Kidnap Incident In Guwahati :
ক্ৰমাৎ অপৰাধীৰ অন্যতম কৰিডৰ হৈ পৰিছে গুৱাহাটী মহানগৰ ৷ স্মাৰ্ট আৰক্ষীক চেলেন্স দি অপৰাধীয়ে ইটোৰ পাছত সিটোকৈ সংঘটিত কৰি গৈছে নানান অপৰাধমূলক কাৰ্যকলাপ ৷
মহানগৰীত চাঞ্চল্যকৰ অপহৰণ কাণ্ড৷ গুৱাহাটী ৰে’লৱে ষ্টেচনৰ পৰা অপহৃত হয় চুবুৰীয়া ৰাজ্য নাগালেণ্ডৰ দুই ব্যৱসায়ীক ৷ অৱশ্যে মঙলবাৰে উদ্ধাৰ কৰে দুয়োজন ব্যৱসায়ীকে ৷
প্ৰাপ্ত খবৰ অনুসৰি হাতীগাওঁৰ এজন দুৰ্ধৰ্ষ ড্রাগছ ব্যৱসায়ীয়ে অপহৰণ কৰিছিল দুই ব্যৱসায়ীক৷ ডিমাপুৰৰ দুই ব্যৱসায়ীক অপহৰণ কৰাৰ পাছত মুক্তিপণ হিচাপে দাবী কৰিছিল দহ লাখ টকা ৷ অপহৃত ব্যৱসায়ী কেইজন হ’ল উত্তম জয়ছোৱাল আৰু কানহায়া সিং ৷
দুই ব্যৱসায়ীক গৰু বিহুৰ দিনা গুৱাহাটী ৰে’ল ষ্টেচনৰ পৰা অপহৰণ কৰাৰ পাছত আৱদ্ধ কৰি ৰাখিছিল হাতীগাওঁৰ নটবমাৰ চুকাফা পথত ৷
আনহাতে পলাতক অৱস্থাত আছে অপহৰণকাৰী ফাৰুক আহমেদ ৷ ড্ৰাগছ মাফিয়া ফাৰুকৰ সন্ধানত হাতীগাওঁ আৰক্ষীয়ে অভিযান অব্যাহত ৰাখিছে ৷
অপহৰণ কাণ্ড সম্পৰ্কত ইতিমধ্যে আৰক্ষীয়ে আটক কৰিছে ফাৰুকৰ পত্নী অলি দেৱী নাথ আহমেদক ৷