Brutal incident in Guwahati:
দিছপুৰস্থ সচিবালয়ৰ সমীপতে ভয়ংকৰ ঘটনা ৷ বৃহস্পতিবাৰে দিনদুপৰতে লাষ্টগে’টৰ নাহৰণি পথত দুৰ্বৃত্তই ছুৰিকাঘাত কৰিছিল এগৰাকী যুৱতীক ৷ যুৱতী গৰাকীৰ পেট, ডিঙি আৰু হাতত ছুৰিৰে আঘাত কৰিছিল দুৰ্বৃত্তই। এখন ছুইফ্ট ডিজায়াৰ বাহনত অহা দুৰ্বৃত্তই যুৱতীগৰাকীক উপযুপৰি ছুৰিকাঘাত আক্ৰমণ কৰিয়ে পলায়ন কৰে। নাহৰণি পথৰ ১৪নং ঘৰৰ সন্মুখত সংঘটিত হয় এই নৃশংস ঘটনা ৷
যুৱতী গৰাকীয়ে ৰেপিড’ৰ বাবে ৰৈ আছিল পথৰ দাঁতিত। সেই সময়ত ছুইফ্ট ডিজায়াৰ বাহনত অহা দুৰ্বৃত্তই যুৱতী গৰাকীক পিছফালৰ পৰা ছুৰিকাঘাত কৰে ৷ দুৰ্বৃত্তৰ আক্ৰমণত গুৰুতৰভাৱে আহত হৈছিল যুৱতী গৰাকী। তেওঁক ততাতৈয়াকৈ গুৰুতৰ অৱস্থাত জিএমচিএইচত ভৰ্তি কৰা হৈছিল যদিও চিকিৎসালয়তে চিকিৎসাধীন অৱস্থাত শেষ নিস্বাস ত্যাগ কৰে ৷
প্ৰাপ্ত খবৰ অনুসৰি ঘাতকৰ বলী হোৱা যুৱতী গৰাকীৰ নাম মৌচুমী গগৈ ৷ তেওঁৰ প্ৰকৃত ঘৰ ডিব্ৰুগড়ৰ টিংখাঙত ৷ তেওঁ গুৱাহাটীত স্বাস্থ্য বিভাগত কৰ্মৰত আছিল ৷ পিতৃ এগৰাকী আৰক্ষী বিষয়া ৷ এমাহ পূৰ্বেহে তেওঁ নাহৰণি পথৰ ১৪ নং বাসগৃহটোত ভাড়াতীয়া হিচাপে আছিল ৷
সমগ্ৰ ঘটনাটো প্ৰেমজনিত বুলি জানিব পৰা গৈছে ৷ প্ৰেমৰ প্ৰস্তাৱ প্ৰত্যাখানৰ বাবেই ছুৰীৰে আক্ৰমণৰ সন্দেহ কৰা হৈছে। এই সন্দৰ্ভত যুৱতী গৰাকীয়ে নলবাৰীৰ সৰিয়হতলীৰ ভূপেন দাস নামৰ যুৱক জনৰ বিৰুদ্ধে এমাহৰ পূৰ্বে পানবজাৰ মহিলা আৰক্ষী থানাত দাখিল কৰিছিল এজাহাৰ ৷ কিন্ত আৰক্ষীয়ে এই সন্দৰ্ভত লোৱা নাছিল কোনো ব্যৱস্থা ৷ আনকি বুধবাৰেও তেওঁক সংশ্লিষ্ট যুৱকজনে প্ৰাণে মৰাৰ ভাবুকি দিয়াৰ সন্দৰ্ভত পুনৰ আৰক্ষীৰ দৃষ্টিগোচৰ কৰিছিল যদিও আৰক্ষীৰ ভূমিকা নিৰাশজনক আছিল ৷ যাৰ ফলস্বৰূপে আজি দিনদুপৰতে যুৱকজনৰ ছুৰিকাঘাতত মৃত্যু হয় দুৰ্ভগীয়া মৌচুমীৰ ৷ তাৎপৰ্যপূৰ্ণ যে ঘাতক ভূপেন দাসৰ ঘৰ নলবাৰীৰ সৰিয়হতলীত ৷ দুই সন্তানৰ পিতৃ ৷ পেছাত আছিল উবেৰ চালক ৷
# ঘাতক ভূপেন দাস আৰক্ষীৰ জালত , ছুৰিকাঘাতৰে আত্মহত্যাৰ চেষ্টা ভূপেনৰ ,সংকটজনক অৱস্থাত জিএমচিএইছত ভৰ্তি
শেহতীয়া খবৰ অনুসৰি মৌচুমী গগৈক ছুৰিকাঘাত কৰি হত্যা কৰা ঘাতক হাজোৰ ভূপেন দাস পৰিছে আৰক্ষীৰ জালত ৷ নাহৰণি পথৰ ঘটনাস্থলীৰ পৰা এশ মিটাৰ দূৰত ছুইফ্ট ডিজায়াৰবাহন খনৰ ভিতৰত তেজেৰে তুমৰলি হৈ পৰি আছিল ঘাতক ভূপেন দাস ৷ আৰক্ষীয়ে বাহনৰ ভিতৰৰ পৰা সংকটজনক অৱস্থাত জিএমচিএইছ ভৰ্তি কৰিছে ভূপেনক ৷ সন্দেহ কৰা মতে ছুইফ্ট ডিজায়াৰ খন নিজেই চলাই আহি মৌচুমীক ছুৰিকাঘাত কৰি পিছত ভূপেন দাসে আত্মহত্যাৰ চেষ্টা চলাইছিল ৷ গোটেই ঘটনাটোৰ প্ৰকৃত ৰহস্য পোহৰলৈ আহিব আৰক্ষীৰ ক্ষীপ্ৰ তদন্তইহে ৷
এই খিনিতে কেতবোৰ প্ৰশ্নই মহানগৰবাসীক চিন্তাম্বিত কৰিছে ৷ আৰক্ষীয়ে যিকোনো ঘটনাৰ ভুক্তভোগীয়ে এজাহাৰ দিয়াৰ পিছতে কিয় নলয় তাৎক্ষণিক ব্যৱস্থা ৷ আৰক্ষীৰ চৰম হেমাহিৰ বাবে ইতিমধ্যে বহুকেইটা নৃশংস ঘটনা ঘটি গৈছে এই খন গুৱাহাটী ৷ স্মাৰ্ট আৰক্ষীয়ে সময়োচিত ব্যৱস্থা নোলোৱাৰ বাবেই ঘাতকৰ বলি মৌচুমী গগৈ ৷ এইক্ষেত্ৰত মুখ্যমন্ত্ৰীয়ে কিবা পদক্ষেপ গ্ৰহণ কৰিবনে ৷
