APSC Scam is a Drama To Protect The Culprits:
অসম লোকসেৱা আয়োগ (এপিএছচি)তসংঘটিত বিয়াগোম কেলেংকাৰিক চৰকাৰে কৌশলৰে এৰাই চলিব বিচৰাটো স্পষ্ট হৈছে। কেলেংকাৰিৰ অভাৱনীয় কাণ্ড চৰকাৰৰ মুখৰ খজুৱতি মৰা পৰ্যায়লৈহে পর্যবসিত হৈছে। ইয়াক লৈ অব্যাহত থকা তদন্ত প্ৰক্ৰিয়াৰ জৰিয়তে কিছু সংখ্যক বিশেষ অভিযুক্তক সুৰক্ষা দিবলৈ বিচৰা বুলি ব্যাপকভাৱে চর্চিত হৈছে। সেইবাবেই অৱসৰপ্ৰাপ্ত ন্যায়াধীশ বিপ্লৱ কুমাৰ শৰ্মাৰ
প্রতিবেদন তথা বিশেষ তদন্তকাৰী গোট(এছআইটি) কাৰো প্ৰতিয়েই চৰকাৰৰ দায়বদ্ধতা প্রত্যক্ষ হোৱা নাই।
শেহতীয়াকৈ অৱশ্যে এছআইটি হঠাৎ বিষয়টোক লৈ তৎপৰ হৈ উঠে ৷এই তৎপৰতাক লৈ সংশ্লিষ্ট মহলবোৰত চর্চাও সমানে চলিছে। চর্চা অনুসৰি, ন্যায়ালয়ক উত্তৰ দি দায় সাৰিব বিচৰাৰ কৌশল হিচাপেহে এইধৰণৰ হঠাৎ তৎপৰতা প্ৰদৰ্শন কৰা হৈছে। ইয়াৰ মাজতে আজি বিশেষ আদালতত এগৰাকী চৰকাৰী সাক্ষীক লৈ চৰকাৰ গভীৰ অস্বস্তিত পৰে।
উল্লেখ্য যে ডিব্ৰুগড় আৰক্ষী থানাত ৰুজু হৈ থকা এপিএছচিৰ ২০১৩ৰ কেলেংকাৰিৰ গোচৰটোৰ মঙলবাৰে বিশেষ আদালতত শুনানি অনুষ্ঠিত হয়। এই শুনানিত উপস্থিত থাকে ২০১৭ত চৰকাৰৰ হৈ সাক্ষ্য প্ৰদান কৰা সুকন্যা শর্মা; কিন্তু আজি সাক্ষী গৰাকীয়ে আদালতত কয় যে তেতিয়া তেওঁ কি ভাষ্য দিছিল সেয়া এতিয়া মনত নাই।
সাক্ষীৰ এই বক্তব্যত চৰকাৰী অধিবক্তা গভীৰ অস্বস্তিত পৰে; অথচ সাক্ষীগৰাকীয়ে চিআৰপিচিৰ ১৬১ আৰু ১৬৪ ধাৰাত সাক্ষ্য প্রদান কৰিছিল। শৰ্মাৰ এই বক্তব্যৰ ফলত চৰকাৰী অধিবক্তাই উপায়ান্তৰ হৈ তেওঁৰ নাম সাক্ষীৰ তালিকাৰ পৰা কৰ্তন কৰিবলৈ বাধ্য হয়। বিপ্লৱ কুমাৰ শৰ্মা আয়োগে প্রতিবেদন দাখিল কৰাৰ পাছত চৰকাৰে তাৰ ভিত্তিত দোষীৰ বিৰুদ্ধে ব্যৱস্থা গ্ৰহণৰ পৰিৱৰ্তে ইখনৰ পাছত সিখন সমিতিহে গঠন কৰে।
প্ৰথমতে মুখ্য সচিবৰ অধ্যক্ষতাত এখন সমিতি গঠন কৰা হয়। তাৰ পাছত গঠন কৰা হয় এছআইটি। ডিব্ৰুগড় আৰক্ষীৰ তদন্তত জালিয়াতিৰ আশ্রয় লোৱা বুলি অভিযোগ উত্থাপিত কে’বাজনো ৰাজপত্ৰিত বিষয়াৰ নাম ৰহস্যজনকভাৱে বাদ পৰিছিল। শর্মা আয়োগে সেই নামবোৰ পোহৰলৈ অনাৰ পৰিপ্ৰেক্ষিতত মূলতঃ এছআইটি গঠন কৰা হৈছিল। বিগত বৰ্ষৰ ২৮ ছেপ্টেম্বৰত গঠন কৰা এছআইটিৰ কাৰ্যকাল আছিল ছমাহ।
