বিবাহিতা মহিলাগৰাকীৰ নাম লক্ষ্মী সৰকাৰ । ভোটাৰ তালিকাত তেওঁৰ স্বামীৰ নাম অন্তর্ভুক্ত হৈছে অসম সৰকাৰ বুলি। এনে বাৰপাচি খেলিমেলি মাজেৰে প্রকাশ পাইছে আসন্ন পঞ্চায়ত নিৰ্বাচনৰ শ্রীভূমি জিলাৰ খচৰা ভোটাৰ তালিকা। আনকি খচৰা ভোটাৰ তালিকাত নাম অন্তর্ভুক্ত নহ’ল দক্ষিণ কৰিমগঞ্জৰ বিধায়ক ছিদ্দেক আহমেদৰ।
স্বাভাৱিকতে খচৰা ভোটাৰ তালিকাৰ এই বেমেজালিক লৈ নির্বাচন আয়োগৰ বিৰুদ্ধে ক্ষোভৰ সৃষ্টি হৈছে। খচৰা ভোটাৰ তালিকাৰ এই বিসংগতি ইমানেই বেছি হয় যে উত্তৰ কৰিমগঞ্জ সমষ্টিৰ বগলিগুল আৰু বৰচড়াপুঞ্জীৰ খচৰা ভোটাৰ তালিকাৰ ক্ৰমিক নম্বৰ ৯৩৮ তথা গৃহ নম্বৰ ৩৬০ৰ লক্ষ্মী সৰকাৰৰ স্বামীৰ নাম অসম সৰকাৰ বুলি উল্লেখ আছে। একেদৰে ডালিয়া সৰকাৰৰ পিতৃৰ নাম অসম সৰকাৰ বুলি আহিছে।
খচৰা ভোটাৰ তালিকাৰ এনে নাম বিভ্রান্তিক লৈ এখন সংবাদমেলত তীব্ৰ ক্ষোভ প্রকাশ কৰি বিধায়ক ছিদ্দেক আহমেদে অভিযোগ কৰে যে বিসংগতি হোৱাৰ এটা সীমা আছে। কেৱল কোনো মহিলাৰ স্বামী বা পিতৃৰ নাম অসম সৰকাৰ হোরাতে বিসংগতি সীমাবদ্ধ থকা নাই, এজন ভোটাৰেৰেই এটা ৱাৰ্ড গঠিত হোৱাৰ দৰে বিভ্রান্তিকৰ তথ্যও এই খচৰা ভোটাৰ তালিকাত অন্তর্ভুক্ত হোৱা বুলি বিধায়কজনে ক্ষোভ প্রকাশ কৰে। তেওঁ কয় যে নীতি-নির্দেশনা অনুসৰি এটা ৱাৰ্ডত সর্বাধিক ১৫শ ভোটাৰ থাকিব পাৰে। ইয়াৰ বিপৰীতে বড়পুৰাহিয়াৰ এটা ৱাৰ্ডত মাথোঁ এজন ভোটাৰ থকা এই খচৰা ভোটাৰ তালিকাত দেখুওৱা হৈছে।
একেদৰে নিলাম বজাৰ আঞ্চলিক পঞ্চায়তৰ অধীনৰ এটা ৱাৰ্ডত মাত্র ছজন ভোটাৰহে আছে বুলি এই খচৰা ভোটাৰ তালিকাত উল্লেখ থকা বুলি অভিযোগ উত্থাপন কৰি বিধায়কজনে লগতে কয়, ‘টিলাবাড়ী বান্দৰকোন গাঁও পঞ্চায়তৰ ছয় নম্বৰ ৱাৰ্ডত ৩২জন ভোটাৰ দেখুওৱা হৈছে।’ আনকি তেওঁৰো এই খচৰা ভোটাৰ তালিকাত নাম নাই বুলি বিধায়ক আহমেদে অভিযোগ কৰি লগতে কয় যে ধলছড়া গাঁও পঞ্চায়তৰ এক নম্বৰ ৱাৰ্ডৰ সহস্রাধিক ভোটাৰৰ নামো এই খচৰা ভোটাৰ তালিকাৰ পৰা অন্তৰ্ধান হৈছে। একেদৰে নেটেলাতু-সোজপুৰ গাঁও পঞ্চায়তৰ ১০ নম্বৰ ৱাৰ্ডতো এনে ঘটনা সংঘটিত হৈছে বুলি তেওঁ অভিযোগ উত্থাপন কৰে।
খচৰা ভোটাৰ তালিকা চক্রান্তমূলকভাৱে প্ৰস্তুত কৰা হৈছে বুলি ক্ষোভ প্রকাশ কৰি বিধায়কজনে পুনৰ কয়, ‘বিজেপিৰ একাংশ নিম্ন পৰ্যায়ৰ কৰ্মীয়ে মোক সহ্য কৰিব পৰা নাই। তেওঁলোকে সম্পূর্ণ চক্রান্তমূলকভারে পঞ্চায়তৰ ভোটাৰ তালিকা প্রস্তুত কৰাইছে। মুখ্যমন্ত্ৰীক এই কথা অরগত কৰিম। কাৰ নেতৃত্বত পঞ্চায়তৰ খচৰা ভোটাৰ তালিকাত এই বৃহৎ বিসংগতি ঘটিছে, সেয়া প্রশাসনে প্রকাশ কৰিব লাগিব। চৰকাৰী চাকৰিয়ালৰ বিৰুদ্ধে ব্যৱস্থা গ্রহণ কৰিব লাগিব।’ খচৰা ভোটাৰ তালিকাৰ এই বিসংগতি সম্পর্কত অহা মঙলবাৰে শ্রীভূমিৰ জিলা আযুক্তক স্মাৰকপত্ৰ প্ৰদান কৰিব বুলি বিধায়ক আহমেদে সদৰী কৰে। তাৰ পাছতো ফল নাপালে বৃহত্তৰ আন্দোলন গঢ়ি তোলাৰ তেওঁ হুংকাৰ দিয়ে।
আনহাতে, বহিষ্কৃত কংগ্ৰেছ বিধায়কজনক বিজেপিৰ স’তে তেওঁৰ ঘনিষ্ঠতা প্রসংগ সাংবাদিকে সংবাদমেলত উত্থাপন কৰাত তেওঁ কয়, ‘মুখ্যমন্ত্ৰীৰ কামৰ স’তে শ্রীভূমি জিলাৰ একাংশ বিজেপি কর্মীৰ কামৰ অমিল আছে। মোৰ ৰাজনৈতিক ভবিষ্যৎ ধ্বংস কৰাৰ উদ্দেশ্যে চক্রান্তমূলকভাৱে কাম কৰিছে। খচৰা ভোটাৰ তালিকা প্রস্তুতত চৰকাৰী নীতি-নির্দেশনা (গাইড লাইন) সম্পূর্ণৰূপে প্ৰদানত কৰা হৈছে। এখন গাঁও পঞ্চায়তৰ কিছু সংখ্যকক আনত ভর্তি কৰা হৈছে। এই খেলিমেলিৰ মই উচিত তদন্ত দাবী কৰিছো।’
