Bank Robbery in Nagaon:
লোকসভা নিৰ্বাচনৰ বাবে আৰক্ষী- অৰ্ধ সামৰিক বাহিনীয়ে গিজগিজাই থকা নগাঁও চহৰৰ মাজমজিয়াত বৃহস্পতিবাৰে দিন- দুপৰতে সংঘটিত হয় চাঞ্চল্যকৰ ডকাইতি কাণ্ড ।
মাৰোৱাৰীপট্টিস্থ পঞ্জাৱ নেচনেল বেংকৰ পৰা দুৰ্বৃত্তই লুটি নিয়ে ৪৫ লাখ টকা ৷ কঠিয়াতলীৰ সৰুপথাৰৰ আদিত্য এগ্ৰ’ৰাইছ মিলৰ কৰ্মচাৰী ইউনিছ আলীয়ে তেওঁৰ এজন সহকৰ্মীৰ সৈতে পঞ্জাৱ নেচনেল বেংকত মিলৰ ৪৫ লাখ টকা জমা দিবলৈ আহি বেংকৰ ভিতৰত এখন চকীত বহে ৷ এনে সময়তে এটা ফোন অহাৰ বাবে ম’বাইলত ব্যস্ত হৈ পৰে ইউনিছ আলী ।
এই অন্যমনস্কতাৰ সূযোগ লৈ সেই সময়ত পূৰ্বৰে পৰা খাপ পিটি থকা দুৰ্বৃত্তই টকা ভৰ্তি বেগটো লৈ উধাও হয় ৷ ইয়াৰ পিছতে কিংকৰ্তব্যবিমূঢ় হৈ আদিত্য এগ্ৰ’ৰাইছ মিলৰ কৰ্মচাৰী ইউনিছ আলীয়ে ততাতৈয়াকৈ বেংক কৰ্তৃপক্ষ আৰু আৰক্ষীক টকা লুট কৰা বিষয়টো অৱগত কৰে ৷
ইতিমধ্যে বেংকত জ্যেষ্ঠ আৰক্ষী বিষয়া উপস্থিত হৈ বেংকৰ চিচিটিভিৰ ফুটেজ সংগ্ৰহ কৰিছে ৷ চিচিটিভিৰ ফুটেজত টকা ভৰ্তি বেগটো লৈ উধাও হোৱা দৃশ্য বন্দী হৈছে ৷ আৰক্ষীয়ে এই সন্দৰ্ভত ক্ষীপ্ৰতাৰে আৰম্ভ কৰিছে তদন্ত ৷ শীৰ্ঘেই দুৰ্বৃত্ত আৰক্ষীৰ জালত পৰিব বুলি প্ৰকাশ কৰে জ্যেষ্ঠ আৰক্ষী বিষয়াই ৷
