Golaghat Triple Murder Case:
গোলাঘাট চহৰৰ মাজমজিয়াৰ হিন্দী স্কুল ৰোডত সোমবাৰে সংঘটিত হয় এক লোমহৰ্ষক শিহৰণকাৰী হত্যাকাণ্ড ৷ দিন- দুপৰতে দুৰ্বৃত্তই নৃশংসভাৱে হত্যা কৰে একেটা পৰিয়ালৰে তিনিগৰাকী সদস্যক৷ পাছত স্থানীয় লোকে আৰক্ষীৰ সহযোগত ঘৰৰ ভিতৰত তেজেৰে তুমৰলি হৈ পৰি থকা পিতৃ,মাতৃ আৰু কন্যাৰ মৃতদেহ উদ্ধাৰ কৰে ৷
নিহতলোককেইজন ক্ৰমে সঞ্জীৱ ঘোষ, জুনু ঘোষ আৰু সংঘমিত্রা ঘোষ। এই চাঞ্চল্যকৰ ঘটনাক লৈ সমগ্র গোলাঘাটত সৃষ্টি হয় হুৱাদুৱা ৷ আনহাতে এই হত্যাৰ স’তে নাম সাঙোৰ খাইছে সংঘমিত্রা ঘোষৰ জোঁৱায়েক নাজিবুৰ ৰহমান বৰা ৷ আনহাতে হত্যাকাণ্ডৰ পাছৰে পৰা সংঘমিত্রাৰ নমহীয়া কণমানি পুত্ৰ সন্তানটি সন্ধানহীন হয় ৷
উল্লেখ্য যে ,সংঘমিত্রা ঘোষৰ স’তে কিছুবছৰ পূৰ্বে বিবাহ পাশত আবদ্ধ হোৱা নাজিবুৰ ৰহমানে গুৱাহাটীত কৰ্মসূত্ৰে থকাৰ পাছৰে পৰা দুয়োৰে মাজত প্ৰায়ে কাজিয়াপেছাল হৈছিল ৷ যাৰবাবে সংঘমিত্রা ঘোষ গুৱাহাটীৰ পৰা আহি গোলাঘাটৰ মাতৃ গৃহত আছিল ৷ ইয়াৰ মাজতে বিবাহবিচ্ছেদ বিছাৰি নাজিবুৰ ৰহমানে সংঘমিত্রাক ভাবুকি দিছিল ৷
অৱশ্যে বিবাহ বিচ্ছেদৰ প্ৰতি আগ্ৰহী নাছিল সংঘমিত্রা৷ ইয়াকে লৈ ক্ষুব্ধ হৈ পৰিছিল নজিবুৰ ৷ এনে ঘটনাক্ৰমৰ মাজতে আজি দিন-দুপৰতে সংঘমিত্রা আৰু তেওঁৰ বৃদ্ধা পিতৃ – মাতৃক চোকা অস্ত্ৰৰে নৃশংসভাৱে হত্যা কৰা হয় ৷
আনহাতে শেহতীয়া খবৰ অনুসৰি গোলাঘাটৰ শিহৰণকাৰী হত্যাকাণ্ডৰে জড়িত অভিযুক্তৰ আত্মসমৰ্পণ। অভিযুক্তজন সংঘমিত্রাৰ স্বামী নাজিবুৰ ৰহমান বৰা ৷ নমহীয়া সন্তান কোলাত লৈ গোলাঘাট থানাত আত্মসমৰ্পণ কৰে নাজিবুৰে ৷ সোমবাৰে দিন-দুপৰতে পত্নী, শাহু-শহুৰক হত্যা কৰিছিল নাজিবুৰে।
নাজিবুৰে থানাত আত্মসমৰ্পন কৰাৰ পাছতে থানাৰ প্ৰৱেশদ্বাৰত বিভিন্ন দল- সংগঠন আৰু স্থানীয় লোক উপস্থিত হৈ হত্যাকাৰীৰ শাস্তিৰ দাবীত বিভিন্ন শ্ল’গানেৰে আকাশ-বতাহ মুখৰিত কৰি তোলে ৷
