5 State Assembly Election Result:
দেওবাৰে ঘোষিত মধ্যপ্রদেশ, ৰাজস্থান, চত্তিছগড় আৰু তেলেংগানা এই চাৰি ৰাজ্যৰ নিৰ্বাচনী ফলাফলত বিজেপিৰ চমকপ্রদ প্রদর্শনে ২০২৪লৈ কি ইংগিত দিলে তাক লৈ চৰ্চা আৰম্ভ হৈছে।
ঘোষিত ফলাফল অনুসৰি মধ্যপ্রদেশ, ৰাজস্থান আৰু চত্তিছগড়ত বিজেপিয়ে বৃহৎ সাফল্যৰে জয়লাভ কৰাৰ বিপৰীতে তেলেংগানা কংগ্ৰেছে দখল কৰিবলৈ সক্ষম হয়। হিন্দী বলয়ৰ তিনি ৰাজ্যত বিজেপিৰ এই বৃহৎ বিজয়ৰ বিপৰীতে কংগ্রেছে এখন ৰাজ্যতে সন্তুষ্ট থাকিবলগীয়া হ’ল। কিছুদিন পূর্বে প্রকাশিত কে’বাটাও নির্বাচনোত্তৰ সমীক্ষাত মধ্যপ্রদেশত বিজেপি আৰু কংগ্ৰেছৰ মাজত কঠিন যুঁজ হ’ব বুলি কোৱা হৈছিল।
মধ্যপ্রদেশ বিধানসভাৰ নির্বাচনী ফলাফলে স্বাভাৱিকতে কংগ্রেছক হতাশ কৰি তুলিছে। ৰাজ্যখনৰ প্ৰাক্তন মুখ্যমন্ত্রী কমলনাথৰ নেতৃত্বত কংগ্ৰেছে নির্বাচনী প্রতিদ্বন্দ্বিতা কৰিছিল আৰু তেওঁক এই ক্ষেত্রত অবাধ স্বাধীনতা দিয়া হৈছিল। ৰাজ্যখনত কংগ্ৰেছৰ নিৰ্বাচনী প’ষ্টাৰসমূহতো কমল নাথৰ বিজয়ৰ কথা দাবী কৰা হৈছিল।
দেওবাৰে পুৱা ভোটগণনা আৰম্ভ কৰাৰ পূৰ্বে প্রাক্তন মুখ্যমন্ত্রী নাথে সংবাদ মাধ্যমকো এনে নিশ্চিতি প্রদান কৰিছিল। নাথে কৈছিল যে নিশ্চিতভারে কংগ্রেছ বিজয়ী হ’ব। তদুপৰি এই কথাও কয় যে ইভিএম গণনাৰ প্ৰৱণতা তেওঁ চোৱা নাই আৰু চাবলৈ ইচ্ছুকো নহয়, কিয়নো তেওঁৰ নিশ্চিতভাবে বিজয় হ’বই।
আনহাতে মিজোৰাম বিধানসভা নিৰ্বাচনৰ ভোটগণনা আজি পুৱাৰে পৰা আৰম্ভ হোৱাৰ পাছৰে পৰা জেপিএম দলে বৃহৎ অগ্ৰগতি লাভ কৰি নিৰংকুশ সংখ্যাগৰিষ্ঠতা লাভ কৰে ৷
মুখ্যমন্ত্ৰী জোৰামথাংগাৰ দল এম এন এফক পৰাভূত কৰি একক সংখ্যাগৰিষ্ঠাৰে ২৭ খন আসন দখল কৰি পৰৱৰ্তী চৰকাৰ গঠনৰ বাবে সাজু হয় জেপিএম ৷ শাসকীয় এম এন এফ ১০ খন আসনতে সন্তষ্ট থাকিবলগীয়া হয় ৷ কংগ্ৰেছে ১ আৰু বিজেপিয়ে ২ খন আসন লাভ কৰে ৷
পাৰ্বত্য ৰাজ্য খনৰ মুখ্যমন্ত্ৰী আসনত বহিবলগীয়া জেপিএমৰ সভাপতি তথা এসময়ৰ সুদক্ষ আই পি এছ লালডোহোমাই কাইলৈ চৰকাৰ গঠনৰ বাবে ৰাজ্যপালক সাক্ষাৎ কৰিব ৷
