Fake branch in Assam Sahitya Sabha:
কালিৰে পৰা ভোটদান প্রক্রিয়া আৰম্ভ হোৱা অসম সাহিত্য সভাত এইবাৰ ওলাইছে ভুৱা শাখা। নির্বাচনত জয়লাভৰ উদ্দেশ্যে ভোটৰ সংখ্যা বৃদ্ধিৰ অংকৰে প্ৰতিদ্বন্দ্বিতাত অৱতীৰ্ণ কোনো প্ৰাৰ্থীৰ দ্বাৰাই এনে শাখা সভা গঠনৰ অভিযোগ উত্থাপিত হৈছে।
সভাৰ তথ্য অনুসৰি, এই শাখা সভাবোৰৰ কেৱল নথিপত্রতহে অস্তিত্ব আছে। সেই সূত্রে এনে সভাবোৰে সভাপতি, উপ- সভাপতি আৰু প্ৰধান সম্পাদকৰ নিৰ্বাচনত ভোটদান কৰিব পাৰে। তাৰ বাদে এনে শাখাবোৰৰ কোনো অস্তিত্ব নাই। সেয়েহে
মৌখিকভাবে এনে শাখাবোৰক ভুৱা শাখা বুলি কোৱা হয়। অভিযোগ অনুসৰি, এনে শাখাৰ ভোটৰ ভিত্তিতে অসম সাহিত্য সভাৰ কেন্দ্ৰীয় সমিতিৰ নেতৃত্ব একাংশই ল’বলৈ সক্ষম হৈছে। তাৰ ব্যতিক্রম এইবাৰো হোৱা নাই।
সেয়েহে অসম সাহিত্য সভাৰ গৰিমা ৰক্ষা কৰাৰ যুঁজ যিসকলে দি আহিছে, তেওঁলোকৰ জৰিয়তে এইবাৰ চলিছে ভুৱা শাখাৰ সন্ধান। সভাৰ সূত্ৰই সদৰী কৰা অনুসৰি, কে’বাখনো জিলাত এনে অর্ধশতাধিক ভুৱা শাখাৰ তথ্য উদ্ধাৰ হৈছে। সেই সকলোৰে কাম-কাজৰ পৰীক্ষা অদ্যাপি সম্পূর্ণ হোৱা নাই।
নলবাৰী জিলাৰ কেইখনমান শাখা সভাৰ ক্ষেত্রত বিষয়টো ইতিমধ্যে প্রমাণিত হৈছে। এনে তিনিখন ভুৱা শাখা হ’ল নাথকুছি শাখা সাহিত্য সভা, সম্মিলিত শাখা সাহিত্য সভা আৰু নমাটি শাখা সাহিত্য সভা। অভিযোগ অনুসৰি, এই শাখা সাহিত্য সভাকেইখন গঠন কৰে বৰ্তমানৰ প্ৰধান সম্পাদক ড:উপেন্দ্রজিৎ শর্মাই ।
ইপিনে, সভাপতি, উপ-সভাপতি আৰু প্রধান সম্পাদক পদত কাক ভোট দিয়া হ’ব, তাৰ বাবে শাখা সাহিত্য সভাবোৰৰ অনুষ্ঠিত হৈছে নির্বাচনী সভা। এই সভাবোৰত নিজৰ পক্ষে সমর্থন আদায় কৰিবলৈ বিশেষকৈ উপ-সভাপতি আৰু প্ৰধান সম্পাদকৰ প্ৰাৰ্থীসকলে আপ্রাণ চেষ্ট অব্যাহত ৰাখিছে। অভিযোগ অনুসৰি, ইয়াৰ বাবে একাংশ শাখা সাহিত্য সভাক নানা ধৰণে প্রলোভনো দিছে একাংশ প্রার্থীয়ে।
বিশেষকৈ প্ৰধান সম্পাদক পদৰ এজন প্ৰাৰ্থীৰ হৈ উপেন্দ্রজিৎ শর্মাই সহায়-সহযোগিতা আগবঢ়োৱাৰ প্ৰতিশ্রুতি দিয়াৰ চৰ্চা এতিয়া মুখে মুখে। অজিত প্রসাদ শৰ্মাৰ হৈ উপেন্দ্রজিৎ শর্মাই এনে তৎপৰতা গ্ৰহণ কৰা বুলি কে’বাখনো শাখা সাহিত্য সভাৰ সূত্রই সদৰী কৰে। ইয়াৰ মাজতে প্রতিদ্বন্দ্বীৰ নেতিবাচক দিশবোৰক লোকচক্ষুৰ আগলৈ অনাৰ প্ৰতিযোগিতাও চলিছে।
উদাহৰণ স্বৰূপে আজিৰ পৰা বিশেষ প্ৰচাৰ চলিছে প্রধান সম্পাদক পদৰ প্ৰাৰ্থী দেৱজিৎ বৰাৰ বিৰুদ্ধে থকা বিত্তীয় কেলেংকাৰিৰ এক অভিযোগৰ। একেদৰে চৰ্চাৰ তুংগত আছে অজিত প্ৰসাদ শৰ্মাৰ বিৰুদ্ধে নিজৰ মহাবিদ্যালয়ৰ ছাত্ৰীয়ে উত্থাপন কৰা শ্লীলতাহানিৰ অভিযোগৰ বিষয়ে।