ASSAM FLOOD: ‘ড০ হিমন্ত বিশ্ব শৰ্মাৰ আগ্ৰহত অসমত এইবছৰ ২৪৫ কিলোমিটাৰ মথাউৰি নিৰ্মাণ কৰা হ’ব । খেতি কৰিবলৈও আমি বানমুক্ত হ’ব লাগিব, উদ্যোগ আনিবলৈও বানমুক্ত হ’ব লাগিব । উদ্যোগ নহ’লে, খেতি নহ’লে আমি কেতিয়াও আগবাঢ়ি যাব নোৱাৰো।’ মন্ত্ৰী পীযুষ হাজৰীকা ।
বুধবাৰে জোনাইত ১৫ কিল’মিটাৰ দৈৰ্ঘ্যৰ নতুন মথাউৰি নিৰ্মাণকাৰ্যৰ শুভাৰম্ভ অনুষ্ঠান উপলক্ষে আয়োজিত ৰাজহুৱা সভাত উপস্থিত থাকি ভাষণ প্ৰসংগত মন্ত্ৰী পীযুষ হাজৰীকাই কয়, “যেতিয়া বানপানী হয়, মথাউৰি ভাগে মোৰ মনটো বেয়া হৈ থাকে। কিয়নো মই বিভাগটোৰ মন্ত্ৰী। বিভাগটোৰ মন্ত্ৰী হৈ যদি মই মানুহক বানপানীৰ পৰা ৰক্ষা কৰিব নোৱাৰো, গৰাখহনীয়াৰ পৰা যদি ৰক্ষা কৰিব নোৱাৰো, তেতিয়া মই যেন ক’ৰবাত ব্যৰ্থ, তেনেকুৱা অনুভৱ হয়। আজি মোৰ কাৰণে এটা ভাল খবৰ। আপোনালোকৰ কাৰণে যিমান ভাল খবৰ, মোৰ কাৰণেও এটা ভাল খবৰ। কিয়নো আজি জোনাইত ১৫ কিল’মিটাৰ দৈৰ্ঘ্যৰ নতুন মথাউৰি নিৰ্মাণকাৰ্যৰ শুভাৰম্ভ কৰা হ’ব। যেতিয়া বানপানী হয়, মথাউৰি ভাগে মোৰ মনটো বেয়া হৈ থাকে। কিয়নো মই বিভাগটোৰ মন্ত্ৰী। বিভাগটোৰ মন্ত্ৰী হৈ যদি মই মানুহক বানপানীৰ পৰা ৰক্ষা কৰিব নোৱাৰো, গৰাখহনীয়াৰ পৰা যদি ৰক্ষা কৰিব নোৱাৰো, তেতিয়া মই যেন ক’ৰবাত ব্যৰ্থ, তেনেকুৱা বুলি মোৰ অনুভৱ হয়।”
মন্ত্ৰীগৰাকীয়ে পুনৰ কয় যে, “আজিৰ পৰা চাৰে তিনিবছৰ আগতে ড০ হিমন্ত বিশ্ব শৰ্মাই মোক জলসম্পদ বিভাগৰ মন্ত্ৰী পাতিছিল। একেদিনাই গোটেইখিনি কাম কৰিব নোৱাৰি, কাৰণ অসমৰ এটা মূল সমস্যা আছিল বানপানী আৰু গৰাখহনীয়া। ধেমাজি, মৰিগাঁও, মাজুলী, শদিয়া, লখিমপুৰ আদি অঞ্চলসমূহ অত্যন্ত বানপানী প্ৰৱণ এলেকা আছিল। মন্ত্ৰীগৰাকীয়ে আজিৰ পৰা কেইবছৰমান পূৰ্বৰ বিভিষীকাময় বান সমস্যাৰ কথা উল্লেখ কৰি কয় যে আজিৰ পৰা দুবছৰমান আগৰ পৰিস্থিতি যদি আমি চাওঁ তেন্তে বাতৰি কাকতত দেখিবলৈ পাওঁ যে ধেমাজি অসমৰ পৰা বিছিন্ন হৈ গ’ল। কিন্তু যোৱা দুবছৰৰ পৰা তেনেকুৱা বাতৰি