উল্লেখ্য যে, ১৯৭৭ ৰ বেটচৰ সুদক্ষ আই পিএছ লালডোহোমাই ১৯৮২ ত প্ৰয়াত প্ৰধানমন্ত্ৰী ইন্দিৰা গান্ধীৰ অন্যতম সুৰক্ষা বিষয়া আছিল ৷ পৰৱৰ্তী সময়ত গোৱা আৰক্ষীৰ উচ্চপদস্থ বিষয়া ৰূপে নিয়োজিত থাকি পাছত অৱসৰ গ্ৰহণ কৰে ৷
বিধানসভা নিৰ্বাচনত অভূতপূৰ্ব সফলতা লাভ কৰি জেপিএমৰ মুৰব্বী গৰাকীয়ে সংবাদ মাধ্যমত উল্লেখ কৰে যে, আমি অকলেই চৰকাৰ গঠন কৰিম ৷ কাৰো স’তে নিৰ্বাচনৰ পূৰ্বে আমাৰ মিত্ৰতা নাছিল ৷ অৱশ্যে বিজেপিৰ স’তে আমি কাম কৰিম আগন্তুক দিনত ৷
ভাৱী মুখ্যমন্ত্ৰী গৰাকীয়ে আইজলত আজি সাংবাদিকৰ আগত এক গুৰুত্বপূৰ্ণ ঘোষণা সদৰি কৰি কয় যে,মিজোৰামত হ’ব বিত্তীয় কেলেংকাৰীৰ তদন্ত ৷ জেপিএম চৰকাৰ গঠনৰ পাছতে নতুন চৰকাৰে চিবিআইৰ জৰিয়তে পূৰ্বৰ চৰকাৰ দ্বাৰা সংঘটিত বিত্তীয় কেলেংকাৰীৰ তদন্ত কৰা হ’ব ৷
নেডাৰ মুখ্য আহবায়ক তথা অসমৰ মুখ্যমন্ত্ৰী ড:হিমন্ত বিশ্ব শৰ্মাৰ মিজোৰামত জেপিএমৰ ৰাজকীয় উদ্থানৰ পাছত প্ৰতিক্ৰিয়া প্ৰকাশ কৰে যে, নিৰ্বাচনৰ বিজয়ী জেপিএম আৰু বিজিত এম এন এফ দুয়োটা দল এন ডি এৰ অংশীদাৰ হ’ব ৷ অৱশ্যে পূৰ্বৰে পৰা এম এন এফ এনডিএৰ অংশীদাৰ হৈ আছিল ৷
আনহাতে ৰাজস্থানত দলীয় অন্তর্কন্দলত বিধ্বস্ত হয় কংগ্রেছ :
ৰাজস্থানত বিদায়ী মুখ্যমন্ত্রী অশোক গেহলটে পুনৰবাৰ শাসনৰ গাদীলৈ উভতিব পাৰিব নে নাই তাকে লৈ চর্চা চলি থকাৰ সময়তে বিভিন্ন সমীক্ষাই কৈছিল যে এইবাৰ গাদী ৰক্ষা নহ’ব গেহলটৰ। দলীয় অন্তর্কন্দলে বিপদ মাতি আনিব পাৰে বুলি কংগ্ৰেছ নিজেই ৰাজস্থানক লৈ সন্দিহান আছিল আৰু অৱশেষত সেয়াই সত্য প্রমাণিত হ’ল।
দলে একত্রিত বুলি শক্তি প্রদর্শন কৰিবলৈ যিমানেই চেষ্টা নকৰক কিয় গেহলট আৰু শচীন পাইলটৰ শিবিৰৰ কন্দলে পূব ৰাজস্থানত দলৰ সম্ভাবনা মষিমূৰ কৰি পেলায়। এই পূব ৰাজস্থান হৈছে গুজ্জৰ সম্প্ৰদায়ৰ অধ্যুষিত অঞ্চল।
এইসকল ভোটাৰ কংগ্ৰেছৰ নিয়ন্ত্ৰণৰ পৰা ওলাই যায় আৰু বিজেপিৰ বিজয়ৰ সংখ্যা বৃদ্ধি কৰে। ইপিনে, গেৰুৱা বাহিনীটোৰ পশ্চিম ৰাজস্থানতো উত্থান ঘটিছে।