এই সময়সীমাৰ ভিতৰত এছআইটিয়ে প্রয়োজনীয় ব্যৱস্থা গ্রহণ কৰিব লাগিছিল। যোৱা ২৮ মার্চত এছআইটিৰ কাৰ্যকাল উকলি যায়; কিন্তু এই সময়ছোৱাৰ ভিতৰত এছআইটিয়েনো কি কৰিলে সেয়া এতিয়া এক বৃহৎ প্রশ্ন। ডিব্ৰুগড় আৰক্ষীয়ে বিচাৰি নোপোৱা অথচ আয়োগে বিচাৰি পোৱা কেলেংকাৰিত লিপ্তসকলৰ মাজৰ ২০ জনৰো অধিক অভিযুক্তক এছআইটিয়ে যোৱা ছমাহৰ ভিতৰত সোধপোছ কৰিলে।
ইয়াৰ বিপৰীতে গ্ৰেপ্তাৰ কৰে মাত্র পাঁচজনকহে। তদুপৰি গ্ৰেপ্তাৰ কৰা হয় এজন প্রাক্তন প্রধান পৰীক্ষা নিয়ন্ত্রকক। বাকীসকলক জেৰা কৰাতেই দায়িত্ব শেষ কৰা বুলি চর্চা অব্যাহত আছে। এই ছমাহত এছআইটিয়ে ক’তো প্রতিবেদন দাখিল নকৰিলে। আদালতত অভিযোগনামাও মাত্র দায় সাৰিবৰ বাবেহে দুজনৰ বিৰুদ্ধে আংশিকভাৱে দাখিল কৰা হয় বুলি বিষয়টোৰ ওপৰত দৃষ্টি ৰখাসকলৰ মাজত চৰ্চিত হৈ আহিছে।
বিষয়টোৰ প্ৰসংগত অসম আৰক্ষীৰ শীৰ্ষ সূত্রই উল্লেখ কৰে যে শৰ্মা আয়োগৰ প্রতিবেদনে এনে কে’বাগৰাকী ৰাজপত্ৰিত বিষয়াৰ জালিয়াতি ধৰা পেলায় যিসকলক লৈ চৰকাৰ গভীৰ অস্বস্তিত পৰে। কোনোবা যদি চৰকাৰৰ এৰাব নোৱৰা ঘনিষ্ঠ কাৰোবাৰ আত্মীয়, কোনোবা আকৌ চৰকাৰৰ ঘনিষ্ঠ ঠিকাদাৰৰ ঘৰৰ আত্মীয়। জালিয়াতিত লিপ্তৰ অভিযোগ উত্থাপিত হোৱা সত্ত্বেও নৱনীতা শৰ্মা, নন্দিনী কাকতি, ৰুমিৰ তিমুংপি আদি বিষয়াসকল ইয়াৰ উদাহৰণ।
মন্ত্ৰী, বিধায়কৰ ঘৰৰ মানুহৰ বিৰুদ্ধে ব্যৱস্থা গ্রহণক সম্পূর্ণ একাষৰীয়া কৰাৰ পৰিণতিতে কার্যতঃ এপিএছচিৰ কেলেংকাৰি চৰকাৰখনৰ বাবে কেবল মুখৰ খজুৱতি মৰা এক বিষয় হৈ পৰিছে।
মঙলবাৰে হঠাৎ এছআইটিৰ এটা দল এপিএছচিৰ কাৰ্যালয়ত উপস্থিত হৈ বিভিন্ন নথি-পত্ৰ পৰীক্ষা কৰে। জ্যেষ্ঠ আৰক্ষী বিষয়া প্রতীক থুবেৰ নেতৃত্বত যোৱা দলটোৱে ২০১৩ আৰু ২০১৪ৰ পৰীক্ষাৰ নথি একাংশ চোৱাৰ লগতে কিছু সংখ্যক নথি সংগ্রহ কৰিও নিয়ে। ইয়াৰ উপৰি এজন নিয়োগ বিষয়াক চমন জাৰি কৰে। মৃদুল হাজৰিকা নামৰ বিষয়াজনক আজি আৰক্ষীৰ অপৰাধ অনুসন্ধান বিভাগ (চিআইডি)ৰ কাৰ্যালয়ত হাজিৰ হ’বলৈ নিৰ্দেশ দিয়া হৈছে।
এছআইটিৰ তৎপৰতা এনেদৰে বৃদ্ধি হোৱাৰ অন্তৰালত ন্যায়ালয়ৰ ৰোষৰ পৰা হাত সৰাৰ কৌশল বুলিও সমানে চর্চা চলিছে। কাৰণ ন্যায়ালয়ৰ হেঁচাতে এছআইটি গঠন কৰা হৈছিল। সেই এছআইটিৰ ছমাহতো ফলাফলকেন্দ্রিক কোনো দিশ নোলোৱাত যিকোনো মুহূৰ্তত ন্যায়ালয়ৰ ৰোষত পৰাৰ সম্ভাৱনা আছে। তাৰ বাবেই হঠাৎ এনেধৰণৰ সক্ৰিয়তা এছআইটিয়ে বৃদ্ধি কৰাৰ চৰ্চা এতিয়া সুলভ।