Salary of MLAs will be increased by at least Rs 75,0OO:
সংশ্লিষ্ট সমষ্টিৰ ৰাইজৰ সমস্যাসমূহ সমাধানৰ অৰ্থে ধাৰ্য কৰা বিধায়ক পুঁজিৰ ধন মোকলাই দিয়াত ব্যর্থ হ’লেও মন্ত্রী- বিধায়কসকলৰ দা-দৰমহা বৃদ্ধিত কার্পণ্য কৰা নাই অসম চৰকাৰে।
সৰ্বদিশেৰে ব্যয় বৃদ্ধিৰ ফলত জনসাধাৰণ বিপর্যস্ত হৈ পৰিলেও তালৈ গুৰুত্ব নাই জনপ্রতিনিধিৰ; অথচ ৰাইজৰ ধনৰেই তেওঁলোক ভোগ কৰি আহিছে। মুখত তেওঁলোকৰ ৰাইজৰ স্বাৰ্থৰ কথা আখৈ ফুটাদি ঠিকেই ফুটে; কিন্তু কার্যক্ষেত্ৰতহে সেয়া ৰূপায়ণ নহয়। ইয়াৰ বিপৰীতে আত্মস্বাৰ্থ পূৰণৰ দৌৰতহে লিপ্ত হোৱা বাবে অচিৰে ৰাজ্যৰ মন্ত্ৰী- বিধায়কসকলৰ দৰমহা বৃহৎ পৰিমাণত বৃদ্ধি হ’ব।
ৰাজনৈতিক বিষয়ত শাসক-বিৰোধীৰ মাজত বাহ্যিকভাৱে অহি-নকুল সম্পৰ্ক এক সাধাৰণ দৃশ্য; কিন্তু নিজৰ স্বাৰ্থ পূৰণত সকলো এক। দৰমহা বৃদ্ধিৰ বিষয়টোৱেই তাৰ প্ৰমাণ। বৰ্তমানৰ পৰিস্থিতিত প্রাপ্য দৰমহা পর্যাপ্ত নহয় বুলি বিধানসভাৰ ভিতৰে-বাহিৰে অতি সতর্কতাৰে শাসক-বিৰোধীৰ জনপ্রতিধিসকলে আপত্তি দর্শাই আহিছে। বিগত ২০১৮ৰ পৰা দৰমহা বৃদ্ধি নোহোৱাটোকো সকলোৱে অজুহাত হিচাপে লৈ আহিছে। সকলোৰে এই দাবীত জন প্রতিনিধিসকলৰ দৰমহা বৃদ্ধিৰ বিষয়টো পৰীক্ষা কৰিবলৈ অসম বিধানসভাৰ অধ্যক্ষ বিশ্বজিৎ দৈমাৰীয়ে ৰাজ্যৰ অৱসৰপ্ৰাপ্ত জ্যেষ্ঠ আমোলা হিমাংশু শেখৰ দাসৰ নেতৃত্বত এখন সমিতি গঠন কৰে।
সেই সমিতিয়ে কেইদিনমান পূর্বে নিজৰ প্ৰতিবেদন দাখিল কৰে। বিধানসভাৰ সমিতিয়েও সেই প্রতিবেদনত অনুমোদন জনায়। তাৰ পাছতে বিধানসভাৰ পৰা প্ৰতিবেদন দিছপুৰলৈ প্ৰেৰণ কৰা হৈছে। সূত্ৰত প্রকাশ যে দৰমহা বৃদ্ধিৰ প্ৰতিবেদনৰ বিষয়টো ৰাজ্যিক কেবিনেটত উত্থাপন হ’ব আৰু তাৰ পাছত বিধানসভাৰ আগন্তুক অধিবেশনতে এই সম্পৰ্কীয় বিধেয়ক উত্থাপনৰ সম্ভাৱনা আছে।
বিধানসভাৰ সূত্ৰই সদৰী কৰা অনুসৰি, দৰমহা সমিতিৰ প্ৰতিবেদন কার্যকৰী হ’লে মুখ্যমন্ত্ৰীৰ দৰমহা ভাত্তাসহ ২.৪ লাখ টকালৈ বৃদ্ধি পাব। বর্তমান মুখ্যমন্ত্ৰীয়ে লাভ কৰা দৰমহাৰ পৰিমাণ হ’ল ১.৬৪ লাখ টকা। ইপিনে, কেবিনেট মন্ত্রীসকলে বৰ্তমান লাভ কৰি থকা ১.৪ লাখ টকাৰ পৰা ভাত্তাসহ পাবলগীয়া নতুন দৰমহাৰ পৰিমাণ হ’ব ২.১ লাখ টকা। বিধায়কসকলৰ দৰমহা বৃদ্ধি হ’ব ১.৩ লাখ টকালৈ।
ইপিনে, বিধানসভাৰ অধ্যক্ষ-উপাধ্যক্ষৰ দৰমহাও যথেষ্ট বৃদ্ধি হ’ব। বর্তমান বিধানসভাৰ অধ্যক্ষই লাভ কৰা দৰমহাৰ পৰিমাণ হ’ল ১.৫ লাখ টকা। সেই পৰিমাণ ২.৩ লাখ টকালৈ বৃদ্ধি হ’ব। উপাধ্যক্ষই নতুন নিৰিখ কাৰ্যকৰী হ’লে লাভ কৰিবলগীয়া দৰমহাৰ পৰিমাণ হ’ব ২.২৫ লাখ টকা। বর্তমান উপাধ্যক্ষই লাভ কৰে ১.৪ লাখ টকা।
মন্ত্ৰী-বিধায়কৰ দৰমহা বৃদ্ধিক লৈ তৎপৰতা চলাৰ বিপৰীতে কিন্তু বিধায়ক উন্নয়ন পুঁজিৰ ধন মোকলাই দিবলৈ সক্ষমতা নাই চৰকাৰৰ। নিজৰ স্বাৰ্থ পূৰণৰ বিপৰীতে ৰাইজৰ স্বাৰ্থ পূৰণত যে কোনো দায়বদ্ধ নহয়, এয়া তাৰেই প্ৰমাণ বুলি সচেতন মহলৰ মাজত চর্চা চলিছে।