষাপ্রতিষ্ঠানৰ শিক্ষাৰ্থী আৰু শিক্ষক আৰু অন্যান্য কর্মচাৰীসকলৰ বাবে নির্দিষ্ট পোছাকবিধি আৰম্ভ কৰাৰ দাবীত এই জনস্বার্থ গোচৰটো দাখিল কৰা হৈছে । আবেদনকাৰী পক্ষৰ তৰফৰ পৰা গোচৰটো জৰুৰী ভিত্তিত শুনানিৰ বাবে প্রধান ন্যায়াধীশ এন ভি ৰমণাৰ নেতৃত্বাধীন বেঞ্চক আবেদন জনোৱা হৈছিল । কিন্তু অধিবক্তা অশ্বিনীয়ে সেই আবেদন বৃহস্পতিবাৰে শীর্ষ আদালতত খাৰিজ কৰিছে ।
বিগত ফেব্রুৱাৰীত কর্নাটকৰ উদুপিৰ এখন মহাবিদ্যালয়ত হিজাব পৰিহিত শিক্ষাৰ্থীসকলক ক্লাছ কৰিবলৈ নিদিয়াৰ অভিযোগক লৈ তোলপাৰ লাগিছিল ৰাষ্ট্ৰীয় ৰাজনীতিত । কর্নাটকৰ সীমা পাৰ হৈ হিজাব বিতর্ক আৰম্ভ হৈছিল মধ্যপ্রদেশ, উত্তৰ প্রদেশ আৰু পুদুচেৰিতো । হিজাব নিষেধাজ্ঞাৰ পক্ষে-বিপক্ষে একাধিক গোচৰ দাখিল হয় আদালতত । তাৰ পৰিপ্রেক্ষিতত কর্নাটক উচ্চ ন্যায়ালয়ে পর্যবেক্ষণত জনায়, ইছলামৰ ধর্মীয় ৰীতি মানি হিজাব পৰিধান কৰা মুছলিম মহিলাসকলৰ বাবে অপৰিহার্য নহয় আৰু সেয়া ধর্মীয় অনুশীলনৰ স্বাধীনতা সংক্রান্ত মৌলিক অধিকাৰতো নপৰে । গোচৰৰ নিষ্পত্তি নোহোৱা পর্যন্ত শিক্ষা প্রতিষ্ঠানত ‘ধর্মীয় পোছাক’ পৰিধান কৰিব নোৱাৰিব বুলিও ‘অন্তর্বর্তী নির্দেশ’ত জনায় কর্নাটক উচ্চ ন্যায়ালয়ে ।
আদালতৰ সেই পর্যবেক্ষণ আৰু নির্দেশনাক প্ৰত্যাহ্বান জনাই শীর্ষ আদালতৰ দ্বারস্থ হয় কেইগৰাকীমান মুছলিম ছাত্রী । গোচৰকাৰীসকলে প্রশ্ন উত্থাপন কৰে, অন্যৰ ক্ষতি নকৰাকৈ কোনো শিক্ষাৰ্থীয়ে হিজাব পৰিধান কৰিলে ৰাষ্ট্রই হস্তক্ষেপ কৰিব নোৱাৰে । সেই শিক্ষাৰ্থীয়ে হিজাব পৰিধান কৰাক তেওঁৰ ধর্মীয় অনুশীলনৰ অংশ বুলি ভাবে, তাতেই বা সমস্যা ক’ত ? প্রতিষ্ঠানে বান্ধি দিয়া পোছাকবিধিৰ বাবে এগৰাকী নাৰীৰ মর্যাদা আৰু শিক্ষাৰ অধিকাৰ ক্ষতিগ্রস্ত হ’ব পাৰে নেকি, সেই প্রশ্নও উত্থাপন কৰিলে গোচৰকাৰী শিক্ষাৰ্থীসকলে । সেই গোচৰটোও মুখ্য ন্যায়াধীশ ৰমণ বেঞ্চত বিচাৰাধীন । মুছলিম পক্ষৰ তৰফৰ পৰা এই গোচৰৰ জৰুৰী ভিত্তিক শুনানিৰ আবেদন জনোৱা হৈছিল যদিও যোৱা ফেব্রুৱাৰীত মুখ্য ন্যায়াধীশৰ বেঞ্চে সেয়া খাৰিজ কৰি দিছিল ।
