COVID -19 :
বিশ্বজুৰি কৰ’না পুনৰ বৃদ্ধি হ’বলৈ আৰম্ভ কৰিছে। উদ্বেগ বৃদ্ধি কৰিছে কৰ’নাৰ অ’মিক্ৰন ৰূপৰ উপৰূপ বি.এফ.৭ । এই উদ্বেগৰ মাজতে প্ৰশ্ন উত্থাপিত হয়, ভাইৰাছৰ এই নতুন উপপ্ৰকাৰ প্ৰতিৰোধ কৰিবলৈ কেন্দ্ৰীয় চৰকাৰে দিয়া ভেকছিন কিমান কাৰ্যকৰী?
বিজ্ঞানীসকলে চীনকে ধৰি কে’বাখনো দেশত ক’ভিড বৃদ্ধি হোৱাৰ বাবে বিএফ.৭ উপপ্ৰকাৰক দোষাৰোপ কৰিছে। চীনৰ বাহিৰেও, আমেৰিকা, ব্ৰিটেইন, বেলজিয়াম, জাৰ্মানী, ফ্ৰান্স আৰু ডেনমাৰ্কত বিএফ.৭ চিনাক্ত কৰা হৈছে।
চীনত দৈনিক কিমান জন লোক সংক্ৰমিত হৈছে সেই বিষয়ে কোনো আনুষ্ঠানিক তথ্য নাই, কিন্তু ব্লুমবাৰ্গৰ প্ৰতিবেদন অনুসৰি, সেই দেশত প্ৰতিদিনে কমেও ১০ লাখ লোক সংক্ৰমিত হৈ আছে আৰু পাঁচ হেজাৰৰো অধিক লোকৰ মৃত্যু হোৱাৰ আশংকা কৰা হৈছে।
এই পৰিস্থিতিত, ভাৰততো কৰ’নাৰ নতুন প্ৰকাৰে উদ্বেগ বৃদ্ধি কৰিছে। এক সংবাদ মাধ্যমৰ প্ৰতিবেদন অনুসৰি, নতুন উপপ্ৰকাৰত ভেকছিনবোৰৰ কাৰ্যকৰীতা মূল্যাঙ্কন কৰিবলৈ চৰকাৰে কিছুমান নমুনা অধ্যয়ন কৰি আছে।
টাইমছ অৱ ইণ্ডিয়াৰ এক প্ৰতিবেদনত চৰকাৰী সূত্ৰৰ উদ্ধৃতিৰে কোৱা হৈছে, “বিজ্ঞানীসকলে নতুন উপপ্ৰকাৰৰ সংক্ৰমণ বা ৰোগ প্ৰতিৰোধ কৰাত বৰ্তমান উপলব্ধ ভেকছিনবোৰ কাৰ্যকৰী হয় নে নাই সেই বিষয়ে গৱেষণা আৰম্ভ কৰিছে।”
ভাৰতত জুলাইৰ পৰা বিএফ-৭ উপপ্ৰকাৰত কমেও চাৰিজন আক্ৰান্ত হৈছে ।অৱশ্যে, আটাইকেইজন আক্ৰান্ত আৰোগ্য হৈছে। সেয়েহে, আশা কৰা হৈছে যে ভাৰতীয় ভেকছিনবোৰে নতুন উপপ্ৰকাৰ প্ৰতিৰোধ কৰিবলৈ সক্ষম।
পৰিসংখ্যা অনুসৰি, বেছিভাগ ভাৰতীয়ক ‘কভিশ্বিল্ড’ বা ‘কভাক্সিন’ৰ টিকাকৰণ কৰা হৈছে। প্ৰসংগত, দেশত কে’বাদিনো ধৰি দৈনিক ২০০ ৰো কম লোক কৰ’নাত সংক্ৰমিত হৈছে।