অত্যাৱশ্যকীয় সামগ্ৰীৰ মূল্যবৃদ্ধি, বৰ্ধিত নিবনুৱা সমস্যা, জিএছটি আদি প্ৰসংগৰ আঁত ধৰি আজি দিল্লীৰ ৰামলীলা ময়দানত কংগ্ৰেছৰ এক বিশাল জনসভা অনুষ্ঠিত হয় । “মেহেঙ্গাই পৰ হাল্লা ব’ল” শীৰ্ষক ৰেলীৰে আৰম্ভ হোৱা এই প্ৰতিবাদী কাৰ্যসূচীত কংগ্ৰেছ নেতা ৰাহুল গান্ধীয়ে বিজেপি চৰকাৰক তীব্ৰ সমালোচনা কৰি প্ৰধানমন্ত্ৰীক পোনপটীয়াকৈ “মই আপোনাৰ ইডিক ভয় নকৰো” বুলি হুংকাৰ দিয়ে ।
ইয়াৰ লগতে অত্যাৱশ্যকীয় সামগ্ৰীৰ মূল্যবৃদ্ধি, দৈনিক বৃদ্ধি হোৱা নিবনুৱা সমস্যা, জিএছটি বৃদ্ধি আদি প্ৰসংগেৰে বিজেপি ব্যৰ্থতাক চৰম সমালোচনা কৰে ।
উল্লেখযোগ্য যে, আজি এই সভাতে যুৱ নেতাজনে সংবাদ মাধ্যম আৰু দুজন নিৰ্দিষ্ট উদ্যোগপতিৰ সমৰ্থন অবিহনে মোডী প্ৰধানমন্ত্ৰী হ’ব নোৱাৰে বুলিও কটাক্ষ কৰে । পৰৱৰ্তী লোকসভা নিৰ্বাচনত সকলো বিৰোধী দল একত্ৰিত হৈ বিজেপি-আৰ এছ এছক পৰাজিত কৰিব বুলি হুংকাৰ প্ৰদান কৰে ।
দেশৰ এনে সংকটৰ সময়ত কেৱল কংগ্ৰেছ দলেহে দেশক উদ্ধাৰ কৰিব পাৰে বুলি মন্তব্য কৰে । ইফালে হেজাৰ-হেজাৰ কংগ্ৰেছকৰ্মী সমবেত হোৱা এই বিশাল জনসভাত কংগ্ৰেছৰ জ্যেষ্ঠ নেত্ৰী ছোনিয়া গান্ধী আৰু প্ৰিয়ংকা গান্ধী উপস্থিত নাছিল । বিশেষ সূত্ৰই প্ৰকাশ কৰা মতে, সম্প্ৰতি দুয়ো দেশৰ বাহিৰত আছে ।
