Arun Bora Memorial State Journalist Award:
যোৰহাট জিলা সাংবাদিক সন্থাৰ উদ্যোগত বৃহস্পতিবাৰে যোৰহাট প্ৰেছ ক্লাৱত অনুষ্ঠিত হৈ যায় মাজুলীৰ সংবাদক্ষেত্ৰৰ পুৰোধা ব্যক্তি তথা অসম আন্দোলনৰ সংগ্ৰামী, কৃতি শিক্ষক প্ৰয়াত অৰুণ বৰা সোঁৱৰণি ৰাজ্যিক ভিত্তিত সাংবাদিকতা বঁটা প্ৰদান অনুষ্ঠান।
চলিত বর্ষৰ বাবে এই বঁটা প্ৰদান কৰা হয় ৰাজ্যৰ বিশিষ্ট সাংবাদিক – লেখক জিতুমণি বৰাক ৷ সাংবাদিক বৰাক গামোচা, চেলেং, স্মাৰক, প্ৰশস্তি পত্ৰ, মাজুলীৰ মুখা শিল্প প্ৰতিক সহ নগদ দহ হাজাৰ টকা প্ৰদান কৰা হয়। এই বঁটা গ্ৰহণ কৰি সাংবাদিক জিতুমনি বৰাই কয় যে, সাংবাদিক সন্থাই এজন সাংবাদিকক দিয়াৰ বঁটাৰ বহু গুৰুত্ব আছে। যিহেতু প্ৰয়াত অৰুণ বৰা আছিল মাজুলী তথা ৰাজ্যৰ সংবাদক্ষেত্ৰৰ এক পৰিচিত নাম।
যোৰহাট জিলা সাংবাদিক সন্থাৰ সভাপতি ৰাম প্ৰসাদ ফুকনৰ সভাপতিত্বত অনুষ্ঠিত হোৱা বঁটা প্ৰদান সভা উদ্বোধন কৰে সদৌ অসম ৰাজ্যিক সাংবাদিক সন্থাৰ সভাপতি জিতু শৰ্মা ৰাজখোৱাই। যোৰহাট জিলা সাংবাদিক সন্থাৰ সম্পাদক মৃদুল হাজৰিকাই আত ধৰা সভাত মুখ্য অতিথি হিচাপে উপস্থিত থাকে যোৰহাট সমষ্টিৰ বিধায়ক হিতেন্দ্ৰ নাথ গোস্বামী ।
যোৰহাট জিলা সাংবাদিক সন্থাৰ কাৰ্যকৰী সভাপতি সঞ্জীৱ দত্তই আদৰণী ভাষণ আগবঢ়োৱা সভাত যোৰহাট চিকিৎসা মহাবিদ্যালয় আৰু চিকিৎসালয়ৰ অধীক্ষক ডাঃ মানৱ গোহাঁই বিশিষ্ট অতিথি হিচাপে উপস্থিত থাকি বক্তব্য আগবঢ়ায়।
সভা খনত উপস্থিত থাকে যোৰহাট প্ৰেছ ক্লাৱৰ সভাপতি অশোক কুমাৰ বৰুৱা, জিলা তথ্য আৰু জনসংগযোগ বিষয়া ৰজত সেন, মাজুলী জিলা সাংবাদিক সন্থাৰ সম্পাদক ডিম্বেশ্বৰ দত্ত, সাংবাদিক দীপু বৰা ,অৰুন বৰাৰ পুত্ৰ পাৰ্থ বৰা সহ বহু কেই গৰাকী গণমান্য ব্যক্তি ৷