Nalbari Horrific murder:
নলবাৰীত লোমহৰ্ষক হত্যাকাণ্ড ৷ বিড়িৰ বাবেই পুত্ৰৰ হাতত প্ৰাণ গ’ল পিতৃ ৷ হানি-খুঁচি হত্যা কৰে নিজ জন্মদাতা পিতৃক ৷ এই জঘন্য ঘটনা সংঘটিত হয় জিলা খনৰ বাসুদেৱৰ ভৰালীতোলাত।
যোৱা নিশা নিচাসক্ত অৱস্থাত থকা নাৰায়ণ বৰ্মন ওৰফে নাৰদ নামৰ যুৱকজনে পিতৃ নৃপেন্দ্ৰ বর্মনৰ স’তে তৰ্কবিতৰ্ক কৰি পিছত হতাহতি পৰ্যন্ত হয়। ইয়াৰ পিছত হিতাহিতজ্ঞানশূন্য হৈ নাৰায়ণ বৰ্মন চোকা অস্ত্ৰৰে মাৰিবলৈ উদ্যত হোৱাত প্ৰাণৰ মমতাত পিতৃ নৃপেন্দ্ৰ বর্মনে নিজ বাসগৃহৰ সমীপতে থকা কন্যাৰ গৃহলৈ দৌৰি অহা অৱস্থাতে হানি-খুঁচি হত্যা কৰে পাষাণ পুত্ৰই ৷
আনহাতে পিতৃক হত্যা কৰি পলায়নৰ চেষ্টা কৰিছিল কুলাংগাৰ পুত্ৰ নাৰায়নে ৷ কিন্ত ইতিমধ্যে ঘটনাৰ সম্ভেদ লাভ কৰা আৰক্ষীয়ে খেদি খেদি গ্ৰেপ্তাৰ কৰে হত্যাকাৰী পুত্ৰ নাৰায়ণক ৷ ইতিমধ্যে এই ঘটনাক লৈ সমগ্ৰ ভৰালীতোলাত তীব্ৰ চাঞ্চল্যকৰ সৃষ্টি কৰিছে ৷ স্থানীয় লোকে কুলাংগাৰ পুত্ৰৰ কঠোৰ শাস্তিৰ দাবী কৰে ৷