বিশ্ব ঐতিহ্যক্ষেত্ৰ মানাহ ৰাষ্ট্ৰীয় উদ্যানত পুনৰ জন্মলাভ কৰিলে এটি গঁড়ৰ পোৱালিয়ে ৷ কিছুদিন পূৰ্বে ৰাষ্ট্ৰীয় উদ্যানখনৰ বাঁহবাৰী ৰেঞ্জৰ এটা অঞ্চলত বনকৰ্মীয়ে মাকৰ স’তে সদ্যজাত গঁড় পোৱালিটো প্ৰত্যক্ষ কৰা বুলি জনাইছে বাঁহবাৰীৰ ৰেঞ্জৰ বন বিষয়া বাবুল ব্ৰহ্মই ৷
অৱশ্যে নতুনকৈ জন্মলাভ কৰা পোৱালিটো মতা নে মাইকী সেই বিষয়ে এতিয়াও নিশ্চিত হ’ব পৰা নাই মানাহ কৰ্তৃপক্ষ ৷
উল্লেখ্য যে সদ্যোজাত পোৱালিটোৰ স’তে মানাহত ৫১টালৈ বৃদ্ধি পালে গঁড়ৰ সংখ্যা ৷ বন বিষয়া বাবুল ব্ৰহ্মই জনোৱা মতে, ৰাষ্ট্ৰীয় উদ্যানখনত প্ৰজননক্ষম বহুকেইটা মাইকী গঁড় বন বিভাগৰ নিৰীক্ষণত আছে, আৰু গঁড়ৰ সংখ্যাও নিকট ভৱিষ্যতে আৰু বেছি বৃদ্ধি পাব ৷