Bypoll Results 2023:
যোৱা ৫ ছেপ্টেম্বৰ ৬ খন ৰাজ্যৰ ৭খন বিধানসভাৰ আসনৰ বাবে অনুষ্ঠিত উপ-নিৰ্বাচনৰ ভোটগণনা আজি পুৱাৰে পৰা অব্যাহত আছে।
ফলাফলৰ শেহতীয়া খবৰ অনুসৰি ত্ৰিপুৰাৰ ধনপুৰ আৰু বক্সনগৰ বিধানসভাৰ আসনৰ বাবে অনুষ্ঠিত হোৱা উপ-নিৰ্বাচনত বিজেপিয়ে দুয়োখন আসনতে জয়লাভ কৰে।
আনহাতে বিজেপিৰ শাসনত থকা উত্তৰ প্ৰদেশৰ ঘোষী বিধানসভা আসনত সমাজবাদী পাৰ্টিৰ প্ৰাৰ্থী সুধাকৰ সিং জয়ী হোৱাৰ বিপৰীতে পৰাভূত হৈছে বিজেপিৰ প্ৰাৰ্থী দাৰা সিং চৌহান ৷
উত্তৰাখণ্ডৰ বাগেশ্বৰ বিধানসভা আসনত বিজেপিয়ে জয়লাভ কৰাৰ বিপৰীতে পশ্চিম বংগৰ ধূপগুৰি বিধানসভা আসনত প্ৰথম কে’বাটাও ৰাউণ্ডত বিজেপি প্ৰাৰ্থী গৰাকী আগবাঢ়ি আছিল যদিও অৱশেষত শেষ হাঁহি মাৰে টিএমচিয়ে ।
কেৰালাৰ পুথুপল্লীত কংগ্ৰেছ প্ৰাৰ্থী চাণ্ডী ওম্মানে বিজয়ৰ হাঁহি মাৰে। ইপিনে ঝাৰখণ্ডৰ ডুমৰি বিধানসভা আসনত জে এম এম প্ৰাৰ্থীয়ে অগ্ৰগতি অব্যাহত ৰাখিছে৷
উল্লেখ্য যে, সাতটা বিধানসভা সমষ্টিৰ বাবে উপ-নিৰ্বাচন বুধবাৰে অনুষ্ঠিত হৈছিল। উপ-নিৰ্বাচন অনুষ্ঠিত হোৱা সাতখন বিধানসভা আসন হৈছে ত্ৰিপুৰাৰ বাক্সনগৰ আৰু ধনপুৰ, উত্তৰাখণ্ডৰ বাগেশ্বৰ, উত্তৰ প্ৰদেশৰ ঘোচি, কেৰালাৰ পুথুপল্লী, পশ্চিম বংগৰ ধুপগুৰি, ঝাৰখণ্ডৰ দুমৰী ।