মুখ্যমন্ত্রী গেহলটে এই জনাদেশ স্বীকাৰ কৰে আৰু ইয়াক অপ্রত্যাশিত বুলি উল্লেখ কৰি কয়, ‘এই পৰাজয়ে দেখুৱালে যে আমি আমাৰ নীতি, আইন, নতুন কৰণীয়সমূহ ৰাইজৰ মাজলৈ লৈ যোৱাত সম্পূর্ণভাবে সফল নহ’লো। দেখা গৈছে যে নির্বাচনোত্তৰ সমীক্ষাৰ স’তে ৰাজস্থানৰ ফলাফলৰ সমিলমিল আছে।
অৱশ্যে এই কথাও বিশ্লেষকসকলে কয় যে ৰাজস্থানত প্ৰতিবাৰে চৰকাৰ সলনিৰ যি প্ৰৱণতা আছে সেই ক্ষেত্রত এইবাৰো ব্যতিক্রম নঘটিল। ৰাজস্থানত বিজেপিয়ে ১১৫খন আৰু কংগ্রেছে ৬৯ খন আসন দখল কৰে। দেশৰ নিৰ্বাচন আয়োগৰ বেছাইটত এই তথ্য প্রকাশিত হৈছে।
চত্তিছগড়ত চমক দিলে বিজেপিয়ে:
মুখ্যমন্ত্রী ভূপেশ বাঘেলৰ নেতৃত্বক আৰু তেওঁৰ কৃতিত্বসমূহক সাৰোগত কৰি চত্তিছগড়ত নির্বাচনী বণত যুঁজ দিয়া কংগ্ৰেছৰ বাবে আজিৰ এই ফলাফল চৰম অপ্রত্যাশিত আছিল।
নির্বাচনোত্তৰ পৰীক্ষাসমূহতো জনজাতি অধ্যুষিত ৰাজ্যখনত কংগ্ৰেছে পুনৰ ক্ষমতালৈ আহিব বুলি কোৱা হৈছিল। তদুপৰি দেশৰ বৰ্তমানৰ মুখ্যমন্ত্ৰীসকলৰ ভিতৰত বাঘেলকো এজন জনপ্রিয় মুখ্যমন্ত্রীৰূপে স্থান দিয়া হয়।দেওবাৰে ভোটগণনাৰ আৰম্ভণিতে কংগ্রেছ আগবাঢ়ে যদিও ক্রমশ বিজেপিৰ স’তে ছন্দ হেৰুৱাবলৈ ধৰে আৰু একপ্ৰকাৰ অপ্রত্যাশিতভাবে দলটোৱে বিজয় হস্তগত কৰে
। অৱশ্যে কংগ্রেছে তেলেংগানাৰ ফলাফলক লৈ কিছু সান্ত্বনা লভিব পাৰিব। দাক্ষিণাত্যৰ ৰাজ্যখনত শাসকীয় ভাৰত ৰাষ্ট্ৰ সমিতি (বিআৰএছ) ক ওফৰাই কংগ্রেছ বিজয়ী হৈছে। ২০১৪ত অন্ধ্রপ্রদেশৰ পৰা ফালি নি তেলেংগানা ৰাজ্য গঠনৰ সময়ৰ পৰাই কে চন্দ্ৰশেখৰ (কেচিআৰ) শাসনত আছিল। আজি দলৰ বিজয়ৰ বাবে ৰাজ্যখনৰ কংগ্ৰেছৰ মুৰব্বী ৰেৱাস্থ ৰেড্ডীকে কৃতিত্ব দিয়া হৈছে।
সন্মুখৰ পৰা নেতৃত্ব দিয়া ৰেড্ডীয়ে নির্বাচনত অতি গুৰুত্বপূর্ণ ভূমিকা গ্রহণ কৰে। ২০২১ ত ৰাজ্যিক কংগ্ৰেছৰ নিযুক্তি লাভ কৰা ৰেড্ডীক কংগ্ৰেছৰ হাইকমাণ্ডে পূর্ণ সমর্থন আগবঢ়াইছিল আৰু তেওঁ সুফল আদায় দিলে।
:মধ্যপ্রদেশৰ মুখ্যমন্ত্ৰীৰ প্ৰসংগ সন্দৰ্ভত আৰম্ভ কুজকাৱাজ:
