বৰপেটা জিলাৰ বাঘবৰ সমষ্টিৰ আলোপতি চৰ আৰক্ষী থানাৰ অন্তৰ্গত কালাইৰদিয়া গাঁৱত এগৰাকী মৎস্য পালকৰ পুখুৰীত বিষ দি প্ৰায় লক্ষ্যাধিক টকাৰ মাছ নিধন কৰা ঘটনাই বৃহত্তৰ অঞ্চলটোত তীব্ৰ চাঞ্চল্যৰ সৃষ্টি কৰিছে ।
জানিব পৰা মতে, গাঁওখনৰ মৎস্য পালক জব্বেৰ আলীৰ বৃহৎ পুখুৰীত অচিনাকী দুৰ্বৃত্তই বিষাক্ত দ্ৰব্য তথা বিষ ঢালি দিয়াৰ বাবে অস্বাভাৱিক হাৰত মৃত্যু হৈছে শতাধিক মাছৰ । যোৱা এসপ্তাহ ধৰি পুখুৰীত আৰম্ভ হৈছে মাছৰ নিধন প্ৰক্ৰিয়া । প্ৰতিদিনে পুখুৰীটোত উপঙি থকা দেখা যায় শ শ সৰু-বৰ মাছ । দুৰ্বৃত্তৰ এনে কাণ্ডৰ বাবেই পুখুৰীত দোমে দোমে মৰিছে বৃহৎ পৰিমাণৰ মাছ ।
দীৰ্ঘদিন ধৰি মৎস্য পালনত জড়িত লোকজনৰ পুখুৰীত বিষ দি লক্ষাধিক টকাৰ মাছ নিধন হোৱাত মূৰে-কপালে হাত দিছে ব্যক্তিগৰাকীয়ে । মৃত্যু হোৱা মাছৰ ভিতৰত ৰৌ, চান্দা, বাটা, মিৰিকা, ছিলভাৰ আদি প্ৰজাতিৰ মাছ আছে । ইফালে, মাছৰ অস্বাভাৱিক মৃত্যুৰ পাছতে দুৰ্গন্ধই ছানি ধৰিছে অঞ্চলটো ।