APSC scam is a surprising silence of the state government:
অসম লোকসেৱা আয়োগ (এপিএছচি)ত সংঘটিত কেলেংকাৰিক লৈ সম্পূর্ণ নীৰৱতা অবলম্বন কৰিছে অসম চৰকাৰে। চৰকাৰে কেবিনেট সিদ্ধান্ত লৈ ২০১৩ আৰু ২০১৪ ত সংঘটিত কেলেংকাৰিৰ তদন্ত আৰম্ভ কৰে। অৱসৰপ্ৰাপ্ত ন্যায়াধীশ বিপ্লব কুমাৰ শৰ্মাৰ আয়োগৰ দ্বাৰা দুয়োটা বৰ্ষত হোৱা নিযুক্তিৰ তদন্ত কৰা হয়। তাৰ ভিত্তিত একাংশ অভিযুক্ত বিষয়াক জেৰা কৰা হয় যদিও ইয়াৰ মাজতে এৰা ধৰাও চলে।
চৰকাৰৰ ঘনিষ্ঠ বুলি নাম চর্চালৈ অহা কে’বাজনো বিষয়াক জেৰা কৰাই নহ’ল। যি কেইজনক জেৰা কৰা হৈছিল তাৰেই আলম লৈ চৰকাৰে বাঃ বাঃ ল’ব বিচৰাৰ অভিযোেগ উঠিছে। এতিয়া সেয়াও নাই। চৰকাৰী পক্ষৰ সকলোৱে পালন কৰিছে গভীৰ নীৰৱতা। ইয়াৰ মাজতে ২০২২ৰ পৰীক্ষাতো নিযুক্তি কেলেংকাৰি সংঘটিত হোৱাৰ অভিযোগ উত্থাপিত হৈছে।
যি সময়ত চৰকাবে এপিএছচিলৈ স্বচ্ছতা ঘূৰি অহা বুলি দাবী কৰিছে, সেই সময়তো অনিয়মৰ যিবোৰ অভিযোগ উঠিছে, তাক নাকচ কৰাৰো তৎপৰতা নাই চৰকাৰৰ। ইয়াকে লৈ সৃষ্টি হৈছে গভীৰ ৰহস্য। এপিএছচিত সংঘটিত কেলেংকাৰিক লৈ তথ্যসহ সৰৱ হৈ অহা ফাইট এগেইনষ্ট ইনজাষ্টিছ অৱ এপিএছচি নামৰ সংগঠনটোৰ প্রশাসক মানৱ প্রতিম বৰুৱাই সংশ্লিষ্ট পক্ষবোৰৰ নিৰাপত্তা আশ্চর্য বুলি অভিহিত কৰে। এপিএছচি আজি মৌন কিয় বুলি প্রশ্ন কৰি, মৌনতাই বহু কথা স্পষ্ট কৰে বুলিও বৰুৱাই মন্তব্য কৰে।
উল্লেখ্য যে ২০২২ৰ পৰীক্ষাত কে’বাজনো উত্তীর্ণ প্রার্থীৰ ক্ষেত্ৰত ব্যাপক বিসংগতি ধৰা পৰাৰ অভিযোগ উঠিছে। এনে কাৰণতে যোৱা জানুৱাৰীত ফলাফল ঘোষণা কৰা পৰীক্ষাৰ অদ্যাপি কাট অৱ নম্বৰ প্ৰকাশ কৰা নাই এপিএছচি কর্তৃপক্ষই। এই প্রসংগতে শেহতীয়াকৈ পোহৰলৈ অহা তথ্য অনুসৰি এনে কে’বাখনো নম্বৰ তালিকা ৰাজহুৱা হৈছে য’ত ব্যাপক সন্দেহজনক তথ্য সন্নিবিষ্ট হোৱা বুলি চর্চা চলিছে। অথচ সেইবোৰক লৈও গভীৰ মৌনতা অৱলম্বন কৰিছে এপিএছচি কর্তৃপক্ষই।
অভিযোগ অনুসৰি বাছনিভুক্ত কে’বাজনো প্রার্থীয়ে সাধাৰণ অধ্যয়নৰ কাকতত অতি কম নম্বৰ লাভ কৰিছে। ৩০ শতাংশতকৈয়ো তলত নম্বৰ পোৱা এনে প্রার্থীসকলে বিষয়ধর্মী ৰচনাৰ কাকততো আকৌ ৯৮ শতাংশ পর্যন্ত নম্বৰ লাভ কৰিছে। তেওঁলোকে আকৌ মৌখিক পৰীক্ষাতো লাভ কৰিছে অতি উচ্চ নম্বৰ।
আকৌ কে’বাজনো প্রার্থীয়ে সাধাৰণ অধ্যয়নত যথেষ্ট উচ্চ নম্বৰ লাভ কৰাৰ বিপৰীতে ৰচনা কাকতত আশ্চৰ্যকৰ কম নম্বৰ লাভ কৰিছে। এই প্ৰসংগতে প্রিয়ংকা বৰুৱা নামৰ এগৰাকী প্রার্থীৰ নাম অন্য ধৰণে বিশেষ চর্চালৈ আহিছে। অসম গ্রামীণ বিকাশ বেংকত ব্যাপক খেলিমেলি কৰাৰ অপৰাধত চাকৰিৰ পৰা বৰ্খাস্ত হোৱা এইগৰাকী প্রার্থীয়ে অসম অসামৰিক সেৱাত ৩০ সংখ্যক স্থান দখল কৰে। এইগৰাকী প্রার্থীক গুৰুতৰ অনিয়ম সংঘটিত কৰি নিৰ্বাচিত কৰাৰ অভিযোগ উত্থাপন কৰিছে ফাইট এগেইনষ্ট ইনজাষ্টিছ অৱ এপিএছচিয়ে।
ইপিনে, বাওঁপন্থী সংগঠন ডিৱাইএফ আয়ে কয় যে নম্বৰৰ তালিকাত ব্যাপক কেলেংকাৰি সংঘটিত হৈছে আৰু এই ঘটনাই এপিএছচিৰ অভ্যন্তৰত থকা খেলিমেলিবোৰক উদঙাই দিছে।
ইপিনে, ২০১৩ আৰু ২০১৪ত সংঘটিত কেলেংকাৰিৰ পৰা একাংশ প্ৰাৰ্থীক উদ্ধাৰৰ তৎপৰতা স্বয়ং দিছপুৰৰ প্রভাৱশালী চক্ৰৰ পৰাই চলাৰ অভিযোগ উঠিছে। চর্চা অনুসৰি, তেনে এগৰাকী প্রার্থী হ’ল অসম আৰক্ষী সেৱাৰ নৱনীতা শর্মা। আন এগৰাকী প্রার্থী হ’ল আৰক্ষী সেৱাৰে নন্দিনী কাকতি। এনে আৰু কে ‘বাগৰাকী প্রার্থী আছে আৰু সেইসকলক ৰক্ষণাবেক্ষণ দিবলৈকে চৰকাৰ আৰু এপিএছচিত মৌনতাক কৌশল হিচাপে গ্রহণ কৰাৰ চর্চা চলিছে। বিপ্লৱ কুমাৰ শৰ্মাৰ প্ৰতিবেদনক লৈ চৰকাৰে কেইদিনমান হৈ- চৈ কৰাটোও এনে কৌশলৰে অংশ বুলি চর্চা চলিছে।