দেওবাৰে পুৱা আঠ বজাত ভোটগণনাৰ আৰম্ভণিৰ সময়ছোৱাত কঠিন যুঁজৰ সামান্য আভাস দেখা দিছিল যদিও দুপৰীয়াৰ ফাললৈ স্পষ্ট হৈ পৰিল যে বিজেপিৰ ঢৌত মধ্যপ্রদেশত অতি শোচনীয়ভারে মুখ থেকেচা খালে কংগ্রেছে।
প্রতিষ্ঠানমুখী ঢৌতে উটি ভাহি গ’ল মধ্যপ্রদেশৰ সিংহভাগ ভোটাৰ। মধ্যপ্ৰদেশৰ ফলাফলতো একাধিক নির্বাচনোত্তৰ সমীক্ষাৰ পূর্বানুমান সত্যত প্রমাণিত হৈছে। আজি ফলাফল ঘোষণাৰ পাছতে ৰাজ্যখনত বহুল চর্চিত হৈ পৰে মুখ্যমন্ত্রী শিৱৰাজ সিং চৌহান।
তেওঁ পঞ্চমবাৰৰ বাবে শাসনৰ গাদীলৈ উভতিব বিচাৰিছে নে নাই সেয়া এতিয়াই স্পষ্ট নহয় যদিও ভোটদানৰ পূর্বে তেওঁক এইবাৰ মুখ্যমন্ত্ৰীৰ পদ প্রার্থী হিচাপে বিজেপিয়ে ঘোষণা কৰা নাছিল।
মধ্যপ্রদেশত ‘মামা’ বুলি পৰিচিত চৌহানে এই বিজয়ত প্রধানমন্ত্রী নৰেন্দ্ৰ মোদীক বৃহৎ কৃতিত্ব দিয়া হৈছিল যদিও চৌহানৰ সমর্থকসকলৰ মতে, ৰাজ্যখনত এইবাৰ বিজেপিৰ বিজয়ত তেওঁ লক্ষ্যণীয় অৱদান আছে।
চৌহানৰ মহিলাসকলৰ আৰ্থিক সাহায্যৰ ধনৰ পৰিমাণ বৃদ্ধিৰ আঁচনিৰ জৰিয়তে মহিলাসকলৰ ভোট কংগ্রেছতকৈ কে’বা শতাংশ অধিক লাভ কৰিছে বিজেপিয়ে।
তদুপৰি কন্যা সন্তানক দুই লাখকৈ বিত্তীয় সাহায্য, দৰিদ্ৰ পৰিয়ালক আগন্তুক পাঁচ বছৰৰ বিনামূলীয়া ৰেছন, কৃষিজাত সামগ্ৰীৰ ন্যূনতম সমর্থিত মূল্য আদিৰ বিভিন্ন আঁচনিৰ জৰিয়তে তেওঁ প্রতিষ্ঠান বিৰোধী ঢৌক ওফৰাবলৈ সমর্থ হৈছে বুলি বিশ্লেষক মহলে কয়। আনহাতে, কংগ্ৰেছৰ জাতিগত লোকপিয়লৰ ঘোষণাই সমাজৰ উচ্চ বৰ্ণৰ লোকসকলক অধিক বিজেপিমুখী কৰিলে বুলি কোৱা হৈছে।
মধ্যপ্রদেশ বিধানসভাৰ ২৩০ খনৰ ভিতৰত মাত্র ছখন আসন বিচাৰিছিল বিৰোধী মিত্রজোঁট ইণ্ডিয়াৰ অন্যতম অংশীদাৰ সমাজবাদী পার্টিৰ মুৰব্বী অখিলেশ যাদবে। কিন্তু ৰাহুল গান্ধী, মল্লিকার্জুন খার্গে আদিয়ে সেই অনুৰোধ ৰক্ষা নকৰিলে।
৭১ খন আসনত প্রার্থী প্ৰদান কৰি তথা আন নখন আসনত ক্ষুদ্র দলসমূহক সমর্থন কৰি অখিলেশে ঘোষণা কৰিছিল যে কংগ্ৰেছৰ ‘বেইমানি’ৰ উত্তৰ তেওঁ দিব। ফলাফলত দেখা গ’ল যে মধ্য প্ৰদেশত সংলগ্ন বুণ্ডেলখণ্ড- বাঘেলখণ্ডৰ লগতে বিন্ধ্য অঞ্চলতো কংগ্রেছৰ ভোট কাটিছে সমাজবাদী পার্টিৰ প্রার্থীয়ে।
