Terror of Leopards in Amulapatty :
বহু দূৰলৈ কোনো ধৰণৰ হাবি-জংঘল নথকা সত্ত্বেও নগাঁও চহৰৰ ঘন জনবসতিপূর্ণ আমোলাপট্টিৰ এটা বাসগৃহৰ ওপৰ মহলাৰ অৰ্ধনিৰ্মিত হৈ থকা গা-ধোৱা ঘৰত বাঘৰ উপস্থিতিয়ে ৰাইজক আশ্চর্য আৰু আতংকিত কৰি তোলে। নিশা বাতৰি লিখা পৰলৈকে সমগ্ৰ অঞ্চলটোত এই আতংক অব্যাহত আছে। তাৰ পৰিণতিত আমোলাপট্টিৰ ৰাজপথ প্ৰায় জনশূন্য হৈ পৰে। ৰাইজৰ বাবে ভয়ৰ কাৰণ অধিক বৃদ্ধি হোৱাৰ মূলতে হ’ল সম্প্রতি বাঘটোৱে ক’ত আশ্ৰয় লৈ আছে, তাৰ সন্ধান ওলোৱা নাই।
উল্লেখ্য যে আমোলাপট্টিৰ কমলানন্দ পথৰ মঞ্জুল কলিতা নামৰ এজন লোকৰ ঘৰৰ ওপৰ মহলাৰ আধা সজাকৈ থোৱা গা-ধোৱা ঘৰটোত এজন লোকে নাহৰফুটুকী বাঘটো প্রত্যক্ষ কৰে। লগে লগে গৃহস্থই হুৱাদুৱা লগায়। এনেদৰে এটা বাঘৰ অৱস্থিতিৰ কথা ৰাষ্ট্ৰ হৈ পৰাত নগাঁও চহৰত চাঞ্চল্যৰ সৃষ্টি হয়। বহু লোকে বাঘটো চাবলৈ ঘৰটোত ভিৰ কৰে।
সংবাদ মাধ্যমৰ লোকো উপস্থিত হয়। তেতিয়াই বাঘটোৱে সেই স্থানৰ পৰা দৌৰি আঁতৰি যায়। তাৰ পাছত বাঘটো ক’ত সোমাল কোনেও টলকিবই নোৱাৰিলে। নগাঁও বন বিভাগ আৰু আৰক্ষীয়ে বাঘটো বিচাৰি চলাথ কৰিছে যদিও সন্ধান লাভ কৰা নাই। ৰাইজৰ লগতে বন বিভাগো এই কথাক লৈ আচৰিত হ’বলৈ বাধ্য হৈছে যে আমোলাপট্টি অঞ্চলটোৰ পৰা বহু দূৰ পৰ্যন্ত কোনো ধৰণৰ হাবি-জংঘল নাই।
তৎসত্ত্বেও ক’ৰ পৰা এটা বাঘ সেই স্থানত উপস্থিত হ’ল? বিয়লি নগাঁৱৰ বিধায়ক ৰূপক শর্মাই ঘটনাস্থলীলৈ গৈ পৰিস্থিতিৰ বুজ লয়। বিধায়কজনে নগাঁও চহৰবাসীক সজাগ আৰু সতর্ক হৈ থাকিবলৈ আহ্বান জনায়। নিৰাপত্তাজনিত কাৰণতে নগাঁও আৰক্ষীয়ে আমোলাপট্টিত পহৰাৰ ব্যৱস্থাও কৰিছে । আনহাতে বৃহস্পতিবাৰে জিলা প্ৰশাসনে আমোলাপট্টিৰ সকলো শিক্ষানুষ্ঠান বন্ধ ঘোষণা কৰে ৷