Shah Rukh Khan:আক্ৰমণৰ লক্ষ্য আছিল মহাতাৰকা শ্বাহৰুখ খান!
দুদিন পূর্বে ‘বাদশ্বাহ’ৰ ঘৰৰ ওচৰতো দেখা গৈছিল সন্দেহজনক লোকজনক
ক্রমে পুনৰ অপৰাধ নগৰীলৈ পর্যবসিত হোৱাৰ দিশে ধাৱমান হোৱা মুম্বাইত কালি পুৱতি নিশা ঘৰৰ ভিতৰতে জনপ্রিয় অভিনেতা ছঈফ আলী খান এজন দুর্বৃত্তৰ চুৰিকাঘাতত গুৰুতৰভাৱে আহত হোৱাৰ ঘটনাৰ তদন্তত আৰক্ষীয়ে কেতবোৰ বিস্ফোৰক তথ্য উদ্ধাৰ কৰিছে।
আৰক্ষী সূত্ৰই প্ৰকাশ কৰা অনুসৰি, কেৱল ছঈফেই নহয়, বলিউদৰ ‘বাদশ্বাহ’ৰূপে খ্যাত মহাতাৰকা শ্বাহৰুখ খানো দুর্বৃত্তৰ লক্ষ্য আছিল। ছঈফক ঘৰৰ ভিতৰতে দুর্বৃত্তই ছুৰিকাঘাত কৰাৰ দুদিন পূর্বে শ্বাহৰুখৰ ঘৰ ‘মন্নত’ৰ ওচৰতো এজন সন্দেহজনক ব্যক্তি প্রত্যক্ষ কৰা হৈছিল। অভিনেতা শ্বাহৰুখৰ ঘৰো মুম্বাইৰ বান্দ্রাতে অৱস্থিত।
সূত্ৰই প্ৰকাশ কৰা অনুসৰি, শ্বাহৰুখৰ ঘৰৰ ওচৰত প্ৰত্যক্ষ কৰা সন্দেহজনক ব্যক্তিজনে অভিনেতা
জনৰ ঘৰত প্ৰৱেশ নকৰিলেও বাহিৰৰ পৰাই ঘৰৰ চৌপাশে দৃষ্টি দিয়ে। তাৰ পৰাই তেওঁ শ্বাহৰুখৰ ঘৰৰ চৌহদৰ সমস্ত দিশ লক্ষ্য কৰে বুলি আৰক্ষীয়ে সন্দেহ প্রকাশ কৰিছে।
আনহাতে, এই ঘটনাৰ খবৰ পাই অভিনেতাজনৰ ঘৰত মুম্বাই আৰক্ষীৰ এটা দল উপস্থিত হয়। সূত্রই প্ৰকাশ কৰা অনুসৰি, এই সন্দেহজনক ব্যক্তিজনে শ্বাহৰুখৰ ঘৰৰ আঠ ফুট উচ্চতাৰ লোহাৰ প্ৰৱেশদ্বাৰ বগাই ভিতৰত প্ৰৱেশ কৰাৰ চেষ্টাও কৰে যদিও ব্যর্থ হয়।
আনহাতে, ছঈফক ঘৰৰ ভিতৰতে দুর্বৃত্তই ছুৰিকাঘাত কৰি আহত কৰাৰ ঘটনাক লৈ বলিউদৰ অভিনেতা-অভিনেত্রীসকল আতংকিত হৈ আছে। এই ক্ষেত্ৰত অধিক উদ্বেগৰ বিষয়টো হ’ল যে ঘৰৰ চৌহদত থকা নিৰাপত্তাৰক্ষীৰ চকুত ধূলি দি দুর্বৃত্তজনে ছঈফক ঘৰৰ ভিতৰতে ছুৰিকাঘাত কৰি আহত কৰি পলায়ন কৰিবলৈ সক্ষম হয়।
ইয়াৰ পূৰ্বে ৰাজনীতিক বাবা ছিদ্দিকীকো ঘাতকে নিৰাপত্তা বেহু ভেদ কৰি হত্যা কৰে। এনে ঘটনাৱলীয়ে মুম্বাইক পুনৰ অন্ধকাৰৰ গর্ভলৈ ঠেলি দিয়া বুলি চর্চিত হৈছে।
https://x.com/Shahab2SRKian50/status/1879182485046821099
