Bhutanese oranges are abundant in the Barma market:
বাকসা জিলাৰ অন্যতম সাপ্তাহিক বৰমা বজাৰ এতিয়া ৰসাল আৰু মিঠা কমলা টেঙাৰে ভৰপুৰ। প্ৰতি বজাৰে বজাৰে বিক্ৰী হৈছে কেবা কুইণ্টলকৈ কমলা। প্রতি বছৰে কমলা কিনিবলৈ দূৰ-দূৰণিৰ পৰা অহা ক্ৰেতাৰ ভিৰ পৰিলক্ষিত হৈছে বৰমা বজাৰত। শীতকালত ৰ’দ পুৱাই কমলা খোৱাৰ আমেজেই সুকীয়া। বৰমা বজাৰৰ কমলা সমুহ আহিছে চুবুৰীয়া ৰাষ্ট্ৰ ভূটানৰ নামলাঙৰ পৰা। নামলাঙৰ ওচৰ অসম সীমান্তৱর্তী দাওধাৰাত গঢ়ি উঠিছে এখন বিখ্যাত কমলা বজাৰ।
এই বজাৰত ভুটানৰ ব্যৱসায়ীসকলে কমলা আনি অসমৰ ব্যৱসায়ীৰ ওচৰত বিক্ৰী কৰি যায়। তাৰ পৰাই বিভিন্ন ঠাইৰ ব্যৱসায়ীসকলে কমলা আনি অসমৰ বিভিন্ন জিলালৈ ৰপ্তানি কৰে।
আন্তঃৰাষ্ট্ৰীয় বজাৰত আছে ভুটানৰ কমলাৰ এক বিশেষ স্থান। ভূটানৰ কমলা বৰ মিঠা আৰু সোৱাদযুক্ত। এই কমলাৰ সোৱাদ লবলৈ বৰমা বজাৰত ভিৰ কৰে গ্ৰাহকে। ভুটানৰ কমলাৰ দাম বেচি হলেও গ্রাহকে ক্রয় কৰে। পোণ হিচাপত বিক্রী কৰে কমলাসমূহ। দাওধাৰাত এপোন (৮০ টা) কয়লাৰ ভাগ ৫০০ টকা। বৰমা বজাৰত হয় ৭০০-৮০০ টকা। দর্জন হিচাপত ১৫০ টকা। কমলা ব্যবসায়ীসকলে কোৱা মতে এই ব্যৱসায় মাত্র তিনিমাহৰ।
আঘোণ-পুহ আৰু মাঘতহে কমলাৰ ব্যৱসায় ভাল। এই তিনিমাহত আমাৰ উপাৰ্জন ভাল। এনেদৰেই আমি পৰিয়াল পোহপাল দি আছে। চিমলাৰ ওচৰৰ দাওধাৰাৰ কমলা বজাৰৰ পৰা কোকৰাঝাৰ, ধুবুৰী, গুৱাহাটী, নলবাৰী, বৰপেটা, বাকসাৰ ব্যৱসায়ীয়ে কমলা লৈ যায়। এই দাওধাৰাতে এতিয়া গঢ় লৈ উঠিছে কমলাৰ এখন ডাঙৰ পাইকাৰী বজাৰ। বৰ্তমান শীতকালৰ লগে লগে ভূটানৰ ৰসাল কমলাৰে ভৰি পৰিছে সীমান্তৰ এই বজাৰখন। তাৰ সমান্তৰালকৈ বাকসাৰ বৰমা বজাৰত উভেনদী হৈছে ভূটানৰ কমলা। ইয়াৰ লগতে বাকসাৰ বিভিন্ন প্ৰান্তৰ বজাৰসমূহত উপলব্ধ হৈছে ভূটানৰ পৰা ৰপ্তানি কৰা কমলা।
প্ৰতি বছৰে অসমৰ বিভিন্ন প্ৰান্তৰ বজাৰলৈ আহে চুবুৰীয়া ৰাষ্ট্ৰ ভূটানৰ এইসমূহ কমলা। যাৰ বাবে বজাৰত কমলা ক্ৰয় কৰিবলৈ গ্রাহকেও হেতা-ওপৰা কৰা পৰিলক্ষিত হৈছে। যিয়ে এবাৰ এই কমলাৰ সেৱাদ লৈছে তেওঁ পাহৰিব নোৱাৰে। তথ্য মতে,অসমৰ লগতে ভাৰতৰ বিভিন্ন প্ৰান্তৰ লগতে বাংলাদেশ আৰু অন্য বহু দেশলৈ পূৰ্বৰে পৰা ৰপ্তানি হৈ আহিছে ভুটানৰ এই কমলা টেঙা ৷