অহা নাই। যোৱা দুবছৰত ড০ হিমন্ত বিশ্ব শৰ্মা ডাঙৰীয়াৰ নেতৃত্বত আমি কাম কৰি কৰি এইখিনি পৰ্যায় পাইছো যে এতিয়া ধেমাজিৰ ৰাইজ কেতিয়াও অসমৰ পৰা বিছিন্ন নহয়, বিছিন্ন হ’ব নোৱাৰে, তাৰ কাৰণে আৰু কাম কৰিম, মই আপোনালোকক কথা দিছো। মন্ত্ৰীগৰাকীয়ে ধেমাজিৰ বানপানী একেবাৰে নাইকিয়া কৰাৰো প্ৰতিশ্ৰুতি দিয়ে।”
মন্ত্ৰীগৰাকীয়ে ভাষণত “জোনাইত কেৰকেৰৰ পৰা বৰঙলৈ ৪১ কোটি টকা ব্যয়সাপেক্ষে ১৫ কিল’মিটাৰ দৈৰ্ঘ্যৰ নতুন মথাউৰিৰ কাম আৰম্ভ কৰাৰ কথা উল্লেখ কৰে। ড০ হিমন্ত বিশ্ব শৰ্মাৰ আগ্ৰহত অসমত এইবছৰ ২৪৫ কিলোমিটাৰ মথাউৰি নিৰ্মাণ কৰা হ’ব বুলি তেওঁ কয়। যদি আৰু ডেৰশ কিলোমিটাৰ মথাউৰি নিৰ্মাণ কৰিব পৰা যায় তেন্তে অসমত আৰু য’ত মথাউৰি বনাব পাৰি, তাত আৰু মথাউৰি বনাবলৈকে ঠাই নাথাকিব বুলি কয়। বিভাগটোৱে দিনে-নিশাই বাৰিষাৰ সময়ত মথাউৰিৰ কাম কৰাৰ বাবে মথাউৰি ভঙাৰ সংখ্যা হ্ৰাস পাইছে । আগতে ভগা মথাউৰি মেৰামতি কৰোঁতে ডেৰ বছৰ-দুই বছৰ লাগিছিল, কিন্তু আজি মুখ্যমন্ত্ৰী ড০ হিমন্ত বিশ্ব শৰ্মাৰ নিৰ্দেশত ১৫ দিনৰ ভিতৰত মথাউৰি মেৰামতি কৰা হয়।”
মন্ত্ৰীগৰাকীয়ে কয় যে, “বানপানীৰ পৰা আমাৰ গাঁৱৰ মানুহক মুক্ত কৰিব লাগিব, বানপানীৰ পৰা খেতিয়কসকলক মুক্ত কৰিব লাগিব। মুখ্যমন্ত্ৰী ড০ হিমন্ত বিশ্ব শৰ্মাৰ যি সপোন অসমক দেশৰ পাঁচখন উন্নত ৰাজ্যৰ মাজলৈ লৈ যোৱাৰ, তেতিয়াহে অসমক আমি উন্নত ৰাজ্যৰ মাজলৈ লৈ যাব পাৰিম বুলি ভাষণত উল্লেখ কৰে। তেওঁ কয় যে যদি বাৰে বাৰে বানপানী হয়, ল’ৰা-ছোৱালীয়ে যদি পঢ়িব নোৱাৰে, বানপানীয়ে যদি খেতিখিনি বাৰে বাৰে মাৰি নিয়ে আমাৰ মানুহ কেতিয়াও ধনী হ’ব নোৱাৰে। চাকৰি দি আমি নিৱনুৱা সমস্যা সমাধান কৰিব নোৱাৰো, চাকৰি দি আমি গোটেই অঞ্চলটো পৰিৱৰ্তন কৰিব নোৱাৰো, আমি খেতি কৰি আমাৰ অঞ্চলটোৰ পৰিৱৰ্তন আনিব লাগিব। আমি উদ্যোগ আনি অঞ্চলটোলৈ পৰিৱৰ্তন আনিব লাগিব। খেতি কৰিবলৈও বানমুক্ত হ’ব লাগিব, উদ্যোগ আনিবলৈও বানমুক্ত হ’ব লাগিব ।”