Cm Visit Golaghat:
পাঁচ ডিচেম্বৰৰ পৰা ৰাজ্য চৰকাৰে আৰম্ভ কৰা বিকাশৰ বাবে এটা পষেক শীৰ্ষক কাৰ্যসূচী অনুসৰি আজি দিনজোৰা ভ্ৰমণসূচীৰে মুখ্যমন্ত্ৰী ড:হিমন্ত বিশ্ব শৰ্মা উপস্থিত হয় গোলাঘাট জিলাত ৷
মুখ্যমন্ত্ৰী গৰাকীয়ে ১,৫০০ কোটি টকা ব্যয় সাপেক্ষে ১৪টা প্ৰকল্পৰ উদ্বোধন আৰু আধাৰশিলা স্থাপন কৰে ৷ এই উপলক্ষে আয়োজিত সভাত মুখ্যমন্ত্ৰী গৰাকীয়ে কয়, নতুন প্ৰকল্পসমূহে ঐতিহাসিক জিলাখনক অসমৰ এক অন্যতম প্ৰগতিশীল জিলা হিচাপে চিহ্নিত কৰিব ৷
৬৩১ কোটি টকা ব্যয় সাপেক্ষে বগৰিজেঙৰ চিকিৎসা মহাবিদ্যালয়ৰ লগতে অন্যান্য প্ৰকল্প সমূহে ভাৰত মাতৃৰ বীৰ পুত্ৰ কুশল কোঁৱৰ আৰু জিণ্টু গগৈৰ গৃহ জিলাখনৰ ৰাইজৰ আশা-আকাংক্ষা পূৰণ কৰিবলৈ পূৰামাত্ৰাই সক্ষম হ’ব বুলি উল্লেখ কৰে ৷
মুখ্যমন্ত্ৰী শৰ্মাই গোলাঘাট চহৰৰ হেমপ্ৰভা বৰবৰা ছোৱালী মহাবিদ্যালয়ৰ এটি অনুষ্ঠানত অংশ লৈ দুপৰীয়া ঐতিহাসিক ৰহধলা পথাৰত উপস্থিত হৈ ধান কাটি থকা দাৱনি আৰু স্থানীয় মহিলা সকলৰ স’তে মতবিনিময় কৰে ৷
পথাৰতে মহিলা সকলে প্ৰস্তুত কৰা ৰবাবটেঙাৰ জুটি লৈ একেলগে দুপৰীয়া আহাৰ গ্ৰহণ কৰে মুখ্যমন্ত্ৰী গৰাকীয়ে ৷
আটাইকেইটা অনুষ্ঠানত মুখ্যমন্ত্ৰীক সংগ দিয়ে কেবিনেট মন্ত্ৰীসকল ক্ৰমে অজন্তা নেওগ,অতুল বৰা,কেশৱ মহন্ত,নন্দিতা গাৰ্লোচা,বিধায়ক মৃণাল শইকীয়া, বিশ্বজিৎ ফুকন,ভৱেন ভৰালী সহ জিলা উপায়ুক্ত আৰু আৰক্ষী অধীক্ষকে ৷