ফলাফলৰ পাছত মধ্য প্রদেশৰ এজন কংগ্রেছ নেতাই আক্ষেপ কৰি কয়, ‘২০১৮ত মাত্র এখন আসনত বিজয়ী হ’লেও আমাৰ ৰাজ্যত যাদৱ ভোটাৰ চাৰি শতাংশৰ অধিক আছে। সামগ্রিকভাবে অন্যান্য পিছপৰা শ্রেণীৰ ভোট ৫০ শতাংশৰ বেছি। সেয়া মনত ৰখা উচিত আছিল।
‘হিন্দী বলয়ৰ আন দুই ৰাজ্য চত্তিছগড় আৰু ৰাজস্থানত কংগ্ৰেছৰ শোচনীয় পৰাজয়ৰ কাৰণ হিচাপে চিহ্নিত হৈছে দলীয় অন্তর্দ্বন্দ্ব, সাংগঠনিক দুর্বলতা, প্ৰচাৰৰ দিশাহীনতা আৰু অকলে আগবঢ়াৰ প্ৰৱণতাৰ কথাও।
ইণ্ডিয়াৰ অংশীদাৰ সকলকো কংগ্রেছে সামান্যও স্থান দিব বিচৰা নাছিল। একাংশ বিশ্লেষকৰ মতে, ভোটগণনাত তাৰ প্রভাৱ প্রতিফলিত হৈছে। বহু অঞ্চলত এনে কাৰণৰ বাবে অত্যন্ত লাভবান হৈছে বিজেপি। মধ্য প্রদেশৰ দৰে চত্তিছগড় সংলগ্ন জনজাতীয় অঞ্চলত সক্রিয় গান্দোৱানা গণতন্ত্র পার্টিৰ স’তে পূৰ্বৰ দৰে কংগ্ৰেছৰ আসন বুজাবুজিৰ সম্ভাৱনাৰ সৃষ্টি হৈছিল যদিও সেয়া বাস্তৱ নহ’ল। মধ্য প্রদেশৰ সমান্তৰালভাৱে অকলশৰীয়াকৈ চত্তিছগড়তো এই দলটোরে যুঁজ দিছিল।
ইয়াৰ ফলাফল কংগ্রেছে ভুগিছে। আপ, চিপিএম, চিপিআই, জেডিইউ আদিয়েও কংগ্রেছৰ বিৰুদ্ধে দাদাগিৰিৰ অভিযোগ তুলিছে আৰু অকলে নির্বাচনত প্রতিদ্বন্দ্বিতা কৰিছিল।
এনে বিভিন্ন দলে কংগ্ৰেছৰ দাদাগিৰিৰ বাবে নিজাববীয়াকৈ প্রার্থী প্রক্ষেপ কৰিছে বুলি অভিযোগ উঠিছে। সম্প্রতি নির্বাচনী ফলাফল ঘোষণাৰ পাছত এনে একাধিক উদাহৰণ সম্মুখলৈ আহিছে। এনেবোৰ কাৰণতো কংগ্ৰেছে আসন হেৰুৱাইছে।
পাঁচ ৰাজ্য বিধানসভা নিৰ্বাচনৰ ফলাফলৰ চুড়ান্ত তালিকা:
#মিজোৰাম:
মুঠ আসন ৪০
জেপিএম ২৭
এম এন এফ ১০
বিজেপি ২
কংগ্ৰেছ ১
#মধ্যপ্রদেশ:
মুঠ আসন ২৩০
বিজেপি ১৬৪ (+৫৫)
কংগ্রেছ ৬৫ (-৪৯)
বি এছ পি ০ (-২)
অন্যান্য ১ (-৪)
#ৰাজস্থান:
মুঠ আসন ১৯৯
বিজেপি ১১৫ (+৪২)
কংগ্রেছ ৭০ (-৩০)
বি এছ পি ২ (-৪)
অন্যান্য ১২ (-৮)
#চত্তিছগড়
মুঠ আসন ৯০
বিজেপি ৫৪ (+৩৯)
কংগ্রেছ ৩৫ (-৩৩)
বি এছ পি ১ (-১)
অন্যান্য ০ (-৫)
#তেলেংগানা:
মুঠ আসন ১১৯
কংগ্রেছ ৬৫ (+৩৩)
বি আৰ এছ ৩৯ (-৪৯)
বিজেপি ৮ (+৭)
এআইএমআই এম ৭ (০)
অন্যান্য ০ (-৪)