Golden Monkey in Kakoijana Reserved Forest:
দুৰ্ঘটনা-বিদ্যুৎস্পৃষ্ট হৈ নিঃশেষ হ’বলৈ লৈছে কাকৈজানা সংৰক্ষিত বনাঞ্চলৰ দুষ্প্ৰাপ্য সোণালী বান্দৰ । পুনৰ বাহনৰ খুন্দাত নিহত আন এটি সোণালী বান্দৰ ।
দুষ্প্ৰাপ্য সোণালী বান্দৰৰ বাবে বিখ্যাত বঙাইগাওঁ জিলাৰ কাকৈজানা সংৰক্ষিত বনাঞ্চল । কিন্তু এতিয়া প্ৰায়েই নিঃশেষ হ’বলৈ লৈছে কাকৈজানা সংৰক্ষিত বনাঞ্চলৰ দুষ্প্ৰাপ্য সোণালী বান্দৰ । দুৰ্ঘটনা-বিদ্যুৎস্পৃষ্ট হৈ ইটোৰ পিছত সিটোকৈ সোণালী বান্দৰৰ মৃত্যুৱে উদ্বেগজনক তথ্য পোহৰলৈ আনিছে । শনিবাৰে পুনৰ খাদ্যৰ সন্ধানত ওলাই অহা এটা সোণালী বান্দৰ তীব্ৰবেগী বাহনৰ খুন্দাত নিহত হোৱাৰ পিছত ক্ষুব্ধ হৈ পৰিছে স্থানীয় লোক । ফলত সাধাৰণ জনতাই সোণালী বান্দৰৰ সুৰক্ষা নিশ্চিত কৰাৰ দাবীত ৰাষ্ট্ৰীয় ঘাইপথ অৱৰোধ কৰি এক উত্তাল পৰিৱেশৰ সৃষ্টি কৰে।
জানিব পৰা মতে জিলাখনৰ উত্তৰ শালমাৰাৰ নিকটৱৰ্তী ককৈজানাৰ কদমতলিত দুস্প্ৰাপ্য সোণালী বান্দৰ এটি আজি পুৱা ৭.৫০ মান বজাত খাদ্যৰ সন্ধানত ১১৭ নং ৰাষ্ট্ৰীয় ঘাইপথ অতিক্ৰম কৰিবলৈ লোৱা সময়তে তীব্ৰবেগী বাহনৰ খুন্দাত মৃত্যু হয় । ফলত অঞ্চলটোৰ ৰাইজ ক্ষুব্ধ হৈ সোণালী বান্দৰৰ সুৰক্ষা সুনিশ্চিত কৰাৰ দাবীত ৰাষ্ট্ৰীয় ঘাইপথ অৱৰোধ কৰি উত্তাল পৰিৱেশৰ সৃষ্টি কৰে ।
অৱৰোধকাৰীসকলে জানিবলৈ দিয়ামতে, ৰাষ্ট্ৰীয় ঘাইপথত ডাম্পাৰৰ দৌৰাত্ম্য বৃদ্ধি পাইছে । টিপ মিলাবৰ বাবে ডাম্পাৰ সমূহে তীব্ৰবেগত চলাচল কৰাৰ বিপৰীতে পৰিবহন বিভাগে পৰ্যাপ্ত গতিৰোধক বা কৰিডৰ নিৰ্মাণৰ বিপৰীতে মাত্ৰ ফলকতে যান-বাহনৰ গতি নিয়ন্ত্ৰণৰ ব্যৱস্থা কৰাৰ পৰিণতিতে বাহনৰ খুন্দাত বা বিদ্যুৎস্পৃষ্ট হৈ এটাৰ পাছত এটাকৈ বান্দৰৰ মৃত্যু হোৱা পৰিলক্ষিত হৈছে । আনপিনে চৰকাৰে বিভিন্ন ক্ষেত্ৰত কোটি-কোটি টকাৰ আঁচনি গ্ৰহণ কৰাৰ পাছতো বিশ্বৰ দুস্প্ৰাপ্য সোণালী বান্দৰৰ সুৰক্ষাৰ বাবে কোনো আঁচনি গ্ৰহণ কৰা নাই ।
পৰৱৰ্তী সময়ত জিলা আয়ুক্ত নৱদ্বীপ পাঠক, আৰক্ষী অধীক্ষক মোহনলাল মীনা ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰে ৷ পিছত অভয়াপুৰীৰ আঞ্চলিক বন বিষয়াৰ কাৰ্যালয়ৰ বন কৰ্মীয়ে মৃত বান্দৰটো চমজি লৈ মৰণোত্তৰ পৰীক্ষা সম্পন্ন কৰি সৎকাৰ কৰে ।
উল্লেখ্য যে, মন্ত্ৰী ৰঞ্জিত কুমাৰ দাসে যোৱা ১৮ ডিচেম্বৰত জিলা আয়ুক্ত নৱদ্বীপ পাঠক, বিজেপিৰ জিলা সভাপতি উজ্বলকান্তি ৰায়, শংকৰ প্ৰসাদ ৰায়ৰ সৈতে বনাঞ্চলখনত উপস্থিত হৈ দুস্প্ৰাপ্য সোণালী বান্দৰ পৰিদৰ্শন বান্দৰ চাবলৈ আহি মনটো বিষাদেৰে ভৰি পৰা বুলি মন্তব্য কৰি যোৱা ৯ টা বছৰত সোণালী বান্দৰৰ মৃত্যুৰ সংখ্যা হৈছে প্ৰায় ৪০ তকৈও অধিক বুলি জানিবলৈ দিছিল । প্ৰায় ৪০০ মান সোণালী বান্দৰ থকা বঙাইগাঁৱৰ কদমতলা আৰু ৰাভাপাৰা অঞ্চলৰ ৰাইজে এই বান্দৰৰ সংৰক্ষণ আৰু সুৰক্ষাৰ বাবে যথেষ্ট কষ্ট কৰিছে বুলিও উল্লেখ কৰিছিল ।
আনপিনে সোণালী বান্দৰবোৰে যিহেতু অমৰা, জবাফুল, বাঁহগছৰ আগ তথা গাঁজ, তেতেলি, কহেৰা, কাঞ্চন আদি খাদ্য হিচাপে গ্ৰহণ কৰে, গতিকে পাহাৰ হওক বা ভৈয়ামতেই হওক এমজিএনৰেগা অথবা বন বিভাগৰ জৰিয়তে এই গছসমূহ অধিক মাত্ৰাত ৰোপণ কৰাৰ ব্যৱস্থা কৰা হয় তেতিয়াহে আগন্তুক দিনত এই প্ৰজাতিটোৰ জীৱন নিৰ্বাহ কৰাত সুবিধা হ’ব বুলিও কৈছিল ।
ইপিনে জাৰ্মানী, অষ্ট্ৰেলিয়া, ইউৰোপ, আমেৰিকা, ইটালী আদি বিভিন্ন দেশৰ পৰা অহা প্ৰায় ৩০০ তকৈ অধিক পৰ্যটকে এই সোণালী বান্দৰ চাবলৈ অসমলৈ অহা বুলি উল্লেখ কৰি পৰ্যটনৰ দিশত ইয়াক আগুৱাই নিয়াৰ যথেষ্ট প্ৰয়োজন আছে বুলিও কোৱাৰ পাছতে বান্দৰৰ সুৰক্ষাহীনতাৰ বাবে বছৰটোৰ পহিলা সপ্তাহটোতে পুনৰাই এটিৰ মৃত্যু হোৱাত বেদনাহত কৰিছে বহুতকে ।
