25-year-old Mexican woman in love with Majuli Rash:
শৰতৰ এই মধুময় সময়ত মাজুলীলৈ আগমন ঘটা প্রতিজন দেশী-বিদেশী পর্যটকৰে মন-প্রাণ উতনুৱা হৈ পৰে। ৰাসোৎসৱৰ সময়ত মাজুলীলৈ অহা সকলোৰে মন শ্রীকৃষ্ণৰ বাঁহীৰ অমিয়া সুৰে যেন পুলকিত কৰি তোলে। সকলোৰে মুখত লাগি থাকে ৰাসৰ সুমধুৰ সংগীতৰ অমিয়া সুধা। মাজুলীৰ জীয়ৰী-বোৱাৰী সকলোৱে এতিয়া ভাত বান্ধোতে, ঘৰ- চোতাল সাৰোতে, আঘোণৰ ব্যক্ত ৰূপোৱালি পথাৰতো গুণগুণাই থাকে ৰাসলীলাৰ এই সুন্দৰ গীতৰ সুৰ।
এই অভ্যাসৰ স’তে বর্তমান একাত্ম হৈ পৰিছে সাত সাগৰ, তেৰ নদীৰ সিপাৰৰ এগৰাকী পর্যটক। কাতিয়া নামৰ মেক্সিক’ৰ এইগৰাকী যুৱতীৰ এতিয়া মাজুলীত ইফালৰ পৰা সিফালে ঘূৰি ফুৰোতেও মুখত লাগি থাকে ৰাসলীলাৰ অমিয়া সংগীতৰ সুৰ। ৰাসোৎসৱৰ মাজতে মাজুলীলৈ অহা কাতিয়া এতিয়া মাজুলীৰ প্ৰেমত হাবু-ডাবু খাইছে, দুদিনৰ বাবে মাজুলী ভ্ৰমণ কৰিবলৈ অহা কাতিয়াই এতিয়া ছটাকৈ দিনে মাজুলীতে পাৰ কৰিলে। ঈশ্বৰসৃষ্ট মাজুলীৰ বিনন্দীয়া নিৰিবিলি পৰিৱেশৰ মাজত থকা গড়মূৰৰ ৰিভাৰ ৱাইণ্ড কটে’জত বাহৰ পাতিছে পর্যটক গৰাকীয়ে। প্রতিদিনাই দর্শন কৰিছে ইখনৰ পাছত সিখন ঐতিহ্যমণ্ডিত সত্র।
অভিভূত হৈছে মাজুলীৰ নিৰিবিলি আধ্যাত্মিক, প্রাকৃতিক পৰিৱেশ, শ্ৰীকৃষ্ণৰ বন্দনা, সত্ৰৰ অমিয়া বৰগীত-ভতিমাৰ সুৰত। সত্ৰীয়া নৃত্য দৰ্শন কৰি এপাক নাচিবলৈও চেষ্টা কৰা পৰিলক্ষিত হয় এই যুৱতী গৰাকীয়ে। পাৰ হৈ যোৱা ৰাসৰ স্মৃতিয়ে তাইক মাজে মাজে দোলা দিয়ে, শ্রীকৃষ্ণৰ সুমধুৰ বংশীৰ ধ্বনিয়ে হেনো আমনি কৰিছে কাতিয়াক। নিতৌ ল’জত নিজেই নিজৰ বাবে ভাত ৰান্ধাতো, নীৰৰে বহি থাকোতে গুণগুণাই থাকে ৰাসোৎসৱৰ গীত-‘আহা সখি আহা যাওঁ গকুলৰে শ্ৰীকৃষ্ণক নয়ন ভৰি চাওঁ’….।
এতিয়া মধুৰ স্মৃতি বুকুত বান্ধি তাই যাব পৰা নাই মাজুলীৰ মোহাচ্ছন্ন পৰিৱেশটো এৰি থৈ। এক কথাত কেৱল তায়েই নহয় মাজুলীলৈ অহা বহু দেশী-বিদেশী পর্যটকে মাজুলীৰ সাতামপুৰুষীয়া পৰম্পৰাৰ সমুজ্জ্বল ৰাসোৎসৱ দৰ্শন কৰি আপ্লুত হৈছে। ইফালে মাজুলীৰ প্ৰেমত পৰা ২৫ বছৰীয়া কাতিয়াক লৈ বিমোৰত পৰিছে মাজুলীৰ ল’জৰ স্বত্বাধিকাৰী অৰূপ শইকীয়াও। দুদিনৰ বাবে থাকিম বুলি ল’জ বুকিং কৰা কাতিয়াই এতিয়া মাজুলীৰ ৰূপ লাৱণ্যত অভিভূত হৈ যাবলৈয়ে মন নকৰাত আগতীয়া বুকিং থকা পর্যটকক ল’জখনৰ স্বত্বাধিকাৰীয়ে বেলেগত ৰাখিব লগা হৈছে।
এয়াই হয়তো মাজুলীৰ ঈশ্বৰ প্ৰদত্ত সৌন্দর্য, শীতল বায়ু, বিশুদ্ধ পৰিৱেশ, সন্ধিয়াৰ সত্ৰৰ পৰা ভাহি অহা গুৰুজনাৰ বৰগীত, নাম- প্ৰসংগৰ তান, কাষৰীয়া মিচিং গাঁৱৰ পৰা বতাহৰ তালে তালে অহা ঐনিঃতমৰ সুৰ, কেঁচা আপঙৰ গোন্ধ, আঘোণৰ ৰূপোৱালী পথাৰ, পুৱা-গধূলিৰ মাজুলীৰ জলাশয়সমূহত দেশী-বিদেশী পক্ষীৰ জলকেলি, নানা দেশী-বিদেশী বিহংগৰ কলকলনি, যাক পান কৰি হেঁপাহ নপলায় পর্যটকৰ। সেইবাবেই হয়তো আপোন পাহৰা কাতিয়াৰ দৰে অগণন পর্যটক।