সম্প্ৰতি ৰাজ্যত মাদ্ৰাছা উচ্ছেদৰ ঘটনাক লৈ তীব্ৰ প্ৰতিক্ৰিয়া চলি আছে । বিভিন্ন দল-সংগঠনে চৰকাৰৰ এই কাৰ্যক বিৰোধিতা কৰি থকাৰ মাজতে পুনৰ অসম আৰক্ষীৰ সঞ্চালক প্ৰধান ভাস্কৰ জ্যোতি মহন্তই কেতবোৰ নীতি-নিৰ্দেশনা দাঙি ধৰিলে মাদ্ৰাছা পৰিচালনা কৰা ইছলামিক সংগঠনৰ প্ৰতিনিধিলৈ । আজি আৰক্ষী সঞ্চালক প্ৰধানগৰাকীয়ে কে’বাটাও ইছলামিক সংগঠনৰ প্ৰতিনিধি বৰ্গৰ স’তে এক বৈঠকত মিলিত হয় ।
অসমত জেহাদীৰ উপস্থিতি আৰু মাদ্ৰাছা উচ্ছেদক লৈ অনুষ্ঠিত হোৱা এই বৈঠকত সঞ্চালক প্ৰধানগৰাকীয়ে মাদ্ৰাছা পৰিচালনা কৰা সংগঠনসমূহক ৰাজ্যৰ সুৰক্ষাৰ স্বাৰ্থত কেতবোৰ নিৰ্দেশনা মানি চলিব লাগিব বুলি উল্লেখ কৰে । বিশেষকৈ মাদ্ৰাছা সম্পৰ্কে চৰকাৰে প্ৰস্তুত কৰা প’ৰ্টেলত মাদ্ৰাছা পৰিচালনা কৰা সংগঠনে মাদ্ৰাছাৰ সকলো তথ্য দাখিল কৰিব লাগিব ।
শিক্ষকৰ দৰমহা ক’ৰ পৰা আহে, শিক্ষকজন কোন এই সকলো তথ্য প’ৰ্টেলত সন্নিবিষ্ট কৰিব লাগিব । ইয়াৰ লগতে মাদ্ৰাছাত ধৰ্মীয় শিক্ষাৰ বাহিৰেও বিজ্ঞান, গণিত, কম্পিউটাৰ, ভূগোল আদিৰো শিক্ষা প্ৰদান কৰিব লাগিব বুলি উল্লেখ কৰে । বিশেষকৈ ব্যক্তিগত মাদ্ৰাছা চলাই থকা সংগঠনসমূহে কেৱল সমিতি গঠন কৰিলেই নহ’ব, তাৰ দায়িত্বও পালন কৰিব লাগিব বুলি স্পষ্ট কৰি দিয়ে । অৱশ্যে সঞ্চালক প্ৰধানগৰাকীয়ে অসমত মুছলমানসকলৰ সহযোগিতাৰ বাবেই অল-কায়দাৰ দৰে জেহাদীক প্ৰতিৰোধ কৰিব পৰা গ’ল বুলি মন্তব্য কৰে ।
উল্লেখযোগ্য যে, আজিৰ বৈঠকত লোৱা সিদ্ধান্তসমূহ ইছলামিক সংগঠনৰ প্ৰতিনিধিবৰ্গই মানি লোৱা বুলি জানিব পৰা গৈছে ।
