Rishi Sunak Wife :
স্বামী ব্রিটেইনৰ প্রধানমন্ত্রী । ইনফ’ছিছৰ সহ-প্রতিষ্ঠাপক নাৰায়ণ মূর্তি আৰু প্ৰধান সুধা মূর্তিৰ কন্যা অক্ষতা । বহু ক্ষেত্রত তেওঁ স্বামী ঋষি ছুনককো প্ৰত্যাহ্বান দিব পাৰে অনায়াসে ।
ব্রিটেইনৰ ‘ফাৰ্ষ্ট লেডি’ অক্ষতা মূর্তি বেংগালুৰুৰ বাসিন্দা । কেলিফ’র্নিয়াৰ ক্লেৰমন্ট মেককেনা কলেজৰ পৰা অর্থনীতি আৰু ফৰাচী বিষয়ত স্নাতক অক্ষতা । লছ এঞ্জেলেছৰ ফেছন ইনষ্টিটিউট অৱ ডিজাইন এণ্ড মার্চেণ্ডাইজিঙৰ পৰা ডিজাইনিঙত ডিপ্লমা কৰে তেওঁ । ইয়াৰ পাছত তেওঁ ষ্টেনফ’র্ডত এমবিএ কৰিবলৈ যায়, য’ত তেওঁ ঋষি ছুনকক লগ পায় ।
ব্রিটেইনত পুৰুষৰ পোছাকৰ এটা ফেছন লেবেলৰ মালিক অক্ষতা । ২০১১ত প্রথম পোছাকশিল্পীৰূপে আত্মপ্রকাশ হয় তেওঁৰ । তেওঁ ডেলয়েট আৰু ইউনিলিভাৰতো কিছু সময়ৰ বাবে কাম কৰিছিল ।
ইনফ’ছিছতো শ্বেয়াৰ আছে তেওঁৰ । ছেপ্টেম্বৰৰ শেষত পোৱা নথি অনুযায়ী, ইনফ’ছিছৰ ০.৯৩ শতাংশ শ্বেয়াৰ আছে অক্ষতাৰ হাতত । ২৫ অক্টোবৰৰ বজাৰদৰ অনুযায়ী, তেওঁৰ মালিকানাধীন শ্বেয়াৰৰ মূল্য পাঁচ হেজাৰ ৯৫৬ কোটি টকা ।
প্রধানমন্ত্রী হোৱাৰ দৌৰত ঋষি ছুনকৰ নাম উত্থাপন হোৱাৰ পাছৰ পৰা তেওঁৰ সম্পত্তি, আয়কৰক লৈ তদন্তৰ আওতাত আহে অক্ষতা । যিসকল ব্যক্তি ব্রিটেইনৰ বাহিৰৰ বাসিন্দা, কিন্তু জীৱিকা সূত্রে ব্রিটেইনত আছে, তেওঁলোকে সেই দেশৰ চৰকাৰক এটা বিশেষ কৰ দিব লাগে । ‘প্রভাৱ’ বিস্তাৰ কৰি সেই কৰ ফাঁকিৰ অভিযোগ উঠে অক্ষতাৰ বিৰুদ্ধে ।
যদিও ছুনক এজন ব্রিটিছ নাগৰিক, অক্ষতা ভাৰতীয় নাগৰিকৰ । ব্রিটেইনৰ আইন অনুযায়ী, ব্রিটেইনৰ যিসকল বাসিন্দাৰ সেই দেশৰ বাহিৰত কোনো স্থায়ী বাসগৃহ আছে, তেওঁলোকে বিদেশৰ পৰা যি আয় কৰে তাৰ ওপৰত ইউকে চৰকাৰক কোনো ধৰণৰ কৰ দিব নালাগে । সেয়ে অক্ষতাই ভাৰতৰ পৰা যি আয় কৰে, তাৰ ওপৰত কোনো ধৰণৰ কৰ ব্রিটেইন চৰকাৰক দিব নালাগে । আগন্তুক ১৫ বছৰ পৰ্যন্ত এই নিয়ম জাৰি থাকিব ।
প্ৰাপ্ত তথ্য অনুসৰি, ভাৰতীয় নাগৰিক হোৱাৰ বাবে তেওঁ মুঠ ২০ মিলিয়ন পাউণ্ড (ভাৰতীয় মুদ্রাত প্রায় ১৮৯ কোটি টকা) কৰ দিয়াৰ পৰা ৰেহাই পাইছে । ২০২২ত তেওঁ ইনফ’ছিছ শ্বেয়াৰৰ পৰা ১৫.৩ মিলিয়ন ডলাৰ (ভাৰতীয় মুদ্রাত প্রায় ১২৬ কোটি টকা) আয় কৰে ।
কৰ ফাঁকি দিয়াৰ বিষয়ত অক্ষতাৰ মুখপাত্রই সংবাদমাধ্যমক জনাইছে ভাৰতীয় নাগৰিক হোৱাৰ বাবে অক্ষতাই ভাৰতীয় আয়ৰ ওপৰত কৰ দিব নালাগে । অৱশ্যে ব্রিটেইনৰ পৰা তেওঁৰ যি আয় হয় তাৰ ওপৰত তেওঁ আবণ্টন কৰ দিয়ে । ভৱিষ্যতেও দিব